قازاقستان قىتايعا ەكسپورتتى ۇلعايتۋدا - شەتەلدەگى قازاق ءتىلدى ب ا ق-قا شولۋ
22 مامىر 14:54

قازاقستان قىتايعا ەكسپورتتى ۇلعايتۋدا - شەتەلدەگى قازاق ءتىلدى ب ا ق-قا شولۋ

نۇر-سۇلتان. قازاقپارات - «قازاقپارات» ح ا ا ادەتتەگىدەي شەتەلدەگى قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.

شىڭجاڭداعى جايلاۋدىڭ كورىنىسى «حالىق» تورابىندا جاريالاندى - «جەنمين جيباو»

قىتايدىڭ «جەنمين جيباو» اقپاراتتىق پورتالىندا وسىنداي تاقىرىپپەن سۋرەتتى اقپارات جاريالاندى. كوزدىڭ جاۋىن الاتىن اسەم تابيعات اياسىندا جايىلىپ جۇرگەن قورالى قوي مەن ءۇيىرلى جىلقىلار سۇلۋ تابيعاتتىڭ سانىنە ودان سايىن ءسان قوسىپ تۇرعانىن بايقاۋعا بولادى.


قىتايلىق ب ا ق-تىڭ مالىمەتىنشە، شىڭجاڭنىڭ ىلە قازاق اۆتونوميالى وبلىسى، كۇنەس اۋدانىنداعى جاۋىر جايلاۋىندا كوكتەمگى جاڭبىردان كەيىن ءشوپ جاقسى كوكتەگەن. بەل- بەلەستەر «جاسىل كىلەم» جامىلىپ، كورىنىسى كوز تارتارلىق بەينەگە ەنگەن.

«كەشقۇرىم باتىپ بارا جاتقان كۇننىڭ ارايىنا شومىلىپ اسەم ساعىم ويناعان جايلاۋدا جايىلىپ جاتقان ءۇيىرلى جىلقى، قورالى قوي اقىنداردىڭ جىرىنا، سۋرەتكەردىڭ قالامىنا ارقاۋ بولارلىق كوركەم كورىنىس قالىپتاستىردى»، دەپ جازدى قىتايلىق باسىلىم.

قازاقستان مەن تۇركيا باق سالاسىندا ءوزارا ىنتىماقتاسادى - TRT

كەزدەسۋ بارىسىندا ەكى ەل اراسىنداعى اقپارات جانە باق سالاسى بويىنشا ءوزارا ىنتىماقتاستىق ماسەلەلەرى تالقىلاندى. تۇركيا رەسپۋبليكاسىنىڭ ىستانبۇل قالاسىندا تۇركى مەملەكەتتەرى ۇيىمىنا مۇشە ەلدەردىڭ اقپارات جانە مەديا جونىندەگى مينيسترلەرى مەن جوعارى لاۋازىمدى تۇلعالارىنىڭ 4- وتىرىسى ءوتتى، دەپ حابارلايدى «تۇركيا راديو تەلەديدار» اقپاراتتىق اگەنتتىگى.


اتالعان باسىلىمىنىڭ دەرەگىنشە، حالىقارالىق جيىنعا قاتىسقان قازاقستان اقپارات جانە قوعامدىق دامۋ ءمينيسترى اسقار ۋماروۆ شارانىڭ نەگىزگى بولىمىنەن كەيىن تۇركيا رەسپۋبليكاسى پرەزيدەنتى اپپاراتىنىڭ كوممۋنيكاتسيالار باسقارماسىنىڭ باسشىسى، پروفەسسور فاحرەتتين التۋنمەن كەزدەستى. «جۇزدەسۋ بارىسىندا ەكى ەل اراسىنداعى اقپارات جانە ب ا ق سالاسى بويىنشا ءوزارا ىنتىماقتاستىق ماسەلەسى، بىرلەسكەن تەلەحيكايالار مەن فيلمدەر ءتۇسىرۋ، قوعامدىق ديپلوماتيا سالاسىندا بىرىگىپ جۇمىس جۇرگىزۋ، تاجىريبە الماسۋ ماسەلەلەرى تالقىلاندى»، دەپ جازادى TRT.

