نەلىكتەن ادام جاسى ۇلعايعان سايىن تەز شارشايدى؟

نۇر-سۇلتان. قازاقپارات - كۇندەلىكتى كۇيزەلىستەر، جۇمىستاعى جانە ۇيدەگى پروبلەمالار، زياندى ادەتتەر: بۇل فاكتورلار بىزگە كەز كەلگەن جاستا جاعىمسىز اسەر ەتەدى.

الايدا، ەسەيگەن سايىن ادامنىڭ سىرتقى تىتىركەندىرگىشتەرگە دە، تابيعي جاس ەرەكشەلىگى وزگەرىستەرىنە دە قارسى تۇرۋى قيىنداي تۇسەدى. ۇزاققا دەيىن جىگەرلى بولىپ قالۋ ءۇشىن ءوز ومىرىڭىزگە جاۋاپكەرشىلىكپەن قاراۋدى جانە جاستىقتى سوزاتىن قۇپيالاردى ءبىلۋ ماڭىزدى.

40 جاستان كەيىن اعزادا ەلەۋلى وزگەرىستەر ورىن الادى: گورموندار دەڭگەيى تومەندەيدى، جاسۋشالار مەن ىشكى ورگانداردىڭ قارتايۋى جىلدامدايدى، تەرى ءوز سەرپىمدىلىگىن جوعالتادى. سونداي- اق مەتابوليزم باياۋلايدى، زەيىن قويۋ تومەندەيدى جانە ەستە ساقتاۋ ناشارلايدى. بۇل وگەرىستەر مىنا فاكتورلارعا بايلانىستى:

ميدىڭ تابيعي قارتايۋى

جاس ۇلعايا كەلە قان اينالىم جۇيەسى ناشارلايدى. ول وتتەك جەتىسپەۋشىلىگىنە، سايكەسىنشە، جالپى شارشاڭقىلىققا، ەستە ساقتاۋ مەن زەيىن قويۋدىڭ ناشارلاۋىنا اكەلەدى.

مەتابوليزمنىڭ باياۋلاۋى

تاماق تانۋ ءتارتىبىنىڭ رەتتەلۋىنە جاۋاپ بەرەتىن ارالىق مي ءبولىمى 40 جاستان كەيىن سەزىمتال بولا تۇسەدى. ول زات الماسۋدىڭ باياۋلاۋىن ىنتالاندىرادى جانە ءجيى ارتىق ماي ماسساسىنىڭ پايدا بولۋىنا اكەلەدى.

ەتەككىر ءۇزىلىسى

ايەلدەر 45-50 جاسقا كەلگەندە كليماكستىڭ العاشقى بەلگىلەرىن سەزەدى. انالىق بەزدىڭ قىزمەتتەرى تومەندەيدى جانە ۇيقىسىزدىق پايدا بولادى. كليماكس كەزىندەگى زات الماسۋ پروتسەستەرىنىڭ باياۋلاۋى ارتىق سالماقتىڭ قوسىلۋى مەن حال- جاعدايدىڭ ناشارلاۋىن شاقىرادى.

كوگنيتيۆتى پروتسەستەر

ادام ەسەيگەن سايىن قاناعاتتانۋ سەزىمىنە جاۋاپ بەرەتىن گورموننىڭ — دوفاميننىڭ دەڭگەيى تومەندەيدى. ول كوگنيتيۆتى قىزمەتتەردى، ياعني، زەيىن قويۋ، جاڭا اقپاراتتى جاتتاۋ، سويلەۋدى دامىتۋ قابىلەتتەرىن قامتاماسىز ەتەدى. اعزادا دوفاميننىڭ ازايۋى ۋاقىتتى قابىلداۋدىڭ وزگەرۋىنە ىقپال ەتەدى. سوندىقتان دا ادام ەسەيگەن سايىن وعان ۋاقىت جىلدام ءوتىپ جاتقانداي كورىنەدى.

جىلدام شارشاپ قالاتىنىڭىزدى سەزە باستاساڭىز، نە ىستەۋ كەرەك؟

جوعارىدا ايتىلعان فاكتورلاردىڭ اعزاعا اسەرىن ازايتۋ ءۇشىن ولارعا قارسى تۇرۋدى ۇيرەنۋ ماڭىزدى. ەگەر كۇننەن كۇنگە ەنەرگياڭىز ازايىپ جاتقانداي كورىنسە، ءوز ءومىرىڭىزدى وزگەرتۋدى قولعا الۋ كەرەك.

