رەفەرەندۋمدا كەلەر ۇرپاقتىڭ دا تاعدىرىنا اسەر ەتەتىن كەلەلى شەشىمدەر قابىلدانادى - دوسايەۆ
بۇل تۋرالى الماتى اكىمى ەربولات دوسايەۆ ناۋرىزباي اۋدانى تۇرعىندارىمەن كەزدەسۋ بارىسىندا ايتتى، دەپ حابارلايدى قازاقپارات ءتىلشىسى.
الماتى اكىمىنىڭ ايتۋىنشا، رەفەرەندۋم دەگەنىمىز - زايىرلى، قۇقىقتىق مەملەكەت ءۇشىن ماڭىزدى وزگەرىستەردى حالىقپەن كەڭەسە وتىرىپ شەشۋ.
«وسىناۋ بۇكىلحالىقتىق رەفەرەندۋمدا ەلىمىزدىڭ كونستيتۋتسياسىنا ەنگىزىلەتىن ىرگەلى وزگەرىستەر مەن تولىقتىرۋلار داۋىسقا سالىنباق. كونستيتۋتسيا - ەل ءومىرىنىڭ بارلىق سالاسىن قامتىپ، مەملەكەتتىلىكتىڭ نەگىزىن، قوعامدىق قاتىناستاردىڭ وزەگىن رەتتەيتىن باستى زاڭ، ەرەكشە ۇستىن بولعاندىقتان، وعان ەنگىزىلەتىن وزگەرىستەردى كوپ بولىپ تالقىلاۋ، كەڭەسە وتىرىپ ورتاق شەشىم قابىلداۋ - ايرىقشا ماڭىزدى»، - دەدى قالا اكىمى.
سونداي-اق، ەربولات دوسايەۆ بۇل رەفەرەندۋمنان ەلىمىزدىڭ ەشبىر ازاماتى قالىس قالماۋى كەرەك ەكەنىن اتاپ ءوتتى.
«مۇندا حالىقتىڭ بۇگىنگى ءومىرى عانا ەمەس، ەرتەڭگى ۇرپاق، كەلەر بۋىننىڭ دا تاعدىرىنا تىكەلەي اسەر ەتەتىن كەلەلى شەشىمدەر قابىلدانباق. ەلىمىزدىڭ بولاشاعىنا، قوعام ومىرىنە بەيجاي قارامايتىن بارشا ازامات، قالامىزدىڭ تۇرعىندارى وسىناۋ ماڭىزدى شاراعا ءبىر كىسىدەي اتسالىسىپ، ءوز تاڭداۋىن جاسايدى دەپ سەنەمىن. ويتكەنى، بۇل - ازاماتتىق ۇستانىمىمىزدىڭ كورسەتكىشى، ەلدىگىمىزگە سىن. ەندەشە، ءارقايسىمىز مەجەلى كۇنى اتالعان شارانىڭ باسىنان تابىلايىق»، - دەدى ەربولات دوسايەۆ الماتىلىقتاردىڭ الدىندا.