سونداي-اق مينيستر ازەربايجان پرەزيدەنتىنىڭ كومەكشىسى، ءارى سىرتقى ساياسات جونىندەگى باسقارما باسشىسى حيكمەت گادجييەۆپەن دە كەزدەستى. كەزدەسۋدە ەكى ەلدىڭ مەديا سالاسىنداعى بايلانىسىن نىعايتۋ جانە تەلەونىمدەرمەن، ونىڭ ىشىندە انيماتسيالىق فيلمدەر الماسۋ جايى تالقىلانعان.

تاشكەنتتە قازاقستاندا وتەتىن رەفەرەندۋمعا بايلانىستى دوڭگەلەك ۇستەل ءوتتى - «ءوزا»

بۇل تۋرالى وسى اپتادا وزبەكستاننىڭ «ءوزا» مەملەكەتتىك اقپاراتتىق اگەنتتىگىندە جاريالاندى. وزبەكستاندىق ب ا ق-تىڭ دەرەگىنشە، 2022 -جىلدىڭ 17-مامىرى كۇنى قازاقستان رەسپۋبليكاسىنىڭ وزبەكستان رەسپۋبليكاسىنداعى ەلشىلىگىنىڭ باستاماسىمەن تاشكەنت قالاسىندا «Bilim Karvoni» مەملەكەتتىك ەمەس عىلىمي مەكەمەسىنىڭ ۇيىمداستىرۋىندا دوڭگەلەك ۇستەل ءوتتى. اتاۋلى ءىس- شارا وسى جىلدىڭ 5-ماۋسىمىندا قازاقستاندا وتەتىن رەفەرەندۋمعا بايلانىستى ەلدىڭ كونستيتۋتسياسىنا وزگەرىستەر مەن تولىقتىرۋلار ەنگىزۋ تۋرالى زاڭ جوباسىن تالقىلاۋعا ارنالدى. عىلىمي جيىنعا ەلشىلىك قىزمەتكەرلەرى، عالىمدار، حالىقارالىق ۇيىمداردىڭ ساراپشىلارى جانە ب ا ق وكىلدەرى قاتىستى.

وندا ەلشى د. ساتىبالدى دوڭگەلەك ۇستەلگە قاتىسۋشىلارعا 2022 -جىلدىڭ ناۋرىز ايىندا ق ر پرەزيدەنتى قاسىم-جومارت توقايەۆتىڭ قازاقستان حالقىنا جولداۋىندا ايتىلعان اۋقىمدى ساياسي وزگەرىستەر تۋرالى تولىقتاي اقپارات بەردى.


«ەلدىڭ «سۋپەرپرەزيدەنتتىك» باسقارۋ فورماسىنان ىقپالدى پارلامەنتى مەن ەسەپ بەرەتىن ۇكىمەتى بار پرەزيدەنتتىك رەسپۋبليكاعا تۇپكىلىكتى كوشۋدى، بارلىق مەملەكەتتىك مودەلدى كەشەندى ترانسفورماتسيالاۋدى، بيلىك تارماقتارى اراسىنداعى ءوزارا قارىم-قاتىناستىڭ وڭتايلى تەڭگەرىمىن قالىپتاستىرۋدى، مەملەكەت پەن قوعامنىڭ ءتيىمدى ديالوگىن قۇرۋدى بەكىتۋگە ارنالعان كونستيتۋتسيالىق رەفورمانىڭ ەرەكشەلىكتەرىن ەگجەي- تەگجەيلى ءتۇسىندىردى»، دەپ جازدى وزبەكتساندىق ب ا ق.

دوڭگەلەك ۇستەلگە قاتىسقان عالىمدار مەن ساراپشىلار قازاقستاننىڭ دەموكراتيا جولىنداعى رەفورمالارى، ەل كونستيتۋتسياسىنا ەنگىزىلەتىن وزگەرىستەر مەن تولىقتىرۋلارعا جان- جاقتى توقتالعان. سونداي- اق، «Bilim Karvoni» مەكەمەسىنىڭ باسشىسى ف. توليپوۆ قازاقستان مەن وزبەكستان اراسىنداعى ديپلوماتيالىق قارىم- قاتىناستاردىڭ 30 جىل تولۋىنا وراي، ءوز بايانداماسىندا ەكى ەل اراسىنداعى بارلىق دەڭگەيدە قارقىندى دامىپ كەلە جاتقان اتاپ ءوتتى.

