پرەزيدەنتتىڭ ەپيدەميولوگيالىق جاعدايدى تۇراقتاندىرۋ تۋرالى تاپسىرماسى ورىندالدى
18 مامىر 11:26

پرەزيدەنتتىڭ ەپيدەميولوگيالىق جاعدايدى تۇراقتاندىرۋ تۋرالى تاپسىرماسى ورىندالدى

نۇر- سۇلتان. قازاقپارات - مەملەكەت باسشىسى قاسىم- جومارت توقايەۆتىڭ ەلدەگى ەپيدەميولوگيالىق جاعدايدى تۇراقتاندىرۋ تاپسىرماسى ورىندالدى.

بۇل تۋرالى ق ر دەنساۋلىق ساقتاۋ ءمينيسترى اجار عينيات ايتتى، دەپ حابارلايدى قازاقپارات ءتىلشىسى.

«مەملەكەت باسشىسى ەلدەگى ەپيدەميولوگيالىق جاعدايدى تۇراقتاندىرۋعا باعىتتالعان ءبىرقاتار تاپسىرما بەرگەن بولاتىن. بۇگىنگى تاڭدا تاپسىرما ورىندالدى. قازىرگى ۋاقىتتا ەلىمىزدىڭ بارلىق وڭىرىندە ەپيدەميولوگيالىق جاعداي تۇراقتاندى. تاۋلىگىنە كوروناۆيرۋس ينفەكسياسىمەن شامامەن ونشاقتى جاعدايى تىركەلەدى، ناۋقاستاردىڭ 98 پايىزدان استامى ساۋىعىپ كەتىپ جاتىر»، - دەدى مينيستر ورتالىق كوممۋنيكاتسيالار قىزمەتىندە ءوتىپ جاتقان باسپا ءسوز ءماسليحاتىندا.

ونىڭ اتاپ وتۋىنشە، وسى جىلدىڭ 24- قاڭتارىندا وتكەن ۆەدومستۆوارالىق كوميسسيانىڭ وتىرىسىندا كارانتيندىك ءىس- شارالاردى جەڭىلدەتۋ تاسىلدەرى قارالىپ، ماقۇلدانعان.

«قازىر ەلدە بارلىق شەكتەۋ ءىس- شارالارى الىنىپ تاستالدى. دۇنيەجۇزىلىك دەنساۋلىق ساقتاۋ ۇيىمىنىڭ مالىمەتتەرى بويىنشا سوڭعى اپتادا بۇكىل الەمدە اۋرۋ 12 پايىزعا تومەندەدى. ءبىراق اۋرۋدىڭ ءوسۋى امەريكا جانە افريكا وڭىرلەرىندە بايقالادى. سونىمەن قاتار، الەمنىڭ 97 ەلىندە سىرقاتتانۋشىلىقتىڭ ءوسۋى كورىنىپ وتىر»، - دەدى ول.

ءمينيستردىڭ دەرەگىنشە، سوڭعى اپتادا ارمەنيادا سىرقاتتانۋشىلىق – 200، ۆەنگريادا - 200 پايىزدان استامعا، بىرىككەن اراب امىرلىگىندە – 55، جاپونيادا – 54، سينگاپۋردا – 37، يزرايلدە – 15، تۇركيادا 12 پايىزعا وسكەن.

«ەپيدەميولوگيالىق جاعدايدى كۇندەلىكتى بولجاۋ جانە باعالاۋ تۇراقتى نەگىزدە جالعاسۋدا، جاعداي ۋشىققان كەزدە ك ۆ ي- مەن اۋىراتىن ناۋقاستارعا مەديتسينالىق كومەك كورسەتۋ ءۇشىن توسەك ورىندار، ينفەكتسيالىق اۋرۋحانالار، ەمدەۋگە ارنالعان قاراجاتتىڭ كولەمى، دارىلىك زاتتار مەن مەديتسينالىق بۇيىمدار، جەكە قورعانىس قۇرالدارى دايىن»، - دەدى اجار عينيات.

اۆتور: مارلان جيەمباي


جاڭالىقتار