مەملەكەت باسشىسى بيزنەسمەندەردى جاڭا قازاقستاندى بىرگە قۇرۋعا شاقىردى
«كاسىپكەرلەر تاراپىنان مەملەكەت ساياساتىنىڭ بولجاپ ءبىلۋ مۇمكىن ەمەستىگى جانە ۇنەمى وزگەرىپ تۇراتىنى تۋرالى ورىندى سىن ءجيى ايتىلادى. وتكەن جولعى كەزدەسۋدە مەن جاڭا ەكونوميكالىق ساياسات ازىرلەۋدى تاپسىرعانمىن. بۇل جۇمىس تابىستى ءجۇرىپ جاتىر دەۋگە كەلمەيدى. تىڭ ويلاردىڭ تاپشىلىعىن بايقاپ وتىرمىز. مۇنىڭ داعدارىسقا قارسى شارالارعا دا قاتىسى بار. بلوگوسفەرادا بەلسەندى بولىپ، سىني ەسكەرتۋلەر ايتىپ جۇرگەن كاسىپكەرلەر مەن ەكونوميستەردى شاقىرىپ، ۇكىمەت جانىنان جۇمىس توبىن قۇرۋدى تاپسىردىم. ءبىراق ونداي ادامدار دا ۇزاققا بارمادى. ماعان جەتكەن مالىمەت بويىنشا، ولار دا ناقتى ۇسىنىستار مەن يدەياعا كەلگەن كەزدە قينالىپ قالعان. دەگەنمەن ۇكىمەت پەن پرەزيدەنت اكىمشىلىگىنەن ماكرو، سالىق، بيۋجەت، اقشا-كرەديت سياقتى ەكونوميكانىڭ بارلىق ءتۇرىن قامتيتىن دوكترينالىق قۇجات كۇتەمىن»، - دەدى مەملەكەت باسشىسى اقوردادا وتكەن كەزدەسۋدە.
پرەزيدەنت رەفورمالار جونىندەگى جوعارى ەكونوميكالىق كەڭەستىڭ وتىرىسىندا ۇيىم جۇمىسىن كۇشەيتۋ تۋرالى تاپسىرما بەرگەنىن ەسكە سالدى.
«بۇل جۇمىستى بيزنەستىڭ كونسترۋكتيۆتى قاتىسۋى ارقىلى جۇرگىزگەن ءجون. ويتكەنى سوندا عانا قاجەتتى ءارى ءتيىمدى رەفورما جاساي الامىز. وسىندا وتىرعانداردىڭ بارىنە ايتامىن: «جاڭا قازاقستاندى بىرگە قۇرايىق» دەگەن ۇران - بوس ءسوز ەمەس. كاسىپكەرلەردىڭ، ەكونوميكاداعى ناقتى سەكتور وكىلدەرىنىڭ بۇل ىسكە قاتىسۋى وتە ماڭىزدى»، - دەدى قاسىم-جومارت توقايەۆ.
پرەزيدەنتتىڭ ايتۋىنشا، سالىق ساياساتى مەن ونى اكىمشىلەندىرۋ ىسىنە ەرەكشە نازار اۋدارۋ قاجەت.
«بۇل سالادا بۇگىندە بەلگىلى ءبىر تەڭگەرىمسىزدىك بايقالادى. مىسالى، كەيبىر ءىرى كومپانيالار قولدانىستا سالىق رەجيمى بويىنشا شاعىن كاسىپورىندار دەڭگەيىندە سالىق تولەپ، قۋلىعىن اسىرىپ ءجۇر. ناقتى كوزدەلگەن ىنتالاندىرۋ شارالارىنىڭ ورنىنا تۇتاس بيزنەس توپتارى مەن قىزمەت تۇرلەرىن سالىقتان بوساتۋ مانيپۋلياتسيا قۇرالىنا اينالىپ وتىر. بيۋجەتتى قارجىدان ايىرىپ قانا قويماي، قوعامنىڭ جىككە بولىنۋىنە اكەلەتىن، ۇلتتىق يگىلىكتەردى ۇلەستىرۋدەگى ادىلدىكتى تومەندەتەتىن قايشىلىقتاردى رەتتەۋ جولدارىن ويلاستىرۋ قاجەت. مەملەكەت پەن بيزنەس بۇل ماسەلە بويىنشا ءبىر توقتامعا كەلگەننەن كەيىن سالىق زاڭناماسىن تۇراقتاندىرىپ، كەزدەيسوق وزگەرىستەر تاجىريبەسىن توقتاتۋ قاجەت. ۇكىمەتكە بيزنەس-قاۋىمداستىقپەن بىرلەسىپ، سالىق ساياساتىنىڭ ۇزاق مەرزىمدى تۇجىرىمداماسىن ازىرلەۋدى تاپسىرامىن. قۇجاتتا ەلدەگى سالىق سالۋدىڭ نەگىزگى تاسىلدەرى كورىنىس تابۋعا ءتيىس. سالىق ساياساتىنىڭ نەگىزگى ولشەمشارتتارى تۇراقتى بولۋى كەرەك. تسيفرلاندىرۋ ەسەبىنەن سالىق تولەۋ پروتسەستەرىن وڭايلاتۋعا، ادامي فاكتوردى الىپ تاستاي وتىرىپ، اكىمشىلەندىرۋگە ەرەكشە نازار اۋدارۋ كەرەك. بۇل جۇمىستى بۇگىنگى جانە بولاشاق احۋالعا، ۇلتتىق مىندەتتەرگە سۇيەنە وتىرىپ، مۇقيات جۇرگىزۋ كەرەك. كەلەسى جىلدىڭ باسىندا ۇكىمەتتەن سالماقتى ۇسىنىستار كۇتەمىن»، - دەدى مەملەكەت باسشىسى.
ايتا كەتەيىك، قاسىم-جومارت توقايەۆ بۇگىن اقوردادا وتاندىق بيزنەس وكىلدەرىمەن كەزدەستى.