يندۋستريا مينيسترلىگى باسپانا باعاسىن تومەندەتۋ بويىنشا شارالار قابىلداۋدا
23 مامىر 19:47

يندۋستريا مينيسترلىگى باسپانا باعاسىن تومەندەتۋ بويىنشا شارالار قابىلداۋدا

نۇر- سۇلتان. قازاقپارات - يندۋستريا جانە ينفراقۇرىلىمدىق دامۋ مينيسترلىگى قۇرىلىس ماتەريالدارى باعاسىنا مونيتورينگ جۇرگىزۋدە، دەپ حابارلايدى قازاقپارات.

«تۇرعىن ءۇي قۇرىلىسىنىڭ وزىندىك قۇنى قۇرىلىس ماتەريالدارىنىڭ باعاسىنا تىكەلەي تاۋەلدى ەكەندىگى بەلگىلى. بۇل ورايداعى ونىڭ ۇلەس سالماعى 60 پايىزعا دەيىن. قازىرگى تاڭدا باعانىڭ تومەندەۋى بايقالادى. ماسەلەن، ارماتۋرا باعاسى 6 پايىزعا، گاز بلوگى 3 پايىزعا، شىنى 17,6 پايىزعا كەمىگەن. رەسەيلىك قۇرىلىس ماتەريالدارى باعاسىنداعى دەمپينگكە وراي جاقىن مەرزىمدە نارىقتاعى باعانىڭ ءتۇسۋى بولجانۋدا. قۇرىلىسقا قاجەتتى نەگىزگى ماتەريالداردىڭ قۇنىنا مەملەكەت تاراپىنان تۇراقتى تۇردە مونيتورينگ جاسالۋدا. تالداما ناتيجەسى ءار توقسان سايىن مونوپولياعا قارسى ورگانعا بەرىلۋدە. بۇل جۇمىسپەن «قازاق قۇرىلىس جانە ساۋلەت عىلىمي- زەرتتەۋ جانە جوبالاۋ ينستيتۋتى» اق اينالىسۋدا. ەگەر دە وندىرۋشىلەر مەن جەتكىزۋشىلەر باعانى نەگىزسىز كوتەرگەنى انىقتالسا، ءتيىستى مونوپوليعا قارسى شارالار قولدانىلاتىن بولادى»، - دەلىنگەن مينيسترلىك حابارلاماسىندا.

مەملەكەتتىك ينۆەستيتسيا ەسەبىنەن تۇرعىزىلعان تۇرعىن ءۇي (1 شارشى مەترى 160-240 مىڭ تەڭگە ارالىعىندا) مەن الەۋمەتتىك نىساندار (قۇرىلىستىڭ شەكتى قۇنى) باعاسىن رەتتەۋ جانە تۇرعىن ءۇيدى بەكىتىلگەن باعامەن ساتۋ شارتىمەن جەكە قۇرىلىس سالۋشىنىڭ نىساندارىنا ينجەنەرلىك- كوممۋنيكاتسيالىق ينفراقۇرىلىمدى جۇرگىزۋ (1 شارشى مەترى 220-260 مىڭ تەڭگە ارالىعىندا) بويىنشا ءبىرقاتار شارالار قولعا الىنۋدا. جالپى العاندا، مەملەكەت جىلجىمايتىن مۇلىك نارىعىنداعى باعاعا باقىلاۋ جۇرگىزبەيدى. باستى سەبەپ - اتالعان نارىقتاعى باعا سۇرانىس پەن تۇرعىنداردىڭ ۇسىنىسىنا وراي وزدىگىنەن رەتتەلەدى.

باسپانا قۇنى كوپتەگەن فاكتورلارعا بايلانىستى قالىپتاسادى. اتاپ ايتقاندا، بۇعان جەر ۋچاسكەسىنىڭ قۇنى، ينفراقۇرىلىم، ينجەنەرلىك جۇيەلەر، نىساننىڭ ورنالاسقان جەرى، تۇرعىندار اراسىنداعى سۇرانىس پەن قۇرىلىستىڭ وزىندىك قۇنى كىرەدى. تۇرعىن ءۇي باعاسىن تومەندەتۋ ماقساتىندا وتاندىق وندىرۋشىلەردىڭ، سونىڭ ىشىندە ءۇي قۇرىلىسى كومبيناتتارىنىڭ ونىمدەرىن پايدالانۋ مىندەتتەلگەن. سونىمەن قاتار اتالعان ونىمدەر قولدانىلعان تيپتىك تۇرعىن ۇيلەر جوباسى دا دايارلانۋدا. ءوز كەزەگىندە تيپتىك جوبالاردى كەڭىنەن قولداۋ - جوبالاۋعا جۇمسالاتىن شىعىن كولەمىن ەداۋىر ازايتادى. بۇل باسپانا قۇرىلىسىنىڭ وزىندىك قۇنىن كەمىتۋگە دە سەرپىن بەرمەك.

جاڭالىقتار