ۇ ق ش ۇ كۇزدە قازاقستاندا اسكەري وقۋ جيىنىن وتكىزەدى

ماسكەۋ. قازاقپارات - بيىل كۇزدە قازاقستاندا ۇجىمدىق قاۋىپسىزدىك شارتى ۇيىمىنىڭ اياسىندا اسكەري وقۋ جيىنىن وتكىزۋ جوسپارلانىپ وتىر.

بۇل تۋرالى رەسەي فەدەراتسياسىنىڭ پرەزيدەنتى ۆلاديمير پۋتين ۇيىمنىڭ مەرەيتويلىق سامميتىندە ايتتى، دەپ حابارلايدى قازاقپارات ءتىلشىسى.

«قازىرگى كەزەڭدە ۇ ق ش ۇ قىزمەتىن ءارى قاراي جەتىلدىرۋ جانە ونىڭ باسشىلىق قۇرىلىمدارىن وڭتايلاندىرۋ ماسەلەسى - ءبىرىنشى كەزەكتەگى ماڭىزدى شارۋا ەكەنى تولىعىمەن قيسىندى. ۇ ق ش ۇ ۇجىمدىق كۇشتەرىن زاماناۋي قارۋمەن جانە تەحنيكامەن جاراقتاندىرۋ، جاۋىنگەرلىك كونتينگەنتتىڭ وپەراتيۆتى سايكەستىگىن ۇلعايتۋ، ءبىزدىڭ اسكەري قۇرىلىمدار مەن ارنايى قىزمەتتەردىڭ بىرلەسكەن ارەكەتىنىڭ ۇيلەسىمدىلىگىن جاقسارتۋ ماسەلەلەرىمەن دە اينالىسامىز. ءتيىستى ماسەلەلەر تۇراقتى نەگىزدە ۇ ق ش ۇ جەلىسى بويىنشا وتەتىن اسكەري وقۋ جيىندارىندا پىسىقتالىپ وتىرادى. ول وقۋ جيىنىن ءبىز ءارى قاراي كەڭەيتۋگە نيەتتىمىز»، - دەدى رەسەي پرەزيدەنتى.

ونىڭ ايتۋىنشا، بيىل كۇزدە اتالعان ۇيىمعا مۇشە ءۇش ەلدىڭ اۋماعىندا اسكەري وقۋ جيىنى وتەدى.

«بيىل كۇزدە قازاقستاندا، قىرعىزستاندا جانە تاجىكستاندا ءبىزدىڭ ۇيىمنىڭ وقۋ جيىندارىنىڭ تۇتاس سەرياسىن وتكىزۋ جوسپارلانعان. بۇل شارالار مەملەكەتتەرىمىزدىڭ اسكەري دايىندىعى مەن اسكەري قۇرىلىمدارىنىڭ ۇيلەسىمدىلىگىنىڭ ارتۋىنا، جالپى بىتىمگەرلىك الەۋەتتىڭ كۇشەيۋىنە مۇمكىندىك تۋعىزاتىنىنا سەنىمدىمىن»، - دەدى ۆلاديمير پۋتين.

بۇعان دەيىن پرەزيدەنت قاسىم-جومارت توقايەۆ ۇجىمدىق قاۋىپسىزدىك شارتىنا قول قويىلعانىنا 30 جىل جانە ۇيىمنىڭ قۇرىلعانىنا 20 جىل تولۋىنا وراي وتەتىن مەرەيتويلىق سامميتكە قاتىسۋ ءۇشىن ماسكەۋگە بارعانى حابارلانعان ەدى.

سامميتكە ۇيىمعا مۇشە ەلدەردىڭ باسشىلارى قاتىسادى دەپ جوسپارلانعان. 2022-جىلى ۇجىمدىق قاۋىپسىزدىك شارتى ۇيىمىنا ارمەنيا رەسپۋبليكاسى ءتوراعالىق ەتىپ جاتىر. جيىن بارىسىندا ۇ ق ش ۇ- نىڭ دامۋ بولاشاعى تالقىلانىپ، ۇيىمنىڭ مەرەيتويىنا ارنالعان مالىمدەمە قابىلداندى.

ۇجىمدىق قاۋىپسىزدىك تۋرالى شارتقا (ۇ ق ت) 1992-جىلعى 15- مامىردا تاشكەنتتە قول قويىلدى. 2002-جىلعى 14- مامىردا ۇجىمدىق قاۋىپسىزدىك كەڭەسىنىڭ ماسكەۋدە وتكەن سەسسياسىندا ۇجىمدىق قاۋىپسىزدىك تۋرالى شارتقا قاتىسۋشى مەملەكەتتەر اراسىنداعى ىنتىماقتاستىقتىڭ تەتىكتەرى مەن قۇرىلىمدارىن حالىقارالىق ايماقتىق ۇيىم - «ۇجىمدىق قاۋىپسىزدىك شارت تۋرالى ۇيىمعا» وزگەرتۋ، وعان ءتيىستى مارتەبە بەرۋ تۋرالى شەشىم قابىلدادى.

2003-جىلعى 18- قىركۇيەكتە ۇ ق ش ۇ جارعىسى ءوز كۇشىنە ەندى. ۇجىمدىق قاۋىپسىزدىك شارت ۇيىمىنا ارمەنيا، بەلارۋس، قازاقستان، قىرعىزستان، رەسەي، تاجىكستان كىرەدى.