ۇلتتىق قۇندىلىقتاردى دامىتۋعا باعىتتالعان قارجى كولەمىن ارتتىرۋ كەرەك – سەناتور
20 مامىر 12:02

ۇلتتىق قۇندىلىقتاردى دامىتۋعا باعىتتالعان قارجى كولەمىن ارتتىرۋ كەرەك – سەناتور

نۇر- سۇلتان. قازاقپارات - جاستاردى باسپانامەن قامتۋعا ارنالعان باعدارلامالاردى ەلىمىزدىڭ بارلىق وڭىرىندە جۇزەگە اسىرۋ كەرەك. بۇل تۋرالى سەناتتاعى جاستاردى قولداۋ تاقىرىبىنا ارنالعان پارلامەنتتىك تىڭداۋدا دەپۋتات نۇرتورە ءجۇسىپ ايتتى، دەپ حابارلايدى قازاقپارات ءتىلشىسى.

«ەلدە «7-20-25»، «5-10-15» جانە باسقا ءبىرقاتار تۇرعىن ءۇي باعدارلاماسى بار. ءبىراق جاستاردىڭ باسپاناعى قولى جەتە بەرمەيدى. بىرىنشىدەن، جاستاردىڭ العاشقى جارنا تولەۋ قابىلەتى تومەن. ەكىنشىدەن، پايىزدىق مولشەرلەمە وتە جوعارى. وسىنى تومەندەتۋگە نەگە بولمايدى؟ الماتى، نۇر- سۇلتان جانە شىمكەنت قالالارىندا قولعا الىنعان جاستاردىڭ ءۇي الۋ باعدارلاماسىن وزگە وڭىرلەرگە دە قولدانعان دۇرىس دەپ ەسەپتەيمىن»، - ن. ءجۇسىپ.

سونداي- اق سەناتور ءوز سوزىندە جاستاردى مادەني- ادامگەرشىلىككە تاربيەلەۋ ماسەلەسىنە ەرەكشە توقتالدى. ول پارلامەنتتىك تىڭداۋلار بارىسىندا ايتىلعان ۇسىنىستار مەن ۇسىنىمدار ۇكىمەت تاراپىنان قابىلداناتىنىنا سەنىم ءبىلدىردى.

«مادەنيەت، ونەر، اقپارات سالالارى وسى ۋاقىتقا دەيىن قالدىق قاعيداتىمەن قارجىلاندىرىلىپ كەلدى. ءبىز ادامنىڭ جانىن بايىتاتىن وسى سالالارعا قارجى بولۋگە كەلگەن كەزدە تىزگىندى تارتىپ قالامىز دا، ونىڭ اقىرى نەگە اكەپ سوققان ەندى كورىپ وتىرمىز. ەلدى بۇتىندەۋگە اقشا سالماي، بۇلىنگەندى جوندەۋگە قاراجات جۇمساپ وتىرمىز عوي. ىشكى جالپى ءونىمنىڭ 3 پايىزىن ۇلتتىق قۇندىلىقتاردى دامىتۋعا سالساق، قاسىرەتكە ۇرىنباي، قاسيەتىمىز ارتار ەدى دەگەن پىكىردەمىن»، - دەدى دەپۋتات.

بۇدان بۇرىن حابارلانعانداي، سەنات ءتوراعاسى م. اشىمبايەۆ بارلىق رەفورمانىڭ تۇپكى ماقساتى دا جاستاردىڭ ءال- اۋقاتىن ارتتىرۋعا ءارى ولاردىڭ دامۋىنا جاعداي جاساۋعا ارنالعانىن اتاپ ءوتتى. سونىمەن قاتار ول ۋنيۆەرسيتەت بىتىرگەن تۇلەكتەرگە ەڭبەك نارىعىندا سۇرانىس جوق ەكەنىن ايتتى.

اۆتور: رۋسلان عابباسوۆ


جاڭالىقتار