يزرايلدە عارىشتى زەرتتەۋدىڭ ۇلتتىق ورتالىعى سالىنادى

نۇر- سۇلتان. قازاقپارات - يزرايل ۇلتتىق عارىش ورتالىعىن سالىپ، سپۋتنيك ۇشىرۋدى جوسپارلاپ وتىر، دەپ حابارلايدى قازاقپارات ءتىلشىسى.

ەلدە الداعى بەس جىلعا ارنالعان جاڭا عارىش باعدارلاماسى قابىلداندى، دەلىنگەن «ۆەستي يزرايل» سايتىندا.

سايتتا جاقىن ارادا عارىشقا ۇشىرىلاتىن يزرايلدىك «اموس-8» سپۋتنيگىنىڭ كومپيۋتەرلىك مودەلىنىڭ سۋرەتى جاريالانعان، سونداي- اق ەلدىڭ عىلىم جانە تەحنولوگيالار ءمينيسترى وريت فاركاش- حاكوەننىڭ الداعى بەس جىل ىشىندە يزرايل ءوزىنىڭ جاڭا عارىش باعدارلاماسىنا 600 ميلليون شەكەل سالاتىنىن مالىمدەگەنى تۋرالى ايتىلعان.

«قازىر الەمدە گەوساياسي جاعدايعا بايلانىستى عارىش قىزمەتى بەلسەندى دامىپ جاتىر. ۇلى بريتانيا العاش رەت ءوز اۋماعىنان عارىش كەمەسىن ۇشىرۋدى باستادى، وزبەكستان عارىش سالاسىن دامىتۋدا، يزرايل عارىشتى زەرتتەۋدىڭ ۇلتتىق ورتالىعىن سالادى. بارىنەن بۇرىن ماعان يزرايلدىڭ عارىشتىق باعدارلاماسىندا قويىلعان ناقتى مىندەتتەر ۇنادى، بارلىعى ءتورت تارماق»، - دەدى زىمىران- عارىش تەحنيكاسى جونىندەگى ينجەنەر- كونسترۋكتور جان قۇلجانوۆ.

يزرايلدىڭ جاڭا عارىش باعدارلاماسىنىڭ اۆتورلارى بۇل عارىشتى زەرتتەيتىن كومپانيالار سانىن ەكى ەسە ارتتىرۋعا كومەكتەسەدى دەپ وتىر (بۇگىندە يزرايلدە ولاردىڭ سانى 60-قا جۋىق)، ال وسى سالادا جۇمىس ىستەيتىندەر سانى ءتورت ەسە ارتادى - 2500-دەن 10000-عا دەيىن.

اۆتور: اقبوپە ءابدراسۋل