قاراعاندى وبلىستىق فيلورمونياسى بايان-ولگيدە كونسەرت بەرە مە؟ - Kaznews

اپتا سوڭىندا Kaznews پورتالىندا وسىنداي تاقىرىپتاعى اقپارات جاردىق كوردى. موڭعوليانىڭ قازاقستانداعى توتەنشە جانە وكىلەتتى ەلشىسى دورج ءبايارحۇۇ وتانداستار قورىنىڭ پرەزيدەنتى ابزال ساپاربەك ۇلىن جاڭا قىزمەتىمەن قۇتتىقتاي كەلىپ، بىرلەسە جۇمىس ىستەۋگە نيەتتى ەكەنىن ايتتى، دەپ حابارلايدى Kaznews.


اتالعان ب ا ق- تىڭ مالىمەتىنە سۇيەنسەك، تاراپتار ەكى ەلدىڭ اراسىنداعى مادەني- گۋمانيتارلىق بايلانىستى نىعايتۋ بويىنشا پىكىر الماستى. وسى ورايدا قوعام پرەزيدەنتى ابزال ساپاربەك ۇلى بيىل قازاقستان مەن موڭعوليانىڭ ديپلوماتيالىق بايلانىس ورناتقانىنا جانە قازاقتاردىڭ ۇلى كوشىنىڭ 30 جىلدىعىنا وراي ەكى ەل اراسىنداعى ىنتىماقتاستىعىن بەكىتەتىن بىرلەسكەن كونتسەرتتىك شارانى ۇيىمداستىرۋ تۋرالى ۇسىنىس ءبىلدىردى.

«بيىل جازعى ماۋسىمدا قاراعاندى وبلىستىق فيلورمونياسىنىڭ ارتىستەرى بايان-ولگي جەرىنە بارىپ، كونسەنت قويۋ جونىندە ويىن جەتكىزدى. ەلشى ءوز كەزەگىندە بۇل ۇسىنىستى قولدايتىنىن، اتالعان جوسپاردى پىسىقتايتىنىن ايتتى. كەزدەسۋ ناتيجەسىندە ەكى تاراپ تا ەلدەر اراسىنداعى دوستىق بايلانىستى نىعايتۋعا ۋاعدالاستى»، دەپ تۇيىندەيدى Kaznews پورتالى.

سىرتقى ىستەر ءمينيسترىنىڭ ورىنباسارى قازاقستاننىڭ قىتايداعى جاڭادان تاعايىندالعان ەلشىسىمەن كەزدەستى - «حالىق گازەتى»

2022 -جىلى 19-مامىر كۇنى ق ح ر سىرتقى ىستەر ءمينيسترىنىڭ ورىنباسارى لە يۋيچەن قازاقستاننىڭ قىتايداعى جاڭادان تاعايىندالعان ەلشىسى شاحرات نۇرىشەۆپەن كەزدەسىپ، ەكىجاقتى قارىم- قاتىناستار، جوعارى دەڭگەيدەگى الماسۋلار جانە «ءبىر بەلدەۋ، ءبىر جولدى» بىرلەسىپ قۇرۋداعى ىنتىماقتاستىق تۋرالى پىكىر الماستى، - دەپ حابارلايدى «حالىق گازەتى».


قىتايلىق ب ا ق-تىڭ دەرەگىنشە، لە يۋيچەن شاحرات نۇرىشەۆتى قىتايداعى جاڭا قىزمەتىمەن قۇتتىقتادى. سونداي-اق، قىتاي مەن قازاقستان اراسىندا ديپلوماتيالىق قارىم-قاتىناس ورناعان 30 جىلدان بەرى ەكى ەلدىڭ قارىم-قاتىناسى ۋاقىت وتكەن سايىن نىعايىپ، ۇزدىكسىز دامۋعا قول جەتكىزگەنىن، ءتۇرلى سالالارداعى ىنتىماقتاستىقتىڭ جەمىستى ناتيجەلەر بەرگەنىن ايتتى. قىتاي تاراپى ەكى مەملەكەت باسشىلارى قول جەتكىزگەن كونسەنسۋستى ادال ىسكە اسىرۋ جانە قىتاي مەن قازاقستان اراسىنداعى تۇراقتى جان- جاقتى ستراتەگيالىق ارىپتەستىكتى جاڭا دەڭگەيگە كوتەرۋ ءۇشىن قازاقستان تاراپىمەن جۇمىس ىستەۋگە دايىن ەكەنىن جەتكىزدى.

