پەداگوگتەردى باعالاۋدا جەتىستىككە جەتكەن وقۋشىلاردىڭ ناتيجەسى نازارعا الىنادى – مينيستر
18 مامىر 10:42

پەداگوگتەردى باعالاۋدا جەتىستىككە جەتكەن وقۋشىلاردىڭ ناتيجەسى نازارعا الىنادى – مينيستر

نۇر- سۇلتان. قازاقپارات - پەداگوگتەردىڭ قىزمەتىن باعالاۋ كەزىندە دە ۇلگەرىمى ناشار وقۋشىلارمەن جۇمىس ىستەگەنىنە ەمەس، ءداستۇرلى تۇردە جەتىستىككە جەتكەن وقۋشىلارىنىڭ ناتيجەسىنە كوبىرەك نازار اۋدارىلادى.

بۇل تۋرالى ءوزىنىڭ Facebook پاراقشاسىندا ق ر ءبىلىم جانە عىلىم ءمينيسترى اسحات ايماعامبەتوۆ جازدى، دەپ حابارلايدى قازاقپارات.

«ءبىلىم بەرۋدىڭ ماڭىزدى اسپەكتىلەرىنىڭ ءبىرى - ينكليۋزيۆتىلىك. ءارتۇرلى توپتاعى وقۋشىلارعا، سونىڭ ىشىندە مۇمكىندىگى شەكتەۋلى بالالارعا، قيىن ومىرلىك جاعدايداعى وتباسى بالالارىنا جانە ت. ب. قولداۋ كورسەتۋ ءبىزدىڭ جۇمىسىمىزدىڭ باسىم باعىتى. ءبىز ەرەكشە ءبىلىم بەرۋ قاجەتتىلىكتەرى بار بالالاردى ينكليۋزيا بويىنشا قامتۋ ءۇشىن كەشەندى جۇمىس جۇرگىزەمىز»، - دەيدى مينيستر.

ونىڭ سوزىنشە، كوپتەگەن زەرتتەۋ دارىندى وقۋشىلاردى عانا ەمەس، سونىمەن قاتار الەۋمەتتىك وسال توپتاعى بالالاردى دا قولداۋدىڭ ماڭىزدىلىعىن كورسەتەدى. ەلىمىزدە دارىندى بالالاردى قولداۋ باعىتىندا اۋقىمدى جۇمىستار اتقارىلىپ جاتقانىن دا ايتا كەتكەن ءجون. جوعارى وقۋ ورىندارىنا ىرىكتەۋ جۇيەسى، ۋنيۆەرسيتەت گرانتتارىن ءبولۋ، دارىندى بالالارعا ارنالعان ارنايى مەكتەپتەر، ءتۇرلى وليمپيادالار، بايقاۋلار وتكىزۋ جانە ت. ب. پەداگوگتەردى باعالاۋ كەزىندە دە ۇلگەرىمى ناشار وقۋشىلارمەن جۇمىس ىستەگەنىنە ەمەس، ءداستۇرلى تۇردە جەتىستىككە جەتكەن وقۋشىلارىنىڭ ناتيجەسىنە نازار كوبىرەك اۋدارىلادى.

ارينە ونى ءادىل دەپ ايتۋعا بولادى. ەمتيحان تاپسىرىپ، ەڭ جوعارى بالل العان، ياعني ەڭ مىقتىسى جەڭىسكە جەتەدى دەپ. ءبىراق اتا- انالار دارىندى بالالارعا ارنالعان مەكتەپتەرگە ءتۇسۋ ءۇشىن رەپەتيتور كومەگىنە جۇگىنىپ جاتاتىنى دا جاسىرىن ەمەس. ادەتتە الەۋمەتتىك- ەكونوميكالىق جاعدايى تومەن وتباسىلاردىڭ مۇمكىندىكتەرى بىردەي ەمەس. بۇل مەريتوكراتيانىڭ «قاراڭعى» تۇسى.

«تەوريالىق جاعىنان ىرىكتەۋ بارلىعىنا تەڭ جانە ءادىل قولجەتىمدىلىكتى قامتاماسىز ەتۋى كەرەك، ءبىراق ىرىكتەۋ جۇيەسى ءالى دە تولىقتىرۋدى قاجەت ەتەتىنىن كورىپ وتىرمىز. سونداي- اق بۇل جەردە مەريتوكراتيا مەن ينكليۋزيۆتىلىكتىڭ تەپە- تەڭدىگىن ساقتاۋ ماڭىزدى»، - دەدى اسحات ايماعامبەتوۆ.


جاڭالىقتار