شەتەلدەگى قانداستار تۋرالى تىڭ مالىمەتتى قامتىعان تاريحي كىتاپتىڭ تۇساۋى كەسىلدى
16 مامىر 16:16

شەتەلدەگى قانداستار تۋرالى تىڭ مالىمەتتى قامتىعان تاريحي كىتاپتىڭ تۇساۋى كەسىلدى

نۇر-سۇلتان. قازاقپارات - الماتىدا 15- مامىر كۇنى «سارباس شەجىرەسى» دەپ اتالاتىن تاريحي- دەرەكتى، تانىمدىق شەجىرە كىتاپتىڭ تۇساۋكەسەرى ءوتتى، دەپ حابارلايدى قازاقپارات.

تۇساۋكەسەرگە رەسپۋبليكانىڭ ءار تۇكپىرىنەن تاريحشى، عالىم، اقىن-جازۋشىلار قاتىسىپ، ءتۇرلى بايانداما جاسادى.

سونداي-اق اتالعان شاراعا شۆەتسيا، فرانتسيا، تۇركيا، قىتاي ەلدەرىندە تۇراتىن قانداستارىمىز دا ونلاين قاتىسىپ، وزدەرىنىڭ جۇرەكجاردى لەبىزىن ءبىلدىرىپ، سالەم جولدادى. كەشكە جينالعان كوپشىلىك قازىر ۇمىت بولا باستاعان بايىرعى قازاقتىڭ قيسسا-داستان وقۋ مانەرىنە كۋا بولدى.

اتالمىش كىتاپقا تاريحشى، عالىم جامبىل ارتىقبايەۆ، سەرىك مۇستافا ۇلى، قاجىمۇرات تولەگەن ۇلى، جازۋشى اپەتاي مۇقاراپ ۇلى، ءجادي شاكەن ۇلى سىندى قالامگەرلەردىڭ عىلىمي ماقالالارى، زەرتتەۋ ەڭبەكتەرى ەنگەن.

كەش سوڭى اسەم ءان مەن ءتاتتى كۇيگە كەزەك بەرىپ، كونسەرتتىك باعدارلاماعا ۇلاستى.

ايتا كەتەيىك، اتالعان كىتاپتا الەمنىڭ ءار تۇكپىرىندە تارىداي شاشىلعان قانداستارىمىز تۋرالى سونى مالىمەتتەر ايتىلعان.

وسىنداي دەرەكتەردىڭ ءبىرى قازاقتىڭ ەكىنشى بەيبارىس سۇلتانى اتانعان ابدوللا قاجى سارى ۇلى ءال-بۇقاري تۋرالى جازىلعان. ابدوللانىڭ ءوز ەسىمى - شاكەن سارى ۇلى.

1927-جىلى قىتايداعى ءور التايدىڭ شىڭگىل اۋدانىندا تۋعان. 1940-جىلى قازاقتى قىناداي قىرعان مافۋفاڭنىڭ تالاۋىنا ءتۇسىپ، 13 جاسىندا تۋعان ەلىنەن ايىرىلىپ، ساۋداگەر ۇيعىرعا ساتىلىپ كەتكەن. 1941-جىلى سول ۇيعىرمەن بىرگە ساۋد ارابياسىنا بارىپ، سوندا قالعان. 1942-جىلدان باستاپ مەككە قالاسىنداعى جەتىم بالالار ۇيىندە تاربيەلەنگەن.

1946-جىلى مەككە قالاسىنداعى مەملەكەتتىك اسكەري ۋنيۆەرسيتەتكە قابىلدانادى. كەيىن شەكارا قورعانىس ارمياسىندا، شەكارا قورعانىسىنىڭ ەسىرتكىمەن كۇرەس بولىمىندە ماڭىزدى قىزمەتتە بولادى.

وتكەن عاسىردىڭ 70-جىلدارى مەككە قالاسىنىڭ اكىمى مىندەتىن 10 جىلعا تاياۋ اتقارعاننان كەيىن ساۋد پاتشاسىنىڭ كومەكشىسى، ءۋازىرى قىزمەتىنە دەيىن كوتەرىلگەن.

سونىمەن بىرگە تۇركى، قازاق جۇرتىنا تانىمال قاجىلاردىڭ قامقورى، موڭعولياداعى بايان ولگەي ورتالىق مەشىتىن سالدىرعان ۇلتشىل ازامات.

شاكەن قاجى سارى ۇلى 2000-جىلى ساۋد ارابياسىنىڭ جيددا قالاسىندا 73 جاسىندا دۇنيەدەن ءوتتى.

اۆتور: باقىتجول كاكەش

جاڭالىقتار