قازاقستان مەن تۇركيا نارەستە رەانيماتسياسى بويىنشا بىرلەسكەن جوبانى ىسكە قوسپاق
قازىر بۇل قۇجات ەكى ەلدىڭ مەملەكەتتىك ورگاندارىنىڭ ماقۇلداۋىندا، دەپ حابارلايدى قازاقپارات ءتىلشىسى. بۇل تۋرالى ق ر دەنساۋلىق ساقتاۋ مينيسترلىگى قازاقپارات اگەنتتىنىڭ ساۋالىنا جولداعان جاۋابىندا ايتتى.
«جوبانىڭ نەگىزگى ماقساتى - وتباسى مەديتسيناسىندا، ينفەكسيالىق جانە ينفەكتسيالىق ەمەس اۋرۋلارمەن كۇرەستە، دارىگەرلەردى وقىتۋ ىسىندە جانە انا مەن بالا ءولىمىن ازايتۋ باعىتىندا تاجىريبە الماسۋ. ءقازىر اتالعان كەلىسىم مەملەكەتتىك ورگانداردىڭ ماقۇلداۋىندا جاتىر»، - دەپ جازىلعان ۆەدومستۆونىڭ مالىمەتىندە.
قۇجاتتىڭ تاعى ءبىر باعىتى بويىنشا اۋرۋحانالاردى باسقارۋ، فارماتسيەۆتيكا، مەديتسينالىق بۇيىمدار مەن قوندىرعىلار ءوندىرىسى، ۆاكسينا ازىرلەۋ جانە كوسمەتيكالىق ءونىم شىعارۋ ءىسى سالاسىندا اقپارات جانە تاجىريبە الماسۋ كوزدەلىپ وتىر. سونداي- اق مەديتسينا پەرسونالىنىڭ الەۋەتىن ارتتىرۋعا باعىتتالعان قىسقا مەرزىمدى ترەنينگتەر وتكىزۋ، ساراپشىلار مەن كەڭەس بەرۋ قىزمەتىن الماسۋ، دەنساۋلىق ساقتاۋ سالاسىنداعى ادام كاپيتالىن دامىتۋ بويىنشا ارىپتەستىكتى نىعايتۋ جوسپارلانىپ وتىر.
ايتا كەتەيىك، ق ر پرەزيدەنتىنىڭ تۇركيا مەملەكەتتىك ساپارى اياسىندا ەكى ەلدىڭ باسشىلارى كەڭەيتىلگەن ستراتەگيالىق سەرىكتەستىك جونىندە مالىمدەمە جاساعان بولاتىن. ول مالىمدەمەدە تاراپتار سىرتقى ساياسات، قورعانىس جانە قاۋىپسىزدىك، ەكونوميكا، ساۋدا، ينۆەستيتسيا، ونەركاسىپ، تاۋ- كەن ونەركاسىبى، عىلىم جانە تەحنولوگيا، كولىك، اقپاراتتىق- كوممۋنيكاتسيالىق تەحنولوگيالار جانە كيبەرقاۋىپسىزدىك، ەنەرگەتيكا، قورشاعان ورتا جانە ۋربانيزاتسيا، دەنساۋلىق ساقتاۋ، وتباسى جانە الەۋمەتتىك قىزمەتتەر، ازىق- تۇلىك، اۋىل شارۋاشىلىعى، اپاتتار مەن توتەنشە جاعدايلار، ءبىلىم بەرۋ، بۇقارالىق اقپارات قۇرالدارى مەن كوممۋنيكاتسيالار، مادەنيەت، تۋريزم، سپورت، ارحيۆ سالالارىنداعى ىنتىماقتاستىق پەن ۇيلەستىرۋدى تەرەڭدەتۋ جانە وسى باعىتتاعى ەكىجاقتى ىنتىماقتاستىق تەتىكتەرىن ۇلعايتۋ ارقىلى ولاردى بارىنشا پايدالانۋعا كەلىسىم جاسالعانى ايتىلعان.