ءوز ونەرتابىسىنىڭ قۇربانى بولعان عالىمدار
ولارسىز ءبىزدىڭ بۇگىنگى الەم باسقاشا بولار ما ەدى؟ ال، ونەرتاپقىش بولۋ وڭاي جانە قاۋىپسىز جۇمىس ەمەس، ويتكەنى ونەرتاپقىش الدىمەن ءوز ونەرتابىسنىڭ «ءدامىن» ءوزى تاتىپ كورۋى نەمەسە ونى باسقا بىرەۋدە سىناپ كورۋى كەرەك. كەيدە مۇنىڭ سوڭى قايعىلى اياقتالىپ جاتادى. قىسقاشا ايتقاندا، ونەرتابىس قۇرباندىقسىز بولمايدى. ماسساگەت پورتالى ءوز ونەرتابىسىنىڭ قۇربانى بولعان ءبىرقاتار عالىمدى ءتىزىپ شىقتى.
گەنري فليۋكس - وتتەگى اپپاراتى
1876- جىلى اعىلشىن گەنري فليۋكس تۇيىق كونتۋرلى وتتەگى اپپاراتىن ويلاپ تاپتى. كوستيۋمدەگى اۋانىڭ ورنىنا سىعىلعان وتتەگى پايدالانىلدى. باستاپقىدا بۇل ونەرتابىس سۋعا باتقان كەمەدەگى تەمىر ەسىكتەردى جوندەۋ ءۇشىن قولدانىلادى دەپ جوسپارلانعان. الايدا كەيىنىرەك فليۋكس ونى 10 مەتر تەرەڭدىكتە سۇڭگۋ ءۇشىن پايدالانۋعا شەشىم قابىلدادى. وكىنىشكە قاراي، ول - سۋ استىنداعى جۇمىستاردى ورىنداۋ ءۇشىن تەڭىزگە تۇسىرىلگەن ارنايى كامەراداعى قىسىم - كەسسوننان قايتىس بولدى.
فرانتس رەيحەلت - پاراشيۋت
رەيحەلتتىڭ ونەرتابىسى تاريحتا «پلاش-پاراشيۋت» دەگەن اتپەن قالدى
ول 1910-جىلدىڭ شىلدەسىندە ۇشقىش ۇشاقتا اقاۋ بولعان كەزدە سەكىرىپ، امان قالۋعا مۇمكىندىك بەرەتىن كوستيۋم قۇراستىرا باستادى. مانەكەندەرمەن بىرنەشە تاجىريبەلەر ءساتتى بولعان سياقتى كورىندى، ءبىراق ناتيجە تۇراقتى ەمەس ەدى. رەيحەلت مۇنىڭ سەبەبىن بەسىنشى قاباتتاعى بالكوننىڭ بيىكتىگى تومەن دەپ ەسەپتەدى. 1912-جىلى بىرنەشە رەت پەتيتسيالاردان كەيىن ول ەيفەل مۇناراسىندا تاجىريبە جاساۋعا بيلىكتەن رۇقسات الدى.
سول جىلى 4- اقپاندا ول ەكسپەريمەنت جۇرگىزەتىنىن ايتىپ جارياعا جار سالدى. جينالعاندار ونىڭ مانيكەندى قولدانباي، ءوزى سەكىرەتىنىن ەستىگەندە شوشىپ كەتتى.
فرانتس رەيحەلت دوستارى مەن ادامدار بۇل يدەيادان قايتارۋعا تىرىسقانىمەن ول ەيفەل مۇناراسىنان پاراشيۋتپەن سەكىردى. پاراشيۋت اشىلماي، 60 مەتر بيىكتىكتەن قۇلاعان ونەرتاپقىش قايتىس بولدى.
ۋيليام بۋللوك - باسپا ماشيناسى
امەريكالىق ونەرتاپقىش ۋيليام بۋللوكتىڭ جاڭا باسپا ستانوگىن ويلاپ تابۋى ونىڭ جىلدامدىعى مەن تيىمدىلىگى پوليگرافيا سالاسىن تۇبەگەيلى وزگەرتتى. ءبىر كۇنى ابايسىزدا اياعى تايىپ، قۇرىلعىعا كىرىپ كەتكەن بۋللوك اياعىن قاتتى جاراقاتتاپ الادى. بىرنەشە كۇننەن كەيىن جاراقات گانگرەناعا اينالىپ، ال 1867-جىلى 12- ساۋىردە ونەرتاپقىش ۋيليام باللوك پيتتسبۋرگتەگى اۋرۋحانادا اياعىن امپۋتاتسيالاۋ وتاسى كەزىندە قايتىس بولدى.
حوراس لوۋسون حانلي - سۇڭگۋىر قايىق
1863-جىلى 15- قازاندا 40 جاستاعى كونفەدەرات حوراس لوۋسون ءوزى ويلاپ تاپقان سۇڭگۋىر قايىعىن سىناۋ كەزىندە قايتىس بولدى. چارلستون شىعاناعىنىڭ تۇبىندە سۋعا باتقان كەمە سۋ بەتىنە قايتىپ شىقپادى.
جانا-فرانسۋا پيلاتر دە روزە - اۋە شارى
جانا-فرانسۋا پيلاتر دە روزە - فرانسۋز فيزيگى، حيميگى. ءبىرىنشىسى (ماركيز د'ارلاندپەن بىرگە) اۋە شارىندا ۇشقان ادام.
جاس كەزىندە ماتەماتيكا، فيزيكا، حيميا، جاراتىلىستانۋ پاندەرىن وقىپ، كەيىن حيميادان ساباق بەردى. پاريجدىك «اتەنەي» عىلىمي قوعامىنىڭ نەگىزىن سالدى.
1783-جىلى 21- قاراشادا ديامەترى 48 فۋت (15,5 م) جانە بيىكتىگى 74 فۋت (24 م) شاردا، روزە ماركيز د'ارلاندپەن بىرگە ايتارلىقتاي بيىكتىككە كوتەرىلدى. 1785-جىلى 15- ماۋسىمدا ول لا-مانش بۇعازىن اۋە شارىمەن كەسىپ وتپەك بولعان كەزىندە شار ورتەنىپ، روزە سەرىگى رومەنمەن بىرگە قايتىس بولدى.
يسمايل يبن حاماد ءال دجاۋحاري - اعاش قاناتتار
ايگىلى اراب سوزدىگىنىڭ اۆتورى يسمايل يبن حاماد ءال-دجاۋحاري ءوزى جاساعان اعاش قانات پەن ارقان ارقىلى نيشاپۋرداعى مەشىتتىڭ توبەسىنەن ۇشپاق بولعان. 1002-جىلدارى بۇل ءساتسىز ارەكەتتىڭ ناتيجەسىندە قايتىس بولدى.