عالىمدار ماسكۇنەمدىكتەن ەمدەلۋدىڭ جاڭا ءادىسىن تاپتى
18 مامىر 19:14

عالىمدار ماسكۇنەمدىكتەن ەمدەلۋدىڭ جاڭا ءادىسىن تاپتى

نۇر-سۇلتان. قازاقپارات - امەريكالىق عالىمدار گەندى وڭدەۋ ارقىلى ادامداردى ماسكۇنەمدىكتەن ەمدەۋدىڭ جاڭا ءادىسىن تاپتى.

بۇل تۋرالى Futurism جازدى.

چيكاگوداعى يللينويس ۋنيۆەرسيتەتىنىڭ زەرتتەۋشىلەرى الكوگولدى جانە ونىڭ ميعا اسەرىن زەرتتەپ، گەندى وڭدەۋ ەرەسەكتەردەگى ۋايىمدى باسىپ، الكوگولدى تۇتىنۋ دەڭگەيىنىڭ تومەندەۋىنە اكەلۋى مۇمكىن دەگەن قورىتىندىعا كەلدى.

عالىمدار CRISPR تەحنولوگياسىن تىشقاندارداعى گەندى وڭدەۋ ءۇشىن پايدالاندى. بۇعان دەيىن ولار جاسى 10-18 جاس ارالىعىنداعى ادام جاسىنا سايكەس كەلەتىن كەمىرگىشتەردىڭ مىنەز-قۇلقىن زەرتتەگەن.

تاجىريبە ءۇشىن بۇل تىشقاندارعا الكوگول بەرىلدى. ءبىراز ۋاقىت ءوتىپ عالىمدار ولاردىڭ گەنىن رەداكسيالاعان.

عالىمداردىڭ الدىڭعى زەرتتەۋى الكوگولدىڭ ادام ميىنا تەرىس اسەر ەتىپ، اميگدالانىڭ وزگەرىستەرىن تۋدىراتىنىن كورسەتتى.

بۇل ەستە ساقتاۋ جۇمىسىندا، شەشىم قابىلداۋدا جانە ادامنىڭ ەموتسيونالدىق رەاكسيالارىنىڭ پايدا بولۋىندا ماڭىزدى ءرول اتقاراتىن ميدىڭ ايماعى. مۇندا ەموتسيالار، اسىرەسە قورقىنىش پەن الاڭداۋشىلىق تۋادى. زەرتتەۋگە سايكەس، 21 جاسقا دەيىن ءىشۋدى باستاعان ادامداردا ءارتۇرلى ەموتسيونالدىق جانە پسيحيكالىق اۋرۋلار ءجيى كەزدەسەدى.

«جاس ءوسپىرىم شاقتا شامادان تىس ءىشۋ ميعا ۇزاق مەرزىمدى تەرىس اسەر ەتۋى مۇمكىن، ءبىراق گەندى وڭدەۋ ارقىلى بۇدان قۇتىلۋعا بولادى. بۇل ميدى قالپىنا كەلتىرۋدىڭ ءبىر ءتۇرى»، - دەپ ءتۇسىندىردى زەرتتەۋ اۆتورى سۋبحاش پاندەي.

جاڭا گەندىك-ينجەنەرلىك ەكسپەريمەنتتىڭ ناتيجەسى تىشقانداردىڭ لابيرينتتەردەن وتكەندە كۇشتى قورقىنىش پەن ۇرەي سەزىمىن باستان كەشىرمەيتىنىن، سونداي-اق ولاردىڭ الكوگولدى ىشۋگە دەگەن قۇشتارلىعى دا جوق ەكەنىن كورسەتتى.

گەندى موديفيكاتسيالاۋدىڭ ءدال وسىنداي تەحنولوگياسىن ادامدارعا دا قولدانۋعا بولادى، دەيدى عالىمدار جانە بۇل ناتيجەگە اكەلۋى كەرەك. كەيبىر عالىمدار تىشقاندار ادامداردان وتە ەرەكشەلەنەدى جانە مۇنداي ناتيجەلەرگە قول جەتكىزۋ مۇمكىن ەمەس دەپ سانايدى.

بۇعان دەيىن عالىمدار كوز اۋرۋىن ەمدەۋدىڭ جاڭا ءادىسىن ويلاپ تاپقان بولاتىن.

جاڭالىقتار