رەفەرەندۋمدا ءار ازاماتتىڭ داۋىسى ماڭىزدى - پرەزيدەنت

نۇر-سۇلتان. قازاقپارات – ق ر پرەزيدەنتى قاسىم-جومارت توقايەۆ وتاندىق بيزنەس وكىلدەرىمەن كەزدەسۋىندە 5- ماۋسىم كۇنى وتەتىن رەسپۋبليكالىق رەفەرندۋمنىڭ ماڭىزىنا توقتالدى، دەپ حابارلايدى قازاقپارات ءتىلشىسى.

«5- ماۋسىمدا رەسپۋبليكالىق رەفەرەندۋم وتەدى. اتا زاڭىمىزعا وزگەرىستەر ەنگىزىلەدى. حالقىمىز وسىنداي بەتبۇرىستى كەزەڭدە ەل بولاشاعىن ايقىنداۋعا تىكەلەي اتسالىساتىن بولادى. جاۋاپتى ساتتە ءار ازاماتىمىزدىڭ داۋىسى ايرىقشا ءرول اتقارادى»، - دەدى مەملەكەت باسشىسى.

سونداي-اق، پرەزيدەنت بيزنەس وكىلدەرىمەن 4 اي بۇرىن بولعان كەزدەسۋگە توقتالدى.

«وتكەن جولعى باس قوسۋدا ءوزارا پىكىر الماسىپ، جاڭا ۇستانىمداردى ايقىندادىق. بىرلەسە جۇمىس ىستەۋدىڭ جولدارىن ناقتىلادىق. مەن ءبىرقاتار تاپسىرما بەردىم. ءتورت اي دەگەن اسا كوپ ۋاقىت ەمەس. ءبىراق، وسى ارالىقتا ەل ىشىندە جانە الەمدە تالاي نارسە وزگەردى. جاڭا قازاقستاندى قۇرۋعا كىرىستىك»، - دەدى قاسىم-جومارت توقايەۆ.

ايتا كەتەيىك، اقوردادا قاسىم-جومارت توقايەۆ وتاندىق بيزنەس وكىلدەرىمەن كەزدەسىپ جاتىر.