ەلوردالىق پوليتسەيلەر بانك الاياقتارىنىڭ قالاي الدايتىنىن ءتۇسىندىردى
17 مامىر 18:46

ەلوردالىق پوليتسەيلەر بانك الاياقتارىنىڭ قالاي الدايتىنىن ءتۇسىندىردى

نۇر- سۇلتان. قازاقپارات - نۇر- سۇلتان قالاسىنىڭ پوليتسيا دەپارتامەنتى بانك كارتالارى ارقىلى جاسالاتىن الاياقتىقتىڭ جيىلەپ كەتكەنى تۋرالى ەسكەرتتى، دەپ حابارلايدى قازاقپارات.

ۆەدومستۆونىڭ مالىمەتىنشە، الاياقتار كەلەسى جۇيە بويىنشا جۇمىس ىستەيدى: الاياقتاردىڭ ءبىر توبى بانك كارتالارىن ۇستاۋشىلارعا تەلەفون ارقىلى قوڭىراۋ شالىپ، ۇلتتىق بانكپەن بىرلەسىپ، نەسيە راسىمدەۋگە تىرىسىپ جاتقان الاياقتاردى اشكەرەلەۋ بويىنشا ءىس- شارالار جۇرگىزىپ جاتقانىن تۇسىندىرەدى. ولار پوليسيا مەن پروكۋراتۋرا قىزمەتكەرلەرىنىڭ دەرەكتەرىن ينتەرنەتتەگى بوس كوزدەردەن الادى. ارى قاراي، باسقا الاياقتار حابارلاسىپ، وزدەرىن بانك قىزمەتكەرلەرى ەتىپ تانىستىرادى جانە الاياقتىق ارەكەتتەرىن راستايدى. اڭگىمە بارىسىندا ولار قۇقىق قورعاۋ ورگاندارىمەن جانە بانكتەرمەن بىرلەسىپ الاياقتاردى انىقتاۋ بويىنشا وپەراتسيا جۇرگىزىلىپ جاتقانىن حابارلايدى.

«وسىلايشا ازاماتتاردىڭ سەنىمىنە كىرۋگە تىرىسقان ولار بانكتىك دەرەكتەمەلەر مەن SMS- كودتاردى الۋدى كوزدەيدى. ءدال وسى مالىمەتتەردى الۋ ءۇشىن الاياقتار كارتا ۇستاۋشىلارعا قوڭىراۋ شالادى، ويتكەنى بۇل مالىمەتتەر ينتەرنەت- بانكينگكە، ياعني شوتتارعا قول جەتكىزۋگە قىزمەت ەتەدى. كەيبىر الاياقتار توبى قوڭىراۋ سوعىپ اڭگىمەلەسىپ جاتقاندا باسقالارى ينتەرنەت- بانكينگ ارقىلى شوتتارعا قول جەتكىزۋگە تىرىسادى جانە SMS كودتارىن كۇتەدى»، - دەپ جازدى دەپارتامەنتتەن.

سونداي- اق الاياقتاردىڭ تاعى ءبىر باسقا توبى وزدەرىن بانك قىزمەتكەرلەرى ەتىپ تانىستىرىپ، الدەبىرەۋلەر ونىڭ اتىنا نەسيە راسىمدەۋگە تىرىسىپ جاتقانىن ايتىپ، الاياقتىق ارەكەتتەردىڭ الدىن الۋ ماقساتىندا قولدا بار اقشانى رەزەرۆتىك نەمەسە ساقتاندىرۋ شوتىنا اۋدارۋدى سۇرايدى. ال جيناقتار بولماسا، وندا اۋدارىمنان كەيىن جويىلاتىن نەسيە راسىمدەۋ قاجەت ەكەنىن ايتادى.

