قىتايدان فينلياندياعا قاتىنايتىن جۇك پويىزى قازاقستان ارقىلى ءجۇرىپ ءوتتى

None
None
نۇر-سۇلتان. قازاقپارات - ترانسكاسپي حالىقارالىق كولىك باعدارى ارقىلى قىتايدان فينلياندياعا جونەلتىلگەن كونتەينەر پويىزى التىنكول - قورعاس تەمىرجول شەكارا وتكەلى ارقىلى ءجۇرىپ ءوتتى، دەپ حابارلايدى قازاقپارات.

قۇراما جۇگى بار كونتەينەرلىك پويىز 48 قىرىق فۋتتىق كونتەينەردەن تۇرادى. قۇرام قىتايدىڭ تۋانتسزەتسۋن تەمىرجول ستانتسياسىندا (چۋنتسين قالاسى) قۇرىلدى.

پويىز قازاقستان، ازەربايجان، گرۋزيا اۋماعىمەن، ودان ءارى قارا تەڭىز ارقىلى رۋمىنيا باعىتىمەن فينلياندياعا قاراي بەت الادى.

فينليانديانىڭ كوۋۆولا قالاسىنا دەيىنگى 9 مىڭ شاقىرىمدىق كۇردەلى مۋلتيمودالدىق مارشرۋتتى قۇرام بار بولعانى 20 كۇندە ءجۇرىپ وتەدى.

جونەلتۋدى «Nurminen Logistics Services OY» فين وپەراتورىمەن «KTZ Express» ا ق بىرلەسىپ ۇيىمداستىردى.

تاسىمالداۋ قاتىسۋشىلارى ترانسكاسپي باعدارىندا جاڭا سەرۆيس قۇرۋ قازاقستان اۋماعى ارقىلى ترانزيتپەن قىتاي - فينليانديا - قىتاي مارشرۋتى بويىنشا تاسىمال كولەمىن ارتتىراتىنىن اتاپ ءوتتى.

ەستەرىڭىزگە سالا كەتەيىك، بۇعان دەيىن فينلياندياداعى ەڭ ءىرى جۇك وپەراتورى Nurminen Logistics قىتايدان قازاقستان ارقىلى جۇرەتىن كونتەينەرلىك باعىتتى ىسكە قوسقانىن حابارلاعان بولاتىنبىز.

ەكى ەل تەمىرجول اكىمشىلىكتەرى KTZ Express جانە Nurminen Logistics اتىنان ىنتىماقتاستىق تۋرالى مەموراندۋمعا قول قويعان.

تاراپتار ونىڭ اياسىندا قازاقستان ارقىلى كاسپي بويىنشا ەكىجاقتى قاتىناستاعى كونتەينەرلىك تاسىمالدى دامىتۋ تۋرالى كەلىسكەن بولاتىن.


سوڭعى جاڭالىقتار