شىمكەنتتە فۋتبول ماتچى كەزىندە ستاديوننىڭ شاتىرى ۇشىپ، الاڭعا ءتۇستى

نۇر- سۇلتان. قازاقپارات - بۇگىن فۋتبولدان پرەمەر- ليگا كوماندالارى اراسىنداعى ەل بىرىنشىلىگىنىڭ ون ەكىنشى تۋرىندا اۋا رايىنىڭ قولايسىزدىعىنا بايلانىستى ەكى ويىن كەيىنگە شەگەرىلدى، دەپ حابارلايدى قازاقپارات ءتىلشىسى.

تۇركىستاندا كەزدەسۋ باستالۋىنا ساناۋلى مينۋتتار قالعاندا «تۇران» مەن «اقتوبە» اراسىنداعى كەزدەسۋ اۋا رايىنىڭ قولايسىزدىعىنا بايلانىستى كەيىن وتكىزىلەتىن بولدى. سول ۋاقىتتا اتالعان قالادا شاڭدى داۋىل سوعىپ، ويىن وتكىزۋگە مۇمكىندىك بولماعان.

وسىنداي جاعدايعا بايلانىستى شىمكەنتتەگى «ورداباسى» مەن پاۆلودار وبلىسىنىڭ «اقسۋ» كلۋبتارىنىڭ كەزدەسۋى ويىن ورتاسىنان توقتاتىلدى. قاتتى جەل مەن شاڭدى داۋىل سالدارىنان ستاديوننىڭ شاتىرى ۇشىپ كەتىپ، الاڭعا ءتۇستى. بۇل ۋاقىتتا شىمكەنتتىك كلۋب قارسىلاسىنان 1:0 ەسەبىمەن باسىم ءتۇسىپ جاتقان بولاتىن.

قازاقستان فۋتبول فەدەراتسياسى اتالعان ويىنداردىڭ قاشان وتكىزىلەتىنى تۋرالى الداعى ۋاقىتتا شەشىمىن ايتاتىن بولادى.

سونداي- اق، وتكەن تۋرداعى جەڭىسىنەن كەيىن ەلوردالىق «استانا» تۋرنير كەستەسىندە كوش باسىنا شىققان ەدى. بۇل جولى سىرت الاڭدا «اتىراۋمەن» 1:1 ەسەبىنە قاناعات ءبىلدىردى.

ال الماتىلىق «قايرات» ءوز الاڭىندا قاراعاندىنىڭ «شاحتەرىن» 2:0 ەسەبىمەن تىزە بۇكتىردى. وسىلايشا ون ءبىرىنشى تۋرداعى ساتسىزدىگىنەن كەيىن ناتيجە شىعارىپ، جانكۇيەرلەر الدىندا سەنىمدى ويىن كورسەتتى.

بۇگىن، 22 مامىردا « قىزىلجار» (پەتروپاۆل) مەن «اقجايىق» (ورال) ، «توبىل» (قوستاناي) مەن «ماقتارال» (تۇركىستان وبلىسى) ، «كاسپي» (اقتاۋ) مەن «تاراز» كوماندالارى كەزدەسەدى.

ەسكە سالساق، بۇدان بۇرىن فۋتبولدان قازاقستان كۋبوگىنىڭ جەرەبەسى تارتىلدى.