ەلباسىنىڭ وتباسىن ءومىر بويى ەل سالىعىنا اسىراۋ ماسەلەسى رەفەرەندۋمعا شىعارىلاما
بۇل جالعان، دەپ حابارلايدى قازاقپارات Stopfake.kz رەسۋرسىنا سىلتەمە جاساپ.
ق ر ادىلەت مينيسترلىگى بۇل مالىمەتتى جوققا شىعاردى.
ۆەدومستۆونىڭ حابارلاۋىنشا، تۇڭعىش پرەزيدەنت مارتەبەسىنە قاتىستى كونستيتۋتسياعا ەنگىزىلەتىن تۇزەتۋلەرگە سايكەس ءۇش نورما وزگەرەدى.
ءبىرىنشى. 42-باپتىڭ 5-تارماعىنىڭ ەكىنشى بولىگى الىپ تاستالادى، وعان سايكەس ءبىر ادام قاتارىنان ەكى رەتتەن ارتىق رەسپۋبليكا پرەزيدەنتى بولىپ سايلانا المايدى. بۇل شەكتەۋ قازاقستان رەسپۋبليكاسىنىڭ تۇڭعىش پرەزيدەنتىنە قولدانىلمايدى.
ەكىنشى. 46-باپتىڭ 4-تارماعى الىپ تاستالادى. وندا تۇڭعىش پرەزيدەنتتىڭ مارتەبەسى مەن وكىلەتتىكتەرى رەسپۋبليكا كونستيتۋتسياسىمەن جانە كونستيتۋتسيالىق زاڭمەن ايقىندالاتىنى جازىلعان. قازىرگى ۋاقىتتا تۇڭعىش پرەزيدەنتتىڭ قۇقىقتىق مارتەبەسى «قازاقستان رەسپۋبليكاسىنىڭ تۇڭعىش پرەزيدەنتى - ەلباسى تۋرالى» جەكە كونستيتۋتسيالىق زاڭمەن رەتتەلەدى.
تۇڭعىش پرەزيدەنتكە جانە ونىمەن بىرگە تۇراتىن وتباسى مۇشەلەرىنە جەكە مەنشىك قۇقىعىمەن تيەسىلى مۇلىككە قول سۇعىلماۋشىلىق اتالعان كونستيتۋتسيالىق زاڭدا بەلگىلەنگەن.
ءوز كەزەگىندە، اتالعان نورما كونستيتۋتسيادان الىپ تاستالعان جاعدايدا، قازاقستان رەسپۋبليكاسىنىڭ زاڭناماسىن كونستيتۋتسيا نورمالارىنا سايكەس كەلتىرۋ ءۇشىن وسى زاڭدى جويۋ قاجەت بولادى.
ءۇشىنشى. تۇڭعىش پرەزيدەنتتىڭ اتالۋى كونستيتۋتسيانىڭ 91-بابىنىڭ 2-تارماعىنان الىپ تاستالادى. كونستيتۋتسيانىڭ 91-بابىنىڭ 2-تارماعىنا سايكەس كونستيتۋتسيادا بەلگىلەنگەن مەملەكەتتىڭ تاۋەلسىزدىگى، رەسپۋبليكانىڭ بىرتۇتاستىعى مەن اۋماقتىق تۇتاستىعى، ونى باسقارۋ نىسانى، سونداي-اق تاۋەلسىز قازاقستاننىڭ نەگىزىن سالۋشى، قازاقستان رەسپۋبليكاسىنىڭ تۇڭعىش پرەزيدەنتى - ەلباسى ىرگەسىن قالاعان رەسپۋبليكا قىزمەتىنىڭ تۇبەگەيلى پرينتسيپتەرى جانە قازاقستان رەسپۋبليكاسىنىڭ تۇڭعىش پرەزيدەنتى - ەلباسىنىڭ مارتەبەسى وزگەرمەيدى.
تۇڭعىش پرەزيدەنت مارتەبەسىنە قاتىستى اتالعان ەرەجەلەردى الىپ تاستاۋ ۇسىنىلدى.
جوعارىدا ايتىلعانداردى قورىتىندىلاي كەلە، كونستيتۋتسياعا ەنگىزىلەتىن تۇزەتۋلەر جوباسى قازاقستان رەسپۋبليكاسىنىڭ تۇڭعىش پرەزيدەنتىنە جانە ونىڭ وتباسىنا جاڭا كەپىلدىكتەر بەرۋدى كوزدەمەيدى.
كەرىسىنشە، كونستيتۋتسياعا وزگەرىستەر ەنگىزۋ تۋرالى زاڭ جوباسىندا تۇڭعىش پرەزيدەنت مارتەبەسىنە قاتىستى بارلىق نورمالاردى الىپ تاستاۋ ۇسىنىلدى.
دەمەك، نۇرسۇلتان نازاربايەۆتىڭ بۇكىل وتباسى مۇشەلەرىن سالىق ەسەبىنەن ۇستاۋعا كەپىلدىك بەرەتىن تۇزەتۋلەر رەفەرەندۋمعا شىعارىلاتىنى تۋرالى اقپارات - فەيك.