ەردوعان شۆەتسيا مەن فينلياندياعا شارت قويدى

نۇر- سۇلتان. قازاقپارات - ەردوعان ناتو- عا كىرۋگە ءوتىنىش بەرگەن شۆەتسيا مەن فينلياندياعا شارت قويدى. ستوكگولم بۇل ءۇشىن ءبىرىنشى كەزەكتە رەسمي انكارا «قارا تىزىمگە» قوسقان «كۇردىستاننىڭ جۇمىسشى پارتياسىن» تەرروريستىك ۇيىم دەپ تانۋعا ءتيىس.

سونداي- اق تۇركياعا قارۋ- جاراق ەكسپورتتاۋعا سالىنعان تىيىم الىنۋى كەرەك. بۇل تۋرالى ەردوعان شۆەد پرەمەر- ءمينيسترى ماگدالەنە اندەرسسونعا تەلەفونمەن سويلەسكەن كەزدە ايتتى. ەكسترەميستىك كۇشتەرمەن كۇرەسكە قاتىستى تالابىن تۇرىك باسشىسى فينليانديا پرەزيدەنتى ساۋلي نيينيستيەگە دە جەتكىزدى. ەردوعاننىڭ ايتۋىنشا، حەلسينكيدىڭ بۇل باعىتتاعى جۇمىسى جەتكىلىكسىز.

ايتا كەتەيىك، 18- مامىردا وسى ەكى مەملەكەتتىڭ ەلشىلەرى ۇيىمنىڭ باس حاتشىسى يەنس ستولتەنبەرگكە ءتيىستى قۇجاتتاردى تاپسىردى. ۇزاق جىلدار بويى بەيتاراپ ساياساتتى ۇستانعان شۆەتسيا مەن فينليانديانىڭ مۇنداي قادامعا بارۋىنا ۋكرايناداعى سوعىس سەبەپ بولدى. ەندى قۇجاتتى 30 مەملەكەتتەن تۇراتىن ناتو كەڭەسى تالقىلايدى. وداقتاستاردىڭ كوبى شۆەتسيا مەن فينليانديانىڭ بۇل شەشىمىن قولداپ وتىر. تەك تۇركيا قارسى.

ال شۆەتسيا مەن فينليانديا تۇركيامەن كەلىسسوز جۇرگىزىلىپ جاتقانىن ايتتى. بۇل تۋرالى قوس ەلدىڭ باسشىسى ۆاشينگتوندا پرەزيدەنت دجو بايدەنمەن كەزدەسۋدە مالىمدەدى.

ساۋلي نيينيستيە، فينليانديا پرەزيدەنتى:

- تۇرىك باسشىلىعى ءبىزدىڭ ناتو- عا مۇشە بولۋ تۋرالى وتىنىشىمىزگە الاڭداۋشىلىعىن ءبىلدىرىپ وتىر. فينليانديا مەن تۇركيا ۇنەمى جاقسى قارىم- قاتىناستا بولعان. ءبىز لاڭكەستىكتىڭ بارلىق ءتۇرىن ايىپتاپ، ونىمەن بەلسەندى تۇردە كۇرەسىپ كەلەمىز. سوندىقتان اليانسقا مۇشە بولۋىمىزعا قاتىستى الاڭداتىپ وتىرعان كەز- كەلگەن ماسەلەنى تالقىلاۋعا دايىنبىز.

ماگدالەنا اندەرسسون، شۆەتسيا پرەمەر- ءمينيسترى:

- شۆەتسيا 200 جىلعا سوزىلعان بەيتاراپتىقتان كەيىن جاڭا باعىتتى تاڭداپ وتىر. وتكەن كۇنى شۆەتسيا مەن فينليانديا ناتو- عا مۇشە بولۋعا ءوتىنىش بەردى. بۇعان ءبىزدىڭ كورشى تاۋەلسىز، دەموكراتيالىق ەلگە جاسالعان اسكەري شابۋىل يتەرمەلەپ وتىر. سوندىقتان ۇكىمەت شۆەد حالقىنىڭ قاۋىپسىزدىگىن قامتاماسىز ەتۋدىڭ ەڭ ءتيىمدى جولى ناتو- عا مۇشە بولۋ دەپ شەشتى.

www.24.kz