اعزاڭىزعا نە بولعانىن انىقتاڭىز

اۋىر جۇمىس كۇنىنەن سوڭ نەمەسە سپورت زالداعى جاتتىعۋدان كەيىن ءوزىڭىزدى شارشاڭقى سەزىنۋ قالىپتى جاعداي. ەگەر دەمالىس كۇندەرى دە شارشاڭقىلىق جانە جابىرقاڭقىلىق سەزىمى كەتپەسە، اعزاعا نە بولعانىن انىقتاۋ قاجەت. ۇنەمى شارشاڭقى ءجۇرۋ دەپرەسسيانىڭ، قالقانشا بەزى پروبلەماسىنىڭ، انەميانىڭ جانە باسقا دا اۋرۋلاردىڭ سەبەبى بولۋى مۇمكىن. ونى انىقتاۋ ءۇشىن دارىگەردىڭ كومەگىنە جۇگىنۋ كەرەك.

ۇيقىنىڭ ساپاسىن باقىلاڭىز

ەگەر سوڭعى كەزدەرى زەيىن قويۋ قابىلەتىڭىزدىڭ ناشارلاعانىن بايقاساڭىز، دۇرىس ەمەس نەمەسە جەتكىلىكتى ۇيىقتاماۋىڭىز مۇمكىن. ۇيقىسىزدىق تەك سىرتقى كەلبەتكە جاعىمسىز اسەر ەتىپ قانا قويماي، ەستە ساقتاۋ پروبلەماسىنىڭ پايدا بولۋىن شاقىرۋى مۇمكىن.

كوكەتتىك تىنىس الۋدى مەڭگەرىڭىز

كوكەتتىك دەپ كوكەتتىڭ كەۋدە جانە ءىش بولىگى بەلسەندى جۇمىس ىستەيتىن تىنىس الۋدى ايتادى. بۇل جاعدايدا قوزعالىس ءىش بۇلشىقەتتەرىنىڭ قىسقارۋىنىڭ ارقاسىندا جۇزەگە اسادى. كوكەتتىك تىنىس كەۋدەمەن تىنىس الۋعا قاراعاندا ومىرتقا مەن يىققا قاۋىپ توندىرمەيدى. مۇنداي تاجىريبە قانداعى وتتەك دەڭگەيىن ارتتىرادى، ەنتىگۋمەن كۇرەسۋگە كومەكتەسەدى جانە جۇرەك- قان تامىرلار جۇيەسى جۇمىسىن جاقسارتادى.

ميدى قاجەت ەمەس ويلاردان بوساتۋدى ۇيرەنىڭىز

زاماناۋي ءومىر ىرعاعى ميعا كۇش تۇسىرەدى، ۇرەي مەن تۇككە تۇرعىسىزدىق سەزىمىنىڭ جينالۋىن تۋدىرادى. سانانى قاجەت ەمەس اقپاراتتان جانە جابىسقاق ويلاردان ارىلتۋ ارقىلى ماڭىزدى مىندەتتەرگە ورىن بوساتاسىز. ول ءۇشىن قازىرگى ۋاقىتقا ءمان بەرۋگە تىرىسىپ، وسى شاقتا ءومىر ءسۇرىڭىز. ميعا قاجەت ەمەس اقپارات جينالماس ءۇشىن الەۋمەتتىك جەلىلەردە جانە تەلەديدار الدىندا وتكىزەتىن ۋاقىتتى بارىنشا ازايتىڭىز.

دۇرىس تاماقتانىڭىز

دۇرىس تاماقتانۋ راتسيونى — دەنساۋلىقتى ساقتاۋدىڭ ەڭ دۇرىس ءارى قاراپايىم ءادىسى. ەگەر جاسقا تاۋەلدى بولماي، اركەز ءوزىڭىزدى جاقسى سەزىنگىڭىز كەلسە، كوفە، شاي جانە باسقا دا سەرگىتەتىن سۋسىنداردى ازايتىڭىز. تاتتىلەر مەن فاستفۋدتى پايدالى تىسكەباسارلارعا (سۇزبە، جەمىستەر، جاڭعاقتار) اۋىستىرىڭىز.

massaget.kz