شاحرات نۇرىشەۆ قىتايداعى ەلشى قىزمەتىن قايتا اتقارۋعا كەلگەنىننە قۋاناتىنىن ايتىپ، قىتايدىڭ سوڭعى جىلدارداعى دامۋ جەتىستىكتەرى مەن ءتۇرلى سالالارداعى قازاقستان- قىتاي ىنتىماقتاستىعىنىڭ جەتىستىكتەرىنە جوعارى باعا بەردى.

«ول قازاقستاننىڭ ءارقاشان قازاقستان- قىتاي قارىم- قاتىناستارىن ديپلوماتيانىڭ باستى باعىتىنىڭ ءبىرى رەتىندە قاراستىراتىنىن جانە قىتايمەن جوعارى دەڭگەيدەگى الماسۋلاردى جانداندىرۋ، دامۋ ستراتەگيالارىنىڭ سايكەستىگىن تەرەڭدەتۋ جانە ەكى جاقتىڭ ءوزارا ءتيىمدى ىنتىماقتاستىعىنىڭ جاڭا ناتيجەلەرگە قول جەتكىزۋىن ىلگەرىلەتۋ ءۇشىن جۇمىس ىستەۋگە دايىن ەكەنىن اتاپ ءوتتى»، دەپ جازدى kaz.people.cn.

چاباحار - قازاقستانداعى ساۋدا جانە ترانزيت ءۇشىن بىرەگەي مۇمكىندىك - Parstoday

يراننىڭ وڭتۇستىك- شىعىسىنداعى سيستان جانە بەلۋچيستان پورتتارى مەن تەڭىز باسقارماسىنىڭ باسشىسى ناسەر راۆانباحش سارسەنبى كۇنى قازاقستاننىڭ اقتاۋ پورتىنىڭ باسشىسى اباي تۇرىكپەنبايەۆپەن كەزدەستى. سول كەزدەسۋدە چاباحار پورتىنىڭ ەكى ەل ءۇشىن ستراتەگيالىق ماڭىزى زور ەكەنىن ايتىلدى. بۇل تۋرالى وسى اپتادا يراننىڭ Parstoday اقپارات اگەنتتىگى حابارلاعان بولاتىن.

«چاباحار - بۇل ستراتەگيالىق پورت ارقىلى اشىق سۋلارعا شىعۋ ءۇشىن ت م د ەلدەرىنىڭ، سونىڭ ىشىندە قازاقستاننىڭ ساۋداسى مەن ترانزيتىنىڭ تاپتىرماس مۇمكىندىگى»، دەيدى يراننىڭ وڭتۇستىك- شىعىسىنداعى سيستان جانە بەلۋچيستان پورتتارى مەن تەڭىز باسقارماسىنىڭ باسشىسى. ناسەر راۆانباحشتىڭ مالىمەتىنە سۇيەنسەك، يران- قازاقستان ساۋدا الماسۋىنداعى اقتاۋ جانە قۇرىق پورتتارىنىڭ ماڭىزدىلىعىن جانە چاباحار پورتىنىڭ ستراتەگيالىق جاعدايىن ەسكەرە وتىرىپ، بۇل قۋاتتى ەكى ەل اراسىنداعى تاسىمالداۋ جانە ترانزيتتىك ىنتىماقتاستىقتى دامىتۋ ءۇشىن وڭتايلى پايدالانۋعا بولادى. اقتاۋ پورتىنىڭ باسشىسى اباي تۇرىكپەنبايەۆ تا بۇل كەزدەسۋدە چاباحاردىڭ ازيا ەلدەرى اراسىنداعى بايلانىستى نىعايتۋعا الەۋەتى زور ەكەنىنە توقتالعان.

«سولتۇستىك- وڭتۇستىك ءدالىزىن بەلسەندىرۋ ءۇشىن ترانزيتپەن بايلانىستى ءارتۇرلى سەكتورلار اراسىنداعى ۇيلەستىرۋدى ارتتىرۋ قاجەت»، دەيدى اقتاۋ پورتىنىڭ باسشىسى.

