«كوپەس كياتكين قازىناسىن كومگەن»: قوستاناي ورتالىعىنان جەراستى جولى تابىلدى
19 مامىر 08:55

«كوپەس كياتكين قازىناسىن كومگەن»: قوستاناي ورتالىعىنان جەراستى جولى تابىلدى

نۇر-سۇلتان. قازاقپارات - قوستاناي قالاسىنىڭ ورتالىعىندا كوپقاباتتى تۇرعىن ءۇيدىڭ قۇرىلىسىن باستاپ جاتقان قۇرىلىسشىلار جەر قازۋ جۇمىستارى كەزىندە 2,5-3 مەتر تەرەڭدىكتە كومىلىپ جاتقان كىرپىشتەن قالانعان ەسكى جەراستى جولىنىڭ ۇستىنەن شىقتى.

جەراستى توننەلىنىڭ بيىكتىگى جۇرەلەپ وتىرعان ادام سىيىپ كەتەتىندەي. ءىشى جارتىلاي توپىراققا تولىپ، كىرپىش قابىرعاسىنا ىس جابىسىپ قالىپتى. ىستىڭ ءيىسى شىعىپ تۇر.

قۇرىلىسشىلاردىڭ ءبىرى بۇرىن مەتالل قۇياتىن سەح بولعان شىعار دەپ جورامالداسا، ەندى ءبىرى كەڭەس وكىمەتىنىڭ العاشقى جىلدارى مۇندا جىلقى تۇراتىن شارۋاشىلىق عيماراتتارى، ودان كەيىن جوندەۋ زاۋىتى بولعانىن ايتادى. سوڭعى جىلدارى بۇل اشىق الاڭقاي اۆتوتۇراق رەتىندە پايدالانىلىپ كەلگەن. نە دە بولسا، ەكسكاۆاتورشىنىڭ ەسكى ءبىر تاريحي نىساندى ارشىپ العانى اقيقات.

- 5 اپرەل كوشەسىنىڭ ارعى بەتىندە كوپەس كياتكيننىڭ ءۇيى تۇر. ساۋداگەر قازان توڭكەرىسى كەزىندە قىمبات اسىل قازىناسىنىڭ ءبارىن وسى ماڭايعا كومىپتى دەگەن اڭىز بار. دۇرىستاپ ءبارىن تەكسەرىپ، قاراڭدار، قايدان بىلەسىڭ، مۇمكىن تابىلىپ قالار، - دەدى قۇرىلىس باسىنا جينالعان تۇرعىنداردىڭ ءبىرى.

جەر استىنان شىققان جولدىڭ ناقتى قاشان سالىنعانىن، نەندەي قىزمەت اتقارعانىن الداعى ۋاقىتتا ماماندار زەرتتەپ، انىق- قانىعىنا جەتە جاتار. ازىرشە بىزگە بەلگىلىسى، بۇل جەرگە 19 قاباتتى تۇرعىن ءۇي سالىناتىنى عانا.




egemen.kz


جاڭالىقتار