يۋري شۋمكوۆ پەن پاتسيەنت اراسىندا قانداي دا ءبىر جانجال بولماعان
18 مامىر 14:48

يۋري شۋمكوۆ پەن پاتسيەنت اراسىندا قانداي دا ءبىر جانجال بولماعان

نۇر- سۇلتان. قازاقپارات - ادام قولىنان مەرت بولعان الماتىلىق دارىگەر يۋري شۋمكوۆ پەن پاتسيەنت اراسىندا قانداي دا ءبىر جانجال بولماعان.

بۇل تۋرالى ق ر دەنساۋلىق ساقتاۋ ءمينيسترى اجار عينيات ايتتى، دەپ حابارلايدى قازاقپارات ءتىلشىسى.

«پاتسيەنت ىشەك- قارىن جولى زەرتتەۋگە قاتىستى اتالعان پروتسەدۋرانى جاساتقىسى كەلگەن. ىشەكتىڭ تارىلۋى سالدارىنان ءبىرىنشى پروتسەدۋرا ءساتسىز شىعىپ، دارىگەر ونى قايتادان وتۋگە كەڭەس بەرگەن. دارىگەر يۋري شۋمكوۆتىڭ ارىپتەستەرى پاتسيەنتپەن قانداي دا ءبىر جانجالدىڭ بولماعانىن ايتادى. سوندىقتان دا تەرگەۋ ناتيجەسىن كۇتەيىك. مەنىڭشە، وسىناۋ جانتۇرشىگەرلىك كىسى ءولتىرۋدىڭ سەبەپتەرىن بىلەتىن بولامىز»، - دەدى اجار عينيات ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.

سونىمەن قاتار ول قازىرگى ۋاقىتتا تەرگەۋ امالدارى ءجۇرىپ جاتقانىنا بايلانىستى وقيعانىڭ ءمان- جايىن تولىق ايتا المايتىنىن ايتتى.

«تەرگەۋ ءجۇرىپ جاتىر. تەرگەۋ بارىسىنا قاتىستى اقپاراتىم جوق. ونى قۇقىق قورعاۋ ورگاندارى جۇرگىزۋدە»، - دەدى مينيستر.

ەسكە سالايىق، 4 -ءساۋىر كۇنى الماتىدا دارىگەر ەمدەلۋشى پاتسيەنتىنىڭ قولىنان قازا تاپتى. ونى اڭشى مىلتىعىمەن اتىپ تاستاعان. اسا اۋىر قىلمىس قالانىڭ بوستاندىق اۋدانىندا بولعان. كۇدىكتى قالادا ەنگىزىلگەن ارنايى جوسپار بارىسىندا الاتاۋ اۋدانى اۋماعىندا ۇستالدى.

اۆتور: مارلان جيەمباي

جاڭالىقتار