اتالعان باسقوسۋعا قاتىسقان باسقادا رەسمي وكىلدەردىڭ ايتۋىنشا، چاباحارداعى شاحيد بەحەشتي پورتى مۇحيتتاعى كەمەلەردى بايلاۋ مۇمكىندىگىنە يە جانە يراننىڭ ەركىن ەكونوميكالىق ايماقتارىنىڭ ءبىرى بولىپ سانالادى ەكەن.

ايتا كەتەيىك، اقتاۋ پورتىنىڭ باسشىسى تۇرىكپەنبايەۆ باستاعان قازاقستاننىڭ پورت- ەكونوميكالىق دەلەگاتسياسى يراننىڭ تەمىرجول جانە كولىك سالاسىنىڭ وكىلدەرىمەن بىرگە چاباحار پورتىنىڭ ينفراقۇرىلىمىن ارالادى.

قازاقستان قىتايعا ەكسپورتتى ۇلعايتۋدا - «حالىق گازەتى»

قازاقستان مەن قىتاي اراسىنداعى وڭدەلگەن تاۋارلاردىڭ تاۋار اينالىمى 2022 -جىلدىڭ قاڭتار- ناۋرىز ايلارىندا $3,1 ميلليارد قۇرادى، بۇل وتكەن جىلدىڭ سايكەس كەزەڭىمەن سالىستىرعاندا %21,9 عا جوعارى ($2,5 ميلليارد).

بۇل تۋرالى وسى اپتادا قىتايدىڭ «حالىق گازەتى» باسىلىمى حابارلادى.


قىتايلىق ب ا ق-تىڭ جاريالاعان مالىمەتىنە سۇيەنسەك، قازاقستاننان قىتايعا وڭدەلگەن تاۋارلار ەكسپورتى %17,8 عا ءوسىپ، $1 ميلليارد قۇراعان. سونىمەن قاتار، مىس جانە مىستان جاسالعان كاتودتار، وسىمدىك مايلارى، تيتان جانە ودان جاسالعان بۇيىمدار، ءداندى نەمەسە بۇرشاقتى داقىلداردى قايتا وڭدەۋ قالدىقتارى، سيكلدىق كومىرسۋتەكتەر جانە ت. ب. تاۋارلار جەتكىزىلىمدەرى ارتتى. قاڭتار- ناۋرىز ايلارىندا قىتايدان قازاقستانعا وڭدەلگەن تاۋارلار يمپورتى $2,1 ميلليارد قۇراعان.

ايتا كەتەيىك، قازاقستان ق ح ر- دان اۋانى باپتاۋعا ارنالعان قوندىرعىلاردى، ەسەپتەۋ ماشينالارىن، توپىراقتى سۇرىپتاۋعا جانە مايدالاۋعا ارنالعان جابدىقتاردى، كوتەرۋگە، جىلجىتۋعا، تيەۋگە نەمەسە تۇسىرۋگە ارنالعان ماشينالار مەن قۇرىلعىلاردى، ەلەكتر گەنەراتورلىق قوندىرعىلاردى، شينالاردى، تەلەفون اپاراتتارىن جانە ت. ب. يمپورتتايدى.

قىتايلىق ب ا ق- تىڭ دەرەگىنشە، جىلدىڭ العاشقى ءۇش ايىندا قىتايدان قازاقستانعا اياق كيىم جانە شۇلىق بۇيىمدارى، توسەك- ورىن، اسحانا، دارەتحانا جانە اس ءۇي جابدىقتارى، ارنايى ماقساتتاعى ماشينالار مەن مەحانيكالىق قۇرىلعىلار، اۋا نەمەسە ۆاكۋۋمدىق سورعىلار، كومپرەسسورلار مەن جەلدەتكىشتەر جانە ت. ب. تاۋارلاردىڭ يمپورتى تومەندەدى. «قازاقستان مەن قىتاي اراسىنداعى جالپى تاۋار اينالىمى (شيكىزات جانە وڭدەلگەن تاۋارلار) 2022 -جىلعى قاڭتار- ناۋرىزدا $4,7 ميلليارد قۇرادى، بۇل وتكەن جىلدىڭ سايكەس كەزەڭىمەن سالىستىرعاندا %35,6 عا جوعارى ($3,4 ميلليارد)»، دەپ مالىمدەيدى «حالىق گازەتى».


اۆتور: بەيسەن سۇلتان ۇلى


جاڭالىقتار