رەسەي اقشاسى جىلدىڭ ەڭ ۇزدىك ۆاليۋتاسى اتاندى
18 مامىر 11:02

رەسەي اقشاسى جىلدىڭ ەڭ ۇزدىك ۆاليۋتاسى اتاندى

نۇر- سۇلتان. قازاقپارات - رەسەيدىڭ ورتالىق بانكى دوللار باعامىن 63 رۋبلگە دەيىن ءتۇسىردى، دەپ حابارلايدى «حابار 24». رەسەي ۆاليۋتاسى 10- ناۋرىزدان باستاپ نىعايىپ كەلەدى.

جالپى رۋبل ۋكراينادا قارۋلى قاقتىعىس باستالا سالىسىمەن تۋىنداعان قۇلدىراۋدان كەيىن تەز قالپىنا كەلدى. سەبەبى بيلىك كاپيتالدىڭ قوزعالىسىن باقىلاپ، ەل ىشىندە ۆاليۋتا باعامىن بەلگىلەۋگە كوشكەن.

وتكەن اپتادا Bloomberg رەسەي اقشاسىن 2022 -جىلدىڭ ەڭ ۇزدىك ۆاليۋتاسى دەپ اتادى. ويتكەنى رۋبل جىل باسىنان بەرى دوللارعا شاققاندا 11 پروتسەنتكە وسكەن. ناتيجەسىندە 2020 -جىلدىڭ اقپان ايىنداعى پاندەمياعا دەيىنگى دەڭگەيگە جەتكەن.

ساراپشىلار رەسەيلىك اقشانىڭ نىعايۋىن ەڭ الدىمەن يمپورتتىڭ ەكى- ءۇش ەسە تومەندەپ، شەتەلدىك كومپانيالاردىڭ رەسەيگە تاۋار تاسىمالداۋدى قىسقارتۋىمەن بايلانىستىرىپ وتىر.

تيمۋر نيگماتۋلين، ساراپشى:

- رۋبلدىڭ نىعايۋى، تەڭگەنىڭ نىعايۋىنا اكەلۋى مۇمكىن. بۇل ينفلياتسيانى باسەڭدەتۋ تۇرعىسىنان وڭ اسەر ەتۋى ىقتيمال. قازاقستان ءۇشىن بۇل ءبىرشاما ءتيىمدى. ەگەر رۋبل قاتتى السىرەسە، كەرى سالدارى كوبەيەدى. سوندىقتان قازاقستان ءۇشىن نەگىزگى ساۋدا سەرىكتەسى رەتىندە رەسەي ەكونوميكاسىنىڭ قۇلدىراپ، تەرەڭ رەتسەسسياعا تۇسپەۋى وتە ماڭىزدى.

جاڭالىقتار