داعدارىستان شىعىنسىز شىعۋ كەرەك، سانكسيالاردى دا ەسكەرگەن ءجون - پرەزيدەنت
19 مامىر 20:41

داعدارىستان شىعىنسىز شىعۋ كەرەك، سانكسيالاردى دا ەسكەرگەن ءجون - پرەزيدەنت

نۇر-سۇلتان. قازاقپارات - ق ر پرەزيدەنتى قاسىم-جومارت توقايەۆ وتاندىق بيزنەس وكىلدەرىمەن كەزدەسۋىندە شەت ەلدەردەن ينۆەستيتسيا تارتۋ تۋرالى پىكىر ءبىلدىردى، دەپ حابارلايدى قازاقپارات ءتىلشىسى.

«باسەكەگە قابىلەتتى تاۋار نارىقتارىنىڭ شامادان تىس باعالىق رەتتەلۋى ەلدى جەكە ينۆەستيتسيالاردان ايىرادى. ناتيجەسىندە مەملەكەت وسىنداي سالالارعا ينۆەستيتسيا سالۋعا ءماجبۇر، ءسويتىپ بيزنەستەگى ءىسى بۇلىڭعىر، يكەمسىز وپەراتورلاردىڭ سانىن ارتتىرادى. وتە مۇقيات بولۋ كەرەك جانە نارىقتىق ەكونوميكانىڭ نەگىزگى پرينتسيپتەرىنەن اۋىتقىماۋ قاجەت. بۇل تاۋار نارىقتارىنا دا، تابيعي مونوپوليالار قىزمەتتەرىنىڭ تاريفتەرىنە دە قاتىستى»، - دەدى مەملەكەت باسشىسى.

پرەزيدەنت ينۆەستيتسيالىق احۋال تۋرالى ايتىپ، وسىنداي كۇردەلى جاعدايلاردىڭ وزىندە دە ەۋرووداقتان، اقش- تان، قىتايدان، تەك قارجىلىق قانا ەمەس، كەڭ تەحنولوگيالىق قۇزىرەتتەرى بار باسقا دا ەلدەردەن ينۆەستيتسيالار كولەمىن ساقتاۋ جانە ۇلعايتۋ ءۇشىن بار كۇش-جىگەردى جۇمسايتىنىن اتاپ ءوتتى.

«باۋىرلاس تۇركيا مەن ورتالىق ازيا ەلدەرى ماڭىزدى ساۋدا-ينۆەستيتسيالىق سەرىكتەستەرگە اينالىپ كەلەدى. جولعا قويىلعان بايلانىستار مەن تىزبەكتەردى ساقتاي وتىرىپ، قازىرگى داعدارىستان شىعىنسىز شىعۋ كەرەك. بۇل جۇمىستى جانداندىرۋ قاجەت، ءبىراق ارينە سانكتسيالار كونتەكستىن دە ەسكەرگەن ءجون»، - دەدى ق. توقايەۆ.


جاڭالىقتار