رەسپۋبليكالىق رەفەرەندۋمعا قانشا ادام قاتىساتىنى بەلگىلى بولدى
17 مامىر 12:25

رەسپۋبليكالىق رەفەرەندۋمعا قانشا ادام قاتىساتىنى بەلگىلى بولدى

نۇر-سۇلتان. قازاقپارات - قازاقستاندا 10013 رەفەرەندۋم ۋچاسكەسى ىسكە قوسىلادى.

بۇل تۋرالى ەلوردادا ورتالىق رەفەرەندۋم كوميسسياسىنىڭ وتىرىسىندا ق ر ورتالىق سايلاۋ كوميسسياسىنىڭ ءتوراعاسى نۇرلان ءابدىروۆ ءمالىم ەتتى، دەپ حابارلايدى قازاقپارات ءتىلشىسى.

«بۇگىن ءبىز رەسپۋبليكالىق رەفەرەندۋمدى ازىرلەۋدىڭ ماڭىزدى ماسەلەلەرىن قاراستىردىق. وسىلايشا، رەفەرەندۋمدى ۇيىمداستىرۋ مەن وتكىزۋ جونىندەگى ناۋقان جاڭا كەزەڭگە اياق باستى. ۋچاسكەلىك رەفەرەندۋم كوميسسيالارى جۇمىسقا تولىعىمەن كىرىستى. تىڭدالعان ەسەپتەرگە سۇيەنسەك، ناقتى جۇمىستار جۇرگىزىلدى. جالپى، 10013 رەفەرەندۋم ۋچاسكەسى ىسكە قوسىلادى»، - دەدى ن. ءابدىروۆ.

وسى ورايدا و س ك ءتوراعاسى اتالعان ۋچاسكەلەردە داۋىس بەرۋ ءۇشىن بارلىق جاعداي جاساۋدى تاپسىردى.

«رەسپۋبليكالىق رەفەرەندۋمعا قاتىسۋ قۇقىعى بار ازاماتتاردىڭ تىزىمىنە توقتالساق، 15-مامىرداعى اقپارات بويىنشا بۇل تىزىمدە 11 ميلليون 722 مىڭ 536 ادام ەنگىزىلگەن. جەرگىلىكتى اتقارۋشى ورگاندار ۋچاسكەلەردىڭ داۋىس بەرۋ كۇنىنە دايىندىق ماسەلەلەرىن باقىلاۋدا ۇستاۋى قاجەت. مۇگەدەكتىگى بار ادامدار ءۇشىن بارلىق جاعدايدى قامتاماسىز ەتۋ باعىتىندا قاجەتتى ءىس- شارالاردى جۇزەگە اسىرۋعا نازارلارىڭىزدى اۋدارامىن. وسى ورايدا ولارعا ىڭعايلى بولۋى ءۇشىن ينۆوتاكسي تارتۋ ماسەلەلەرى جانە باسقا دا قادامدار قوسىمشا پىسىقتالسىن»، - دەدى ن. ءابدىروۆ رەفەرەندۋمدى وتكىزۋ جۇمىستارىنا جۇمىلدىرىلعاندارعا قاراتا ايتقان سوزىندە.

بۇدان بۇرىن حابارلانعانداي، 5-ماۋسىمدا وتەتىن رەفەرەندۋمعا قاتىسا الاتىن ازاماتتاردىڭ ءتىزىمى جاساقتالىپ جاتقانى ايتىلعان ەدى. رەفەرەندۋمدا 11 ءوڭىر حالقى جاقتاپ داۋىس بەرسە، كونستيتۋتسياعا وزگەرىس ەنگىزىلەدى.

اۆتور: رۋسلان عابباسوۆ


جاڭالىقتار