و س ك قوعامدىق بىرلەستىك وكىلدەرىنىڭ رەفەرەندۋمعا قاتىسۋ ءتارتىبىن ءتۇسىندىردى

نۇر-سۇلتان. قازاقپارات - ەلوردادا ورتالىق رەفەرەندۋم كوميسسياسىنىڭ وتىرىسىندا ق ر ورتالىق سايلاۋ كوميسسياسى ءتوراعاسىنىڭ ورىنباسارى كونستانتين پەتروۆ قوعامدىق بىرلەستىك وكىلدەرىنىڭ رەفەرەندۋمعا قاتىسۋ ءتارتىبىن ءتۇسىندىردى، دەپ حابارلايدى قازاقپارات ءتىلشىسى.

و س ك مالىمەتىنە قاراعاندا، 2022 -جىلعى 5-ماۋسىمدا داۋىس بەرۋ جەرگىلىكتى ۋاقىت بويىنشا تاڭعى ساعات جەتىدەن باستاپ كەشكى ساعات جيىرماعا دەيىن وتكىزىلەدى.

ۋچاسكەلىك رەفەرەندۋم كوميسسياسى داۋىس بەرۋ ۋاقىتى مەن ورنى تۋرالى ازاماتتاردى داۋىس بەرۋ وتەتىن كۇننەن ون كۇن بۇرىن، ياعني 2022 -جىلعى 25-مامىرعا دەيىن بۇقارالىق اقپارات قۇرالدارى جانە وزگە دە تاسىلدەرمەن حاباردار ەتەدى.

كونستانتين پەتروۆتىڭ ايتۋىنشا، داۋىس بەرۋ كۇنى ۋچاسكە اشىلعان كەزدەن باستاپ رەفەرەندۋم ۋچاسكەسىندە داۋىستاردى ساناۋ ناتيجەلەرى انىقتالعانعا دەيىن رەسپۋبليكانىڭ قوعامدىق بىرلەستىكتەرىنىڭ وكىلدەرى، شەت مەملەكەتتەر مەن حالىقارالىق ۇيىمداردىڭ بايقاۋشىلارى قاتىسۋعا قۇقىلى.

«بۇقارالىق اقپارات قۇرالدارى رەفەرەندۋمعا ازىرلىك پەن ونى وتكىزۋ بارىسىن جاريا ەتەدى، ولاردىڭ رەفەرەندۋم كوميسسيالارى جانىندا اككرەديتتەلگەن وكىلدەرىنىڭ رەفەرەندۋم وتكىزۋگە بايلانىستى ءىس-شارالارعا قاتىسۋىنا كەپىلدىك بەرىلەدى.

«رەسپۋبليكالىق رەفەرەندۋم وتكىزۋ كەزىندە قازاقستان رەسپۋبليكاسىنىڭ قوعامدىق بىرلەستىكتەرى وكىلدەرىنىڭ، شەت مەملەكەتتەر مەن حالىقارالىق ۇيىمداردان بايقاۋشىلاردىڭ وكىلەتتىكتەرىن كۋالاندىرۋ قاعيدالارىن بەكىتۋ تۋرالى» ورتالىق رەفەرەندۋم كوميسسياسى قاۋلىسىنىڭ جوباسى بەلگىلەنگەن تارتىپپەن اشىق نورماتيۆتىك قۇقىقتىق اكتىلەردىڭ ينتەرنەت- پورتالىندا ورنالاستىرىلعان»، - دەدى و س ك ءتوراعاسىنىڭ ورىنباسارى.

ەرەجەدە رەسپۋبليكالىق رەفەرەندۋم وتكىزۋ كەزىندە داۋىس بەرۋ ءۇشىن ۋچاسكەگە وكىلدەردى جىبەرەتىن قوعامدىق بىرلەستىك قازاقستان رەسپۋبليكاسىنىڭ زاڭدى تۇلعالاردى مەملەكەتتىك تىركەۋ سالاسىنداعى زاڭناماسىندا بەلگىلەنگەن تارتىپپەن ەلىمىزدە تىركەلۋى ءتيىس دەپ كوزدەلگەن. «رەسپۋبليكالىق رەفەرەندۋم وتكىزۋ كەزىندە قوعامدىق بىرلەستىكتىڭ وكىلى قازاقستان رەسپۋبليكاسىنىڭ ازاماتى عانا بولا الادى. قوعامدىق بىرلەستىك وكىلىنىڭ وكىلەتتىگى ونىڭ تەگى، اتى، اكەسىنىڭ اتى كورسەتىلە وتىرىپ، جازباشا نىساندا راستالادى. بۇل قۇجات وكىلدى جىبەرگەن قوعامدىق بىرلەستىكتىڭ مورىمەن راستالادى»، - دەدى ك. پەتروۆ.

بۇدان بۇرىن حابارلانعانداي، قازاقستاندا 10013 رەفەرەندۋم ۋچاسكەسى ىسكە قوسىلادى. ورتالىق رەفەرەندۋم كوميسسياسى بيۋللەتەندەردى دايىنداۋعا قاتىستى قاۋلى قابىلدادى.

اۆتور: رۋسلان عابباسوۆ