قىتايلىقتار اباي الەمىمەن تانىسۋدا - شەتەلدەگى قازاق ءتىلدى ب ا ق- قا شولۋ

None
None
نۇر- سۇلتان. قازاقپارات - «قازاقپارات» ح ا ا ادەتتەگىدەي شەتەلدە قازاق تىلىندە تارايتىن اقپارات كوزدەرىنە اپتالىق شولۋىن ۇسىنادى.

تۇرىك شايىرلارىن قازاقشا سويلەتتى - TRT


انكارادا قازاقتىڭ اقيىق اقىنى سۆەتقالي نۇرجاننىڭ اۋدارمالارى جيناقتالعان «تۇرىك شايىرلارى» اتتى جاڭا كىتابىنىڭ تۇساۋكەسەرى ءوتتى. بۇل - تانىمال اقىننىڭ 60 جاس مەرەيتويىنىڭ قارساڭىندا جارىق كورىپ وتىرعان سۇبەلى ەڭبەگى، دەپ حابارلايدى «تۇركيا راديو تەلەديدار» اقپاراتتىق اگەنتتىگى.


اتالعان باسىلىمىنىڭ دەرەگىنشە، قالامگەر تۇرىك اۋليە اقىندارىنىڭ ەڭ تاڭداۋلى شىعارمالارىن قازاقشا سويلەتكەن. اتاپ ايتقاندا ءماۋلانا ءجالالاددين رۋمي، يۋنۋس ەمرە، ءپىر سۇلتان ابدال، نيازى مىسىر حازىرەت سەكىلدى ۇلى اقىنداردىڭ سوزدەرى قازاق تىلىندە ءۇن قاتادى. الماتىداعى «ەل- شەجىرە» باسپاسىنان جارىق كورگەن جيناق ەكى تىلدە (قازاق جانە تۇرىكشە) وقىرمانعا ۇسىنىلىپ وتىر. حالىقارالىق تۇرىك مادەنيەتى ۇيىمىنىڭ باس حاتشىسىنىڭ ورىنباسارى بيلال چاكىدجى اتالمىش شارانىڭ بەتاشارىندا ءسوز سويلەپ، اقىندى مەرەيلى جاسىمەن قۇتتىقتاپ، تۇرىكسوي شاڭىراعى استىندا كىتابىنىڭ تۇساۋكەسەرىنىڭ وتكىزىلىپ جاتقانىنا باۋىرلاس ەل رەتىندە قۋانىشتى سەزىمدە ەكەنىن جەتكىزدى.


ول اقىندى قازاق پوەزياسىنىڭ بەدەلدى وكىلى دەپ اتاپ، قازاق حالقىنىڭ سەزىمىنە ءتارجىمان بولىپ، قازاق ساناسىنا ولەڭدەرىنەن ورىن بەرگەنىن اتاپ كورسەتكەن. TRT- نىڭ كەلتىرگەن دەرەگىنە سۇيەنسەك، پروفەسسور، دوكتور وسمان حوراتا دا سۆەتقالي اقىننىڭ كىتابىن جوعارى باعالادى. سالتاناتتى شارا بارىسىندا تۇرىكسوي ۇيىمىنىڭ باس حاتشىسىنىڭ ورىنباسارى بيلال چاكىدجى سۆەتقالي اقىنعا «اباي» مەدالىن تاقتى.

«تۇرىك شايىرلارى» اتتى كىتاپتىڭ تۇساۋكەسەرىندە حالىقارالىق تۇرىكسوي ۇيىمى مەن «قازاق اۋەندەرى» اراسىندا ىنتىماقتاستىق جونىندە مەموراندۋمعا قول قويىلدى.

وزبەكستان مەن قازاقستان اراسىنداعى جولاۋشىلار پويىزدارىنىڭ قوزعالىسى قالپىنا كەلتىرىلۋدە - «ءو ز ا»


«وزبەكستان تەمىر جولدارى» كومپانياسى «قازاقستان تەمىر جولدارