تاجىكستاننىڭ ىشكى ىستەر مينيسترلىگى تەرروريزمگە قارسى وپەراتسيا باستاعانىن حابارلادى
اگەنتتىكتىڭ تاجىكستان رەسپۋبليكاسى ىشكى ىستەر مينيسترلىگىنىڭ باسپا ءسوز ورتالىعىنا سىلتەمە جاساپ حابارلاۋىنشا، 2022 -جىلدىڭ 17- مامىرىندا ۇيىمداسقان قىلمىستىق توپ مۇشەلەرى قوعامدىق- ساياسي جاعدايدى تۇراقسىزداندىرۋ ماقساتىندا تاجىكستان رەسپۋبليكاسى رۋشان اۋدانىنداعى اۆتوجول ۋچاسكەسىندە، مەملەكەتتىك شەكارا سىزىعىندا «دۋشانبە - كۋلما» حالىقارالىق اۆتوتراسساسىن زاڭسىز جاۋىپ تاستاعان.
قىلمىسكەرلەر حالىقارالىق تەرروريستىك ۇيىمداردىڭ قولداۋىمەن ەلدەن تىس جەردە قارۋ- جاراق پەن وق- دارىلەر العان، سونداي- اق تەرروريستىك ارەكەتتەر مەن ارانداتۋدىڭ باسقا تۇرلەرىن جۇزەگە اسىرۋ ءۇشىن شەتەلدىك جالدامالى سودىرلاردى تارتقان. بۇل ارەكەت كونستيتۋتسيالىق قۇرىلىستىڭ نەگىزدەرىنە قارسى باعىتتالعان. ۇيىمداسقان قىلمىستىق توپتار قۇقىق قورعاۋ ورگاندارى قىزمەتكەرلەرىنىڭ قارۋ- جاراق پەن وق- دارىلەردى تاپسىرۋ تۋرالى زاڭدى تالاپتارىن ورىنداماعان جانە قارۋلى قارسىلىق كورسەتكەن.
حالىقارالىق تەرروريستىك ۇيىمدار قۇرعان جانە قارجىلاندىراتىن رۋشان اۋدانىندا ۇيىمداسقان قىلمىستىق توپتار ارەكەتىندە تەرروريستىك سيپاتتاعى قىلمىس بەلگىلەرى بار. «وسىعان بايلانىستى ازاماتتاردىڭ قاۋىپسىزدىگىن، قوعامدىق ءتارتىپتى قامتاماسىز ەتۋ جانە «دۋشانبە — كۋلما» حالىقارالىق اۆتوموبيل جولى بويىنشا رۋشان اۋدانىنداعى جول ۋچاسكەسىندە كولىك قۇرالدارىنىڭ كەدەرگىسىز قوزعالىسىن قالپىنا كەلتىرۋ ماقساتىندا ەلدىڭ قۇقىق قورعاۋ ورگاندارى تەرروريزمگە قارسى وپەراتسيانى باستادى»، - دەلىنگەن تاجىكستان اقپارات اگەنتتىگى تاراتقان حاباردا.
اۆتور: اقبوپە ءابدراسۋل