ءاليحان سمايىلوۆ ەكونوميكانى دەمونوپوليزاتسيالاۋ جۇمىسىن جالعاستىرۋدى تاپسىردى
17 مامىر 19:58

ءاليحان سمايىلوۆ ەكونوميكانى دەمونوپوليزاتسيالاۋ جۇمىسىن جالعاستىرۋدى تاپسىردى

نۇر-سۇلتان. قازاقپارات - ق ر پرەمەر-ءمينيسترى ءاليحان سمايىلوۆ ەكونوميكانى دەمونوپوليزاتسيالاۋ جونىندەگى كوميسسيانىڭ كەزەكتى وتىرىسىن وتكىزدى، دەپ حابارلايدى Primeminister.kz.

بۇعان دەيىن جاۋاپتى مەملەكەتتىك ورگاندارعا سالالىق وبەكتىلەر مەن ۇيىمداردى جەكەشەلەندىرۋدىڭ نەگىزدىلىگىنە، ونىڭ ىشىندە جەكە وپەراتورلاردى قۇرۋ تۇرعىسىنان تالداۋ جۇرگىزۋ تاپسىرىلعان بولاتىن.

جۇرگىزىلگەن جۇمىس ناتيجەسىندە ءبىرقاتار كوممۋنيكاتسيالىق، ينفراقۇرىلىمدىق جانە وندىرىستىك كومپانيانى مەملەكەتتىك مەنشىككە بەرۋ ۇسىنىلدى. بۇگىنگى تاڭدا رەسپۋبليكالىق مەنشىككە ءبىرقاتار كاسىپورىن مەن مەكەمەنىڭ اكسيالارى مەن قاتىسۋ ۇلەسى قابىلداندى.

اتاپ ايتقاندا، «كولىك سەرۆيسى ورتالىعى» ا ق مۇلكىنىڭ قۇرامىندا ۇزىندىعى 250 شاقىرىم بولاتىن 400 دەن استام كىرمە تەمىرجول جەلىلەرى قابىلداندى. مەملەكەتتىك مەنشىككە ۇزىندىعى 178 شاقىرىم بولاتىن 138 كىرمە تەمىرجولىنا يەلىك ەتەتىن تاعى 25 كومپانيانى قابىلداۋ جۇمىستارى جۇرگىزىلىپ جاتىر.

اتالعان كومپانيالاردىڭ مەملەكەت مەنشىگىنە قابىلدانۋى تەمىر جول ينفراقۇرىلىمى سالاسىندا دەلدالداردى بولدىرماۋعا جانە وسى قىزمەتتەرگە بيزنەس شىعىندارىن ازايتۋعا مۇمكىندىك بەرەدى.

سونداي-اق كوميسسيا وتىرىسىندا جەكەشەلەندىرۋدىڭ كەشەندى جوسپارىنان حالىقتىڭ تىنىس-تىرشىلىگىن قامتاماسىز ەتەتىن (جىلۋمەن، ەلەكترمەن، سۋمەن جابدىقتاۋ جانە باسقا دا كوممۋنالدىق قىزمەتتەر) 205 وبەكتىنى الىپ تاستاۋ ماسەلەسى تالقىلاندى.

سونىمەن قاتار كوميسسيا ججم نارىعىن، گاز سالاسىن جانە وڭىرلىك ەلەكتر جەلىلىك كومپانيالاردى دەمونوپوليزاتسيالاۋ شارالارىن قارادى. پرەمەر-مينيستر وسى باعىتتاردا جوسپارلانعان ءىس-شارالاردى جۇزەگە اسىرۋ ءۇشىن بارلىق قاجەتتى قۇقىقتىق جانە ۇيىمداستىرۋشىلىق ماسەلەلەردى پىسىقتاۋدى تاپسىردى.

جاڭالىقتار