ەلورداعا جىل باسىنان بەرى قانشا رەسەي ازاماتى كەلگەنى ءمالىم بولدى
بۇل مالىمەتتەردى نۇر سۇلتان قالاسى پوليتسيا دەپارتامەنتىنىڭ باسپا ءسوز قىزمەتى تاراتتى. ءباسپاسوز قىزمەتىنىڭ مالىمەتتەرىنە قاراعاندا، ەلوردادا شەتەلدىكتەردىڭ بولۋىن باقىلاۋدىڭ تيىمدىلىگىن ودان ءارى ارتتىرۋ، زاڭسىز كوشى- قوندى انىقتاۋ جانە جولىن كەسۋ ماقساتىندا «ميگرانت» جەدەل- الدىن الۋ ءىس- شاراسىن ءوتىپ جاتىر. ەلوردالىق گارنيزون قىزمەتكەرلەرى جەدەل الدىن الۋ ءىس- شارالارىن وتكىزۋ كەزىندە شەتەلدىكتەردىڭ قازاقستاندا بولۋ ەرەجەلەرىن بۇزۋدىڭ 633 فاكتىسىن انىقتادى.
بيىلعى جىلدىڭ باسىنان بەرى كەلگەن شەتەلدىكتەردىڭ 10 مىڭعا جۋىعى تمد ازاماتتارى، ال الىس شەت ەلدەردەن 3,5 مىڭنان استام ادام كەلدى.
«مىسالى، ەلورداعا الىس شەتەلدەن ۋاقىتشا كەلگەن ازاماتتاردىڭ ىشىندە 369 تۇركيا وكىلى، 148 ءۇندىستان جانە 317 ۇلى بريتانيا ازاماتى بار. ەلوردادا جىل باسىنان بەرى تمد ەلدەرىنەن 6200-دەن استام وزبەكستان ازاماتى، 1251 رەسەي ازاماتى، 871 قىرعىزستان ازاماتى جانە تاجىكستاننان 973 ادام كەلدى. نەگىزىنەن شەتەلدىكتەر ەلورداعا جۇمىس ىستەۋگە كەلەدى، وسىنداي ماقساتپەن كەلگەن شامامەن 10 مىڭ ازامات تىركەلدى. ەلورداعا وقۋعا 588 شەتەلدىك ستۋدەنت كەلگەن. 2022 -جىلدىڭ باسىنان بەرى قازاقستان رەسپۋبليكاسىندا بولۋ ەرەجەلەرىن بۇزعانى ءۇشىن 1814 شەتەل ازاماتى انىقتالىپ، اكىمشىلىك جاۋاپقا تارتىلدى. سوت شەشىمىمەن ەلدەن 410 شەتەلدىك شىعارىلدى»، - دەلىنگەن حابارلامادا.
پوليتسەيلەر شىعارىپ جىبەرۋ تۋرالى شەشىمنىڭ ورىندالماۋى قىلمىستىق جازالاناتىن ارەكەت بولىپ تابىلاتىنىن جانە قىلمىستىق زاڭناماعا سايكەس جاۋاپقا تارتىلاتىنىن اتاپ ءوتتى.
«كوشى-قون قىزمەتىنىڭ وكىلدەرى ەلوردادا شەتەلدىكتەردىڭ بولۋىن، ولاردىڭ شەتەل ازاماتتارىنىڭ قۇقىقتىق جاعدايى تۋرالى زاڭناما تالاپتارىن ساقتاۋىن، ولاردىڭ ەلدەن ۋاقتىلى كەتۋىن تۇراقتى تۇردە باقىلايدى. قالا اۋماعىندا زاڭسىز كوشىپ- قونۋشىلار مەن ىشكى ىستەر ورگاندارىندا ۋاقتىلى تىركەلمەگەن ءتارتىپ بۇزۋشىلاردى انىقتاۋ ءۇشىن جۇيەلى تۇردە رەيدتەر جۇرگىزىلەدى»، - دەلىنگەن باسپا ءسوز قىزمەتى تاراتقان اقپاراتتا.