ليفتىدە كۇيەۋى تەپكىلەگەن ايەل وقيعانىڭ ءمان-جايىن ايتتى

None
None
نۇر-سۇلتان. قازاقپارات - استانادا ليفت ىشىندە ايەلىن سوققىعا جىققان ەر ادامنىڭ ارەكەتى جۇرتتىڭ جاعاسىن ۇستاتتى.

جابىرلەنۋشىنىڭ ايتۋىنشا، جۋان جۇدىرىقتى كۇيەۋى ونى ءتىپتى ءوز تۋىستارىنان دا قىزعانعان. اۋىر سوققى مەن تەپكىدەن ايەلدىڭ ءتورت جەردەن سۇيەگى سىنىپ، ميى شايقالعان، - دەپ حابارلايدى ك ت ك ارناسى.

وتاسقان ءتورت جىلدا كورگەن قورلىعىم تەك بۇل ەمەس دەيدى ول. ەنەسى وسىنداي وتباسىنداعى زورلىق-زومبىلىقپەن كۇرەسىپ، ايەل مەن بالا قۇقىعىن قورعاپ جۇرگەن بەلسەندى ەكەن.

ارۋجان جولداسى ەلنۇر بايمەتوۆپەن 2018 -جىلى وتاۋ قۇرعان. ورتادا ەكى بالالارى بار. «ءبىراق، وتباسى دەگەن اتى عانا. بىرگە بولعان جىلدارىمنىڭ بارلىعىندا ۇرىپ- سوعۋدان كوز اشپادىم»، - دەيدى ارۋجان.

كەلىنشەكتىڭ ايتۋىنشا، كورمەگەنى جوق. ۇرعان، سوققان، بۋىندىرعان. 20 گرادۋس سۋىقتا بالكونعا قاماپ قويعان. كوپ جاعدايعا جانجالعا شەكتەن تىس قىزعانىش سەبەپ بولادى ەكەن. ءتىپتى سوڭعى كەزدە ءوز تۋىسقاندارىنان دا قىزعانۋدى شىعاردى دەيدى ارۋجان. جەلىدە تاراعان ۆيدەوعا دا سونداي جاعداي سەبەپ بولىپتى.

جابىرلەنۋشى ارۋجان بايمەتوۆا: «ءبىز ەكەۋمىز مەنىڭ تۋىستارىمنىڭ شاقىرتۋىمەن كاراوكەگە باردىق. ءبىر ساتتە مەن قولىما ميكروفان الىپ ءان شىرقاي باستادىم. ەكىنشى ميكروفوندى كۇيەۋ بالام، ياعني ءسىڭلىمنىڭ جولداسى الىپ قوسىلدى. كۇيەۋىم دەرەۋ ۇيالى تەلەفونىما قورقىتىپ حابارلاما جىبەردى. كەش تارقاپ ۇيگە كەلگەندە جەدەل ساتى ەسىگى جابىلماي جابىپ مەنى ۇرا باستادى. مەن جەرگە قۇلاپ قالدىم»، - دەيدى.

ءبىراق جولداسىنىڭ سول كۇنگى تومپەشى مۇنىمەن بىتپەپتى. ايتۋىنشا، كۇيەۋى وزدەرىن ۇيگە جەتكىزىپ تاستاعان ىنىسىمەن بىرگە بولدىڭ دەپ، ايەلىن تاعى سوققىنىڭ استىنا العان. ءبىراق پوليتسيا بۇل دەرەكتى ەسكەرمەي وتىر دەيدى ارۋجان. جالپى سول كۇنگى سوققىدان كەلىنشەكتىڭ ءتورت بىردەي سۇيەگى سىنىپ، ميى شايقالعان.

ال ەنەسى بولسا، بۇل ءبارىمىزدىڭ باسىمىزدان وتكەن جاعداي دەپ جۇباتادى ەكەن. سول سابىرعا شاقىرعان ەنەسى شىمكەنت قالاسىنداعى بەلسەندىلەردىڭ ءبىرى ەكەن. دالىرەك ايتقاندا، بالالار مەن ايەلدەر قۇقىعىن قورعاۋ جونىندەگى كەڭەستىڭ ءتورايىمى. ۇلى الەۋمەتتىك جەلىنى شۋلاتقاننان كەيىن گۇلايىم شۇڭعارايەۆا الەۋمەتتىك جەلىدەگى پاراقشالارىن تۇگەل ءوشىرىپ تاستاعان. وزىمەن تەلەفون ارقىلى تىلدەسكەندە «بالامدى قولدامايمىن» دەپ وتىر. بىرگە تۇرعاندا ەشقانداي وعاش قىلىعىن بايقامادىم دەپ اقتالدى.

كۇدىكتىنىڭ اناسى گۇلايىم شۇڭعارايەۆا: «بۇل جاعدايدى ايتىپ وتەرىم، ارينە، قولدامايمىن. ءبىراق بۇل - استانادا بولعان وقيعا. ءتورت جارىم جىل بويى بالام مەن كەلىنىم مەنىڭ قولىمدا تۇردى. ەشقانداي مۇنداي نارسە، ابەستىك، قول جۇمساۋ دەگەن بولعان ەمەس»، - دەيدى.

ايەل قۇقىعىن قورعاپ جۇرگەن بەلسەندىلەر مۇنداي جاعدايدىڭ كوپتىگىن، ءبىراق باسىم بولىگى جابۋلى قازان كۇيىندە قالاتىنىن ايتادى. جىل باستالعالى ءتورت ايدا تاعى 300-دەن استام دەرەك انىقتالعان.

ليفتىدە ايەلىن سوققىعا جىققان ەر ادامعا قاتىستى قىلمىستىق كودەكستىڭ 107-بابى، ياعني دەنساۋلىققا قاساقانا اۋىرلىعى ورتاشا زيان كەلتىرۋ بابىمەن قىلمىستىق ءىس قوزعالعان. جىگىتتىڭ ءوزى بوستاندىقتا. ونى ەشقايدا كەتپەۋ تۋرالى قولحاتپەن جىبەرگەن.

ال جولداسىنان ءزابىر كورگەن ارۋجان بايمەتوۆا جاقىن كۇندەرى زاڭدى تۇردە اجىراسپاق.


سوڭعى جاڭالىقتار