«سويلەسكەن كەزدە جەكە باسىن راستاۋ سىلتاۋىمەن، ولار جەكە جانە كارتا دەرەكتەمەلەرىن، SMS - پارولدەردى ايتۋدى سۇرايدى. ينتەرنەت- بانكينگتى قالاي پايدالانۋدى بىلمەيتىندەرگە الاياقتار AnyDesk قوسىمشاسىن جۇكتەۋدى ۇسىنادى. بۇدان ءارى وسى قوسىمشالاردان لوگين مەن ءپارولدى الىپ، قاسكۇنەم قۇرىلعىعا قاشىقتان قول جەتكىزەدى، ياعني باسقا ەلدىڭ اۋماعىندا بولا وتىرىپ، الاياق ءوز قۇربانىنىڭ ۇيالى تەلەفونىن تولىق باقىلاي الادى. اتاپ ايتقاندا، SMS جىبەرە الادى، ءموبيلدى بانكينگتەردى پايدالانا الادى جانە ءتۇرلى وپەراتسيالاردى، سونىڭ ىشىندە كرەديتتەردى رەسىمدەۋدى جانە اقشا قاراجاتىن ودان ءارى اۋدارۋدى جۇرگىزە الادى»، - دەپ ءتۇسىندىردى ۆەدومستۆو وكىلدەرى.

ولاردىڭ مالىمەتىنشە، كوبىنەسە جەكە ازاماتتار الاياقتاردىڭ ايتۋىمەن نەسيەلەردى وزدەرى راسىمدەيدى، بۇل رەتتە ادامنىڭ بيومەتريالىق دەرەكتەرىن وقۋ ارقىلى تەكسەرۋدەن وتەدى. الاياقتاردىڭ قۇرباندارى بانكتەردىڭ بولىمشەلەرىندە نەسيە راسىمدەگەن جاعدايلار بار، ال مەنەدجەرلەرگە كۇماندى اڭگىمە تۋرالى حابارلاماعان. نەسيەلەردى راسىمدەگەننەن كەيىن ولاردى وزدەرى شەتەلدىك شوتتارعا جىبەرەدى.

«الاياقتار قوڭىراۋ شالۋ ءۇشىن قازاقستاندىق ازاماتتاردىڭ ابونەنتتىك نومىرلەرىن قايتالاۋعا مۇمكىندىك بەرەتىن SIP- تەلەفونيانى باعدارلامالىق قامتاماسىز ەتۋدى پايدالانادى. سوندىقتان تەلەفون قوڭىراۋىنىڭ قوسىلۋ كوزىن باقىلاۋ ءۇشىن ۋاقىت قاجەت. وسىنداي سحەمالاردان ەلوردالىق پوليسياعا 1000 نان استام حابارلاما مەن شاعىم ءتۇستى. 200 دەرەك بويىنشا ق ك 190-بابىمەن (الاياقتىق) سوتقا دەيىنگى تەرگەۋ باستالدى. جالپى شىعىن 250 ميلليون تەڭگەدەن اسادى. نەگىزىنەن مۇنداي سحەماعا زەينەتكەرلەر جانە زەينەت جاسىنداعى ادامدار ءتۇسىپ جاتادى»، - دەپ اتاپ وتكەن حابارلامادا.

ينتەرنەت- الاياقتاردىڭ قۇربانى بولماس ءۇشىن نۇر- سۇلتان قالاسىنىڭ پوليتسيا دەپارتامەنتى بەلگىلى ءبىر ساقتىق شارالارىن ساقتاۋدى ۇسىنادى:

- ەگەر سىزگە وسىنداي قوڭىراۋ تۇسسە، ەشقانداي جاعدايدا SMS- كودتى بەرمەڭىز! اڭگىمەنى ءۇزىپ، بانكتىڭ كولل- ورتالىعىنىڭ رەسمي تەلەفوندارى بويىنشا اقپاراتتى ناقتىلاڭىز.

- ءموبيلدى بانكينگ قوسىمشالارىنا كۇردەلى پارولدەردى ورناتىڭىز، ولاردى ءجيى وزگەرتىپ تۇرۋ كەرەك.

- بارلىق قاۋىپسىزدىك شارالارىن قوسۋ قاجەت، 3D - Secure, ءسىزدىڭ تەلەفون نومىرىڭىزگە SMS - حابارلاما جىبەرمەي ەشقانداي تولەم وتپەيدى. وپەراتسيالاردى جۇرگىزۋ ءۇشىن وسى كودتى ەنگىزۋ ارقىلى عانا راستاي وتىرىپ، ءسىز قانداي دا ءبىر تولەم وپەراتسياسىن جۇرگىزە الاسىز. سوندىقتان مۇنداي قاۋىپسىزدىك ادىستەرىن قوسۋ كەرەك.

جاڭالىقتار