جىل اياعىنا دەيىن بۇكىل اۆتوسالوندارعا كولىك جەتكىزىلەدى - انار ماقاشيەۆا

None
نۇر- سۇلتان. قازاقپارات - جىل اياعىنا دەيىن ەلدەگى بۇكىل اۆتوسالوندارعا وتاندىق كولىكتەر جەتكىزىلەدى. وعان ەلدەگى وندىرۋشىلەردىڭ قابىلەتى جەتەدى، دەپ حابارلايدى قازاقپارات ءتىلشىسى.

«قازاقستان اۆتوبيزنەس قاۋىمداستىعىنىڭ» وكىلى انار ماقاشيەۆا 4 پايىزدىق اۆتونەسيەنىڭ قايتا جاندانۋى بايلانىستى وتكەن بريفينگىدە وسىنداي مالىمەت ايتتى. شارا بارىسىندا جۋرناليستەر 4 پايىزدىق اۆتونەسيەگە سۇرانىس كوپ بولعانىمەن، سالونداردا كولىك از ەكەنىن ايتىپ، كەزەكتى قالاي سەيىلتۋگە بولاتىنىن سۇرادى.

«اۆتوسالونداردا كولىكتەر بار. بىلتىر ءبىزدىڭ Hyundai Trans Kazakhstan جانە «سارى ارقا اۆتوپروم» دەيتىن ەكى ءوندىرۋشىمىز جالپى كولەمدە 90 مىڭداي كولىك وندىرگەن بولاتىن. بيىل ءوندىرىس كولەمى 20 پايىز وسەدى دەگەن بولجام بار. سوندا جىل اياعىنا دەيىن قازاقستان قالالارىنداعى اۆتوسالونداردىڭ بارىندە كولىك بولادى دەپ توپشىلاپ وتىرمىز. قازىر ءاربىر اۆتوءوندىرۋشى وزدەرى ەلەكتروندى كەزەك ءتۇزىپ جاتىر. 4 پايىزدىق نەسيە الۋشى قازاقستان اۋماعىنداعى اۆتوسالوندارعا كەلىپ، تاڭداي الادى. ياعني، ادام ءوزى ساتىپ العىسى كەلەتىن كولىكتى تاڭدايدى. سودان كەيىن تاڭدالعان كولىك قاشان دايىن بولاتىنىن ايتادى. اي سايىن وندىرىستەن اۆتوسالوندارعا كەلىپ تۇسەتىن كولىكتەر سول تۇتىنۋشىلاردىڭ VIN- كود كورسەتىلگەن ەسەپتەسۋ پاراعى بويىنشا ۇلەستىرىلەدى. بۇل ەرەجە بۇكىل اۆتوسالوندارعا ورتاق»، - دەدى انار ماقاشيەۆا.

ايتا كەتەيىك، بۇگىن قازاقستاندا 4 پايىزدىق جەڭىلدەتىلگەن اۆتونەسيە بەرۋ باستالدى.

اۆتور: ەسىمجان ناقتىباي


سوڭعى جاڭالىقتار