كوپبالالى وتباسى بالالارى جازعى لاگەرگە تەگىن جولدامانى قالاي الادى
بۇل ساۋالعا ب ع م بالالاردىڭ قۇقىعىن قورعاۋ كوميتەتى ءتوراعاسىنىڭ ورىنباسارى ەلينا پاۋلي جاۋاپ بەردى، دەپ حابارلايدى قازاقپارات.
ونىڭ ايتۋىنشا، ەڭ الدىمەن ءبىلىم مەكەمەسىنىڭ ءبىرىنشى باسشىسىنىڭ اتىنا ءوتىنىش جازۋ كەرەك.
جازعى ساۋىقتىرۋ لاگەرىنە تەگىن جولداما مىنا ساناتتاعى وتباسى بالالارىنا بەرىلەدى:
- مەملەكەتتىك اتاۋلى الەۋمەتتىك كومەك الۋعا قۇقىعى بار وتباسىلاردان شىققان بالالارعا؛
- جان باسىنا شاققانداعى تابىسى ەڭ تومەنگى كۇنكورىس دەڭگەيىنىڭ شاماسىنان تومەن وتباسىلاردان شىققان بالالارعا؛
- جەتىم جانە اتا-انا قامقورلىعىنسىز قالعان بالالارعا؛
- توتەنشە جاعداي سالدارىنان شۇعىل جاردەمدى تالاپ ەتەتىن وتباسىنان شىققان بالالارعا؛
- مەكتەپتىڭ قامقورشىلىق كەڭەسى انىقتايتىن وزگە دە ساناتتاعى ءبىلىم الۋشىلار مەن تاربيەلەنۋشىلەرگە.
«بالالاردىڭ جازعى دەمالىسىن ۇيىمداستىرۋ جانە جولداما بەرۋ جەرگىلىكتى اتقارۋشى ورگانداردىڭ قۇزىرەتىندە جانە ولاردىڭ قاراجاتىنا بايلانىستى ۇلەستىرىلەدى. جازعى ۋاقىتتا 11 مىڭنان استام مەكتەپ جانىنداعى جانە قالا سىرتىنداعى ساۋىقتىرۋ لاگەرى جۇمىس ىستەيدى. بيىل وتكەن جىلمەن سالىستىرعاندا جارتى ميلليون نەمەسە 500000 عا ارتىق بالا لاگەردە دەمالادى. ال جازعى ساۋىقتىرۋ دەمالىسىمەن قامتىلاتىن بالالاردىڭ جالپى سانى 2 ميلليون 300 مىڭنان اسادى»، - دەيدى بالالاردىڭ قۇقىعىن قورعاۋ كوميتەتى ءتوراعاسىنىڭ ورىنباسارى ەلينا پاۋلي.