سوتتىڭ اشىقتىعى مەن ادىلدىگىن قامتاماسىز ەتۋ - ماڭىزدى باسىمدىق - پرەزيدەنت
19 مامىر 19:09

سوتتىڭ اشىقتىعى مەن ادىلدىگىن قامتاماسىز ەتۋ - ماڭىزدى باسىمدىق - پرەزيدەنت

نۇر-سۇلتان. قازاقپارات - سوت جۇيەسىندە سۋديالاردى ىرىكتەۋ ماسەلەسىنەن باستاپ، تورەلىك پرينتسيپتەرىن رەتتەۋگە قاتىستى ءبىرقاتار رەفورمالار قاجەت.

بۇل تۋرالى مەملەكەت باسشىسى قاسىم- جومارت توقايەۆ وتاندىق بيزنەس وكىلدەرىمەن كەزدەسۋىندە ايتتى، دەپ حابارلايدى قازاقپارات.

«ءبىرىنشى كەزەكتە - كادر ماسەلەسى، ويتكەنى سۋديالاردى ىرىكتەۋ پرينتسيپتەرىن جەتىلدىرمەيىنشە، بۇل باعىتتا جۇمسالعان كۇش تۇگەل ءتيىمسىز بولىپ قالا بەرەدى. قازىر سوت جۇيەسىندە ەكى مىڭنان استام سۋديا قىزمەت ەتەدى. جىل باسىنان بەرى سوت جۇيەسىنەن ەمەس، وزگە سالالاردان كەلگەن 50 پراكتيك- زاڭگەر سۋديا بولدى. ىلگەرىلەۋ بار، ءبىراق بۇل - جەتكىلىكسىز. جۇمىستى بارىنشا كۇشەيتۋ قاجەت»، - دەدى پرەزيدەنت.

مەملەكەت باسشىسى ەكىنشى ماڭىزدى اسپەكت رەتىندە سوت تورەلىگىنىڭ پرينتسيپتەرى تۋرالى ايتتى.

جەكەمەنشىك پەن مۇددەنىڭ سوتتا قورعالۋ كەپىلدىگى - ەكونوميكانى دامىتۋ مەن ينۆەستيتسيا تارتۋدىڭ، ياعني ەلدىڭ جالپى العا جىلجۋىن قامتاماسىز ەتۋدىڭ بازالىق شارتى ەكەنىنە توقتالدى.

«قازاقستاندا مەملەكەتتىك جانە جەكەمەنشىك قاتار مويىندالادى، تەڭ دارەجەدە قورعالادى. بۇل - كونستيتۋتسيادا بەكىتىلگەن قاعيدا. الايدا، بىزدە ءىس جۇزىندە جەكەلەگەن مەملەكەتتىك ورگانداردىڭ مۇددەسىن قورعاۋعا باسىمدىق بەرىلىپ كەتەدى. ولار مەملەكەتتىڭ مۇددەسى رەتىندە جاڭساق قابىلدانادى. اكىمشىلىك ادىلەتتى ەنگىزۋ ارقىلى ءبىز بۇل ۇردىسكە توسقاۋىل قويا الدىق، ءبىراق جۇمىس ءالى دە كوپ»، - دەدى مەملەكەت باسشىسى.

پرەزيدەنت سوت تورەلىگىندە ادىلدىك پەن بەيتاراپتىقتان باسقا پرينتسيپ بولۋى مۇمكىن ەمەستىگىن ايتتى.

«سوت جۇيەسىن رەفورمالاۋدىڭ ۋاقىتى كەلدى. ءبىز بۇل قاجەتتىلىك تۋرالى شەتەلدىك ينۆەستورلاردان دا، ءوز كاسىپكەرلەرىمىز بەن وتانداستارىمىزدان دا ەستىپ ءجۇرمىز. سوندىقتان، جۋىق ارادا وسى باعىتتا ناقتى ءارى اۋقىمدى شارالاردى جاريا ەتەمىن»، - دەدى قاسىم-جومارت توقايەۆ.

جاڭالىقتار