اقجارقىن تۇرلىباي قىتايدان قازاقستانعا قايتارىلۋى مۇمكىن

نۇر- سۇلتان. قازاقپارات - قىتايدا ءومىر بويىنا باس بوستاندىعىنان ايىرىلعان اقجارقىن تۇرلىباي قازاقستانعا قايتارىلۋى مۇمكىن.

بۇل جايىندا اقجارقىننىڭ ادۆوكاتى سۇڭقار نۇرماعامبەتوۆ Facebook پاراقشاسىندا جازدى، دەپ حابارلايدى قازاقپارات ءتىلشىسى.

«2014 -جىلى گۋاڭجۋ اۋەجايىندا اقجارقىن تۇرلىباي ۇستالدى. سول جىلى حوشيمين قالاسىندا روستوۆتىق ماريا داپيركا تۇتقىندالدى. زاڭسىز ەسىرتكى اينالىمىنا قارسى كۇرەس ورتالىق ازيا وڭىرلىك اقپاراتتىق كوورديناتسيالىق ورتالىعى قىزداردى نيگەريالىق ەسىرتكى توبىنىڭ قۇربانىنا اينالعان دەپ مويىندادى. ەكەۋى دە ءومىر بويىنا باس بوستاندىعىنان ايىرىلعان. اقجارقىن تۇرلىبايدىڭ جاقىن ارادا قازاقستانعا قايتارىلۋىن كۇتەمىز»، - دەپ جازدى سۇڭقار نۇرماعامبەتوۆ.

ەسكە سالا كەتەيىك، 21 جاستاعى قازاق قىزى اقجارقىن تۇرلىباي 2014 -جىلدىڭ ناۋرىز ايىندا قىتايدىڭ مالايزيامەن شەكاراسىندا ەسىرتكىمەن ۇستالعان بولاتىن. ونىڭ جۇك سومكەسىنەن 4,5 كەلى ەسىرتكى تابىلدى، اقجارقىن ول تۋرالى بىلمەيتىنىن مالىمدەگەن. وسى ءىس بويىنشا قىتايدىڭ گۋاڭجوۋ سوتى اقجارقىن تۇرلىبايدى ەسىرتكى كونترابانداسىمەن ايىپتاپ، ءومىر بويىنا باس بوستاندىعىنان ايىردى. 2016 -جىلى 7- ساۋىردە اپەللياتسيالىق ساتىداعى سوت اقجارقىن تۇرلىبايدى ءومىر بويىنا باس بوستاندىعىنان ايىرۋ جازاسىن وزگەرتۋ جانە ءىستى ءبىرىنشى ساتىداعى سوتتىڭ قاراۋىنا جىبەرۋ تۋرالى قاۋلى ەتكەن.

بۇعان دەيىن ق ر مەن ق ح ر مەملەكەتتەرىنىڭ قۇزىرلى ورگاندارى ءبىر كەلىسىمگە كەلگەن جاعدايدا قىتايدا سوتتى بولعان اقجارقىن تۇرلىباي جازاسىن ءوز ەلىندە وتەۋى مۇمكىن ەكەندىگىن بۇعان دەيىن دە حابارلاعان ەدىك. قازاقستان پرەزيدەنتى قاسىم- جومارت توقايەۆ تا قىتايعا مەملەكەتتىك ساپارى بارىسىندا وسى ەل تۇرمەسىندە جاتقان وتانداسىمىز اقجارقىن تۇرلىبايدىڭ ماسەلەسىن كوتەرگەن بولاتىن.

اۆتور: مارلان جيەمباي