جاڭا وقۋ جىلىنان باستاپ ۇلدار مەن قىزدار دەنە شىنىقتىرۋ ءپانىن بولەك وتەدى
17 مامىر 19:45

جاڭا وقۋ جىلىنان باستاپ ۇلدار مەن قىزدار دەنە شىنىقتىرۋ ءپانىن بولەك وتەدى

نۇر-سۇلتان. قازاقپارات - الداعى وقۋ جىلىنان باستاپ دەنە شىنىقتىرۋ جانە تەحنولوگيا ءپانى قىز جانە ۇل بالالار ءۇشىن بولەك وتكىزىلەدى.

بۇل تۋرالى ءبىلىم جانە عىلىم مينيسترلىگى مەكتەپكە دەيىنگى جانە ورتا ءبىلىم كوميتەتىنىڭ ءتوراعاسى گۇلميرا كارىموۆا ءمالىم ەتتى، دەپ حابارلايدى قازاقپارات ءتىلشىسى.

«الداعى وقۋ جىلىندا ءبىلىم جانە تاربيە بەرۋ بويىنشا وقۋ-ادىستەمەلىك نۇسقاۋحات ازىرلەندى. ول بيىلعى وقۋ جىلىنىڭ سوڭىنا دەيىن مەكتەپتەرگە جەتكىزىلەدى. جاڭا وقۋ-ادىستەمەلىك نۇسقاۋحات مەكتەپ جاسىنا دەيىنگى بالالاردىڭ قاۋىپسىزدىگىن قامتاماسىز ەتۋ، تاربيە جانە ءبىلىم بەرۋ پروتسەسىنىڭ ساپاسىن ارتتىرۋ ماقساتىندا قويىلعان تالاپتارمەن تولىقتىرىلدى.

ەرەكشە قاجەتتىلىگى بار بالالارمەن جۇمىستى پسيحولوگيالىق-پەداگوگيكالىق نورمالارىنا سايكەس ۇيىمداستىرۋ، الەۋمەتتىك تۇرعىدان وسال توپقا جاتاتىن وتباسى بالالارىن مامانداندىرىلعان ءبىلىم ۇيىمدارىنا قابىلداۋعا ارنايى كۆوتا ەنگىزۋ جۇمىسى ءجۇرىپ جاتىر»، - دەدى گۇلميرا كارىموۆا ءبىلىم جانە عىلىم مينيسترلىگىندە وتكەن اپپارات جيىنىندا.

سونداي-اق، كوميتەت باسشىسى ءبىلىم بەرۋ ۇيىمدارىنىڭ باسشىلارىن روتاتسيالاۋ جۇمىسى دا جالعاسىن تاباتىنىن ايتتى.

بۇگىندە 200 ءبىلىم بەرۋ ۇيىمىنىڭ باسشىسى روتاتسيالاندى.

«ءوزىن-ءوزى تانۋ ءپانىنىڭ وقۋ جوسپارىنان الىنىپ تاستالۋىنا بايلانىستى ءوزىن-ءوزى تانۋ كۋرسىن وقىتۋ ەرەكشەلىكتەرى تۋرالى 19-بولىمگە وزگەرىستەر ەنگىزىلىپ، مازمۇنى قىسقارتىلدى. كوركەم ەڭبەك ءپانىنىڭ 1-4- سىنىپتاردا ەڭبەككە باۋلۋ جانە بەينەلەۋ ونەرى، 5-9- سىنىپتارداعى بەينەلەۋ ونەرى مەن تەحنولوگيا ءپانىنىڭ بولىنۋىنە بايلانىستى اتالعان پاندەردى وقىتۋدا وزگەرىستەر ەنگىزىلىپ، تولىقتىرىلدى. تەحنولوگيا جانە دەنە شىنىقتىرۋ پاندەرىن وتكىزۋدە سىنىپتىڭ تولىمدىلىعىنا قاراماستان ۇلدار مەن قىزدار توبىنا ءبولۋ تۋرالى قاعيدا ەنگىزىلدى»، - دەيدى ول.

ايتا كەتەيىك، اتالعان جيىندا مينيستر اسحات ايماعامبەتوۆ «التىن بەلگىگە» ۇمىتكەر ۇ ب ت- دا تومەن بال العان جاعدايدا مەكتەپ باسشىلىعىنىڭ جاۋاپقا تارتىلاتىنىن ەسكەرتتى.

ودان بولەك، بيىل ۇ ب ت- دا ەرەكشە قاجەتتىلىگى بار بالالارعا قوسىمشا ۋاقىت بەرىلەدى.

جاڭالىقتار