تەكەلىدەگى لاي كوشكىنىنەن قازا بولعان بالانىڭ اناسى وقيعانىڭ قالاي بولعانىن ايتتى
قازا بولعان بەس جاستاعى جانبوتا تىلەۋحاننىڭ اناسى قايعىلى وقيعا ورىن العان ساتتە مونشادا بولعانىن ايتتى. سول ۋاقىتتا تەك قاتتى گۇرىلدىڭ داۋىسىن ەستىگەن.
«قاتتى جەل سوققانداي بولدى. ودان كەيىن تارس- تۇرس بولىپ كەتتى. ءوزىمىز شوشىعاننان، ەسىمىزدى بىلمەي قالدىق. تەرەزەدەن شىقتىق تا، جان- جاققا قاراساق ءۇي ورنىندا جوق. بالا سول ءۇيدىڭ ىشىندە قالعان بولاتىن. اقىلدى، سۇيكىمدى ەدى. مەن ءانشى بولامىن، مەن ءبيشى بولامىن دەيتىن»، - دەيدى قىزىنىڭ قازاسىنان ەسەڭگىرەپ قالعان گۇلنار تىلەۋحان.
قايعى جۇتقان انانى قازىر اكىمدىك ۇلكەن قىزىمەن بىرگە قوناقۇيگە ورنالاستىرعان. ال كىشكەنتاي جانبوتانى ەرتەڭ جەرلەيدى. اكىمدىك بۇل وتباسىنا جاڭا باسپانا بەرەتىنىن مالىمدەدى. ال قالعان ءتورت جانۇيانىڭ بۇلىنگەن ۇيىنە قاتىستى شەشىمدى كوميسسيا قابىلدايدى.
«قازىر بىزدە ءتورت ءۇي بۇزىلىپ تۇر. تەحنيكالىق ساراپتاما جاساپ، قاراپ شىقتىق. ءۇي سالىپ بەرەمىز بە، ساتىپ الامىز با، زاڭعا قاراپ شەشىم شىعارامىز»، - دەدى تەكەلى قالاسىنىڭ اكىمى باتىر مولداحمەتوۆ.
ەستەرىڭىزگە سالا كەتەيىك، تەكەلىدە لاي كوشكىنى كەشە كۇندىزگى ساعات 12:00 شاماسىندا باستالعان. تاۋدان كوز ىلەسپەس جىلدامدىقپەن لاپ ەتكەن بالشىق الدىنداعىسىن جاپىرىپ، بەس ءۇيدى باسىپ قالعان. ولاردىڭ بىرىندە بەس جاسار جانبوتا بولعان. قىزدىڭ دەنەسىن قۇتقارۋشىلار تەك جەتى ساعاتتان سوڭ، ارنايى دايىندالعان ءيتتىڭ كومەگىمەن ءۇيىندى استىنان الىپ شىققان. ءبۇلدىرشىن ءبىر اۋلەتتىڭ كەنجەسى ەدى.
اناسى گۇلنار تىلەۋحاننىڭ ايتۋىنشا، قايعىلى جاعداي بولادى دەپ ەشكىم ويلاماعان. جانبوتا ءۇي ىشىندە الاڭسىز قۋىرشاق ويناپ وتىرعان. ال 12 جاستاعى اپكەسى تۋىستارىنىڭ ۇيىندە بولىپتى. ەندى، مىنە ءبىر- اق كۇندە بەس جاسار قىزىنان دا، باسپاناسىنان دا ايىرىلعان كەلىنشەك، قايعىدان ەسەڭگىرەپ وتىر. ايتا كەتەيىك، الماتى وبلىسىنىڭ اكىمى تەكەلىدە لاي كوشكىنىنەن زارداپ شەككەندەرگە باسپانا بەرىلەتىنىن تۆيتتەر پاراقشاسىندا جازعانىن حابارلاعان بولاتىنبىز.
اۆتور: سامال قابىشيەۆا