بەلگىلى ەكونوميست توقايەۆ تۋرالى پىكىر ءبىلدىردى
«اباقتىدان شىققان ۋاقىتتا قازاق بولعان سوڭ، اعايىن- تۋىس، كورشى- قولاڭ شاقىرىپ شاي بەرىپ جاتتى.
بۇرىن ىستەس، قىزمەتتەس بولعانداردىڭ ازاماتتاردىڭ ىشىندە العاشقى بوپ ۇيىنە شاقىرعان - قاسىم- جومارت كەمەل ۇلى ەدى. ول تۇستا توقايەۆ سەناتتى باسقارىپ تۇردى.
تۇرمەدەن شىعىپ، ءارى-ءسارى كۇيدە جۇرگەن مەنى ۇيىنە شاقىرىپ ءبىر شاۋگىم ءشايىن بەردى. كەشكى ساعات 6-7-لەردە ۇستەل باسىنا وتىرعان بىزدەر ءتۇن ورتاسىنا دەيىن اڭگىمەنىڭ تيەگىن اعىتتىق.
ءشاي ۇستىندە ساياسات، مەملەكەتتىك ماسەلەلەر، پرەزيدەنت، ۇكىمەت قابىلداپ جاتقان شەشىمدەرگە قاتىستى پىكىرىمدى سۇرادى. شىعارىپ سالاردا «جاكە، وسى ايتقاندارىڭدى قاعازعا ءتۇسىرىپ بەرشى» دەدى.
ەكى-ءۇش كۇن ۋاقىت ءبولىپ، ساياسي-قوعامي كونسەپتسيالاردان تۇراتىن 20-30 پاراق ازىرلەدىم.
ارا- كىدىك شاقىرىپ تۇرادى. «سەنىڭ جازعاندارىڭدى ءالى تاستاماي وقىپ ءجۇرمىن» دەپ ايتادى. ول، ارينە، مەنىڭ كوڭىلىمدى اۋلاپ ايتقان بولۋى مۇمكىن.
دەگەنمەن دە ونداي نارسەلەر ماعان كۇش-قۋات بەرىپ ءجۇردى دەسەم ارتىق ايتقاندىق ەمەس»، - دەدى قۇلەكەيەۆ «سۇراۋى بار» Youtube ارناسىنا بەرگەن سۇحباتىندا.
قۇلەكەيەۆ توقايەۆتى نەلىكتەن «دوسىم» دەپ اتاي المايتىنىن ءتۇسىندىردى.
«ەتيكالىق تۇرعىدان پرەزيدەنتتى «دوسىم» دەپ ايتۋ دۇرىس ەمەس. ەگەر ول كىسى ايتاتىن بولسا مەن ءۇشىن ۇلكەن ماقتانىش بولار ەدى. سەبەبى قىزمەتى تومەن ادامنىڭ جوعارى قىزمەتتەگى ادامعا دوسىم ەدى دەگەنى جاراسپايدى. جاقسى ازامات، مەن ونى سىيلايمىن دەسە، سول ماعان جەتكىلىكتى»، - دەيدى ول.
ايتا كەتەلىك، جاقسىبەك قۇلەكەيەۆ «قازاقستان تەمىر جولى» كومپانياسىن باسقارعان تۇستا، 2008 -جىلى ءىرى كولەمدە پارا الدى دەگەن ايىپپەن قاماۋعا الىنعان. قىزمەت بابىن اسىرا پايدالانعانى ءۇشىن كىنالى دەپ تانىلىپ، 3 جىلعا باس بوستاندىعىنان ايىرىلعان.
ءساۋىر ايىندا مەملەكەت باسشىسى قاسىم-جومارت توقايەۆ اقوردادا بەلگىلى ەكونوميست جاقسىبەك قۇلەكەيەۆتى قابىلداعانىن حابارلاعانبىز. وندا جاقسىبەك قۇلەكەيەۆ قاسىم-جومارت توقايەۆقا ەلىمىزدىڭ الەۋمەتتىك- ەكونوميكالىق دامۋ پەرسپەكتيۆالارى تۋرالى ءوزىنىڭ كوزقاراسىن ايتقان.