ەنەرگەتيكا ءمينيسترى ماينينگ فەرمالاردى ۇلتتىق ەلەكتر جۇيەسىنەن ءبولىپ تاستاۋدى ۇسىندى
20 مامىر 14:28

ەنەرگەتيكا ءمينيسترى ماينينگ فەرمالاردى ۇلتتىق ەلەكتر جۇيەسىنەن ءبولىپ تاستاۋدى ۇسىندى

نۇر- سۇلتان. قازاقپارات – ق ر ەنەرگەتيكا ءمينيسترى ماينينگ فەرمالاردى ۇلتتىق ەلەكتر جۇيەسىنەن ءبولىپ تاستاۋدى ۇسىندى، دەپ حابارلايدى قازاقپارات ءتىلشىسى.

«بۇل ازىرگە وي- پىكىر دەڭگەيىندە عانا قارالىپ جاتىر. ناقتى شارا بولۋى ءۇشىن زاڭدى تۇردە بەكىتۋ كەرەك. زاڭنىڭ وزىنەن باستاپ، زاڭنان تۋىندايتىن ەرەجەلەرگە تۇزەتۋلەر ەنگىزىلۋى كەرەك. سەبەبى ماينينگتىڭ قۇنى وسەتىن بولسا، ەلەكتر قۋاتىنىڭ تاپشىلىعى تۋىنداۋى مۇمكىن. ونى بولدىرماۋ ءۇشىن الدىن الا شارا ەنگىزۋىمىز قاجەت. ءبىزدىڭ ويىمىز، بىرىنشىدەن، ماينينگ نارىعى سىرتتان كەلەتىن يمپورتتىق ەلەكتر قۋاتىن تۇتىنۋشى دەپ تانىلۋى كەرەك»، - دەگەن مينيستر نۇر- سۇلتان قالاسىنىڭ تۇرعىندارىمەن كەزدەسۋىنەن كەيىن ب ا ق وكىلدەرىنە بەرگەن مالىمەتىندە.


ايتۋىنشا، بولاشاقتا ماينينگ كاسىپورىندارى ۇلتتىق ەلەكتر جۇيەسىنەن تىسقارى ستانسالار قۇرىپ، سول ارقىلى ەلەكتر تۇتىنا الۋى مۇمكىن.

«سونداي- اق، بالامالى ەنەرگيانىڭ قۇنى دا ءبىراز قىمبات. ونى دا ماينينگ سالاسىنىڭ كاسىپورىندارى تۇتىنادى دەپ ەنگىزۋگە بولادى. ماينينگپەن اينالىساتىن كاسىپكەرلەر ءوز اتىنان، ءوز اقشاسىمەن ستانسا قۇراتىن بولسا جانە بۇل ستانسا ۇلتتىق ەلەكتر جۇيەسىنە كىرمەي، وزدەرى تۇتىنۋشى رەتىندە الاتىن بولسا، وعان ەشقانداي تىيىم جوق. ونى دا جاساۋعا بولادى. وسىنداي جولمەن، باعىتتارمەن شەشۋگە بولادى دەپ ويلايمىز»، - دەدى بولات اقشولاقوۆ.

بۇعان دەيىن ق ر ۇلتتىق ەكونوميكا ءمينيسترىنىڭ ورىنباسارى ازامات ءامرين ماينينگ سالىعىن كوبەيتۋدى كوزدەيتىن زاڭ جوباسى كەلەسى ايدا دايىن بولاتىنىن ايتقان ەدى.

اۆتور: ەسىمجان ناقتىباي


جاڭالىقتار