مينيستر مال شارۋاشىلىعىن دامىتۋدىڭ تەجەۋشى فاكتورى نە ەكەنىن ايتتى

نۇر-سۇلتان. قازاقپارات - مال شارۋاشىلىعىن دامىتۋداعى تەجەۋشى فاكتور - جەم- ءشوپ بازاسىنىڭ جەتكىلىكسىزدىگى.

بۇل تۋرالى بۇگىن ۇكىمەت وتىرىسىندا ق ر اۋىل شارۋاشىلىعى ءمينيسترى ەربول قاراشوكەيەۆ ايتتى، دەپ حابارلايدى قازاقپارات ءتىلشىسى.

«تالداۋ كورسەتكەندەي، مال شارۋاشىلىعىن جەدەل دامىتۋ مەن ونىڭ ونىمدىلىگىن ارتتىرۋدىڭ باستى تەجەۋشى فاكتورى - جەمشوپ بازاسىنىڭ جەتكىلىكسىزدىگى. قابىلدانىپ جاتقان ءىس- شارالارعا قاراماستان، بۇگىنگى تاڭدا ءىرى ازىقپەن قامتاماسىز ەتۋ 80 پايىزدى، شىرىندى ازىقپەن 40 پايىزدى، قۇنارلى ازىقپەن قامتاماسىز ەتۋ 50 پايىزدى قۇرايدى. دەگەنمەن، تۇراقتى دامۋ ءۇشىن مال شارۋاشىلىعىن تولىق قامتاماسىز ەتۋمەن قاتار، ازىقتىڭ ساقتاندىرۋ قورى دا بولۋعا ءتيىس ەكەنى بارشاعا ءمالىم. بۇدان باسقا، جايىلىمدىق جەرلەردىڭ ونىمدىلىگىن جاقسارتۋ، ولاردى قارقىندى پايدالانۋ بويىنشا پروبلەمالار بار»، - دەدى مينيستر.

ونىڭ ايتۋىنشا، مال ازىعى بازاسىنىڭ پروبلەماسىن شەشۋ ماقساتىندا وتكەن جىلى مينيسترلىك جەم- ءشوپ ءوندىرىسىن دامىتۋدىڭ 2022-2025 -جىلدارعا ارنالعان جول كارتاسىن ازىرلەدى.

«الايدا، جەرگىلىكتى جەرلەردە وندا كورسەتىلگەن ءىس- شارالاردى ىسكە اسىرۋ بويىنشا ءالى دە جۇيەلى جۇمىس جوق، مال شارۋاشىلىعىن جەم- ءشوپ بازاسىن ەسەپكە الماي دامىتۋ پروتسەسى جالعاسۋدا. بۇدان باسقا، مال شارۋاشىلىعىن مەملەكەتتىك قولداۋداعى قازىرگى قيعاشتىقتار، اتاپ ايتقاندا، شارۋاشىلىقتارعا مال بورداقىلاۋ الاڭدارى مەن ەت وڭدەۋ كاسىپورىندارىنا ەت كونتينگەنتىن جەتكىزۋ بويىنشا مىندەتتەمەلەر مەن موتيۆاتسيانىڭ بولماۋى، سۋبسيديالاۋدىڭ جوعارى سىبايلاس جەمقورلىق سيپاتقا يە سەلەكتسيالىق- اسىل تۇقىمدىق جۇمىسقا شامادان تىس شوعىرلانۋى، مال بورداقىلاۋ الاڭدارى مەن ەت وڭدەۋ كاسىپورىندارىنىڭ جارتىلاي جۇكتەلۋىنە الىپ كەلدى»، - دەدى ەربول قاراشوكەيەۆ.

ءمينيستردىڭ ايتۋىنشا، سونىڭ ناتيجەسىندە جوعارى تەحنولوگيالىق ونەركاسىپتىك بورداقىلاۋ مەن مال سويۋدىڭ ورنىنا قوسىمشا قۇن مەن مال شارۋاشىلىعىنان تۇسەتىن سالىق تۇسىمدەرىنىڭ ءتيىستى شىعىندارىمەن، جەرگىلىكتى جەرلەردەگى ەپيزووتيالىق احۋالدىڭ ناشارلاۋىمەن اۋلالىق بورداقىلاۋ جانە سويۋ وركەندەي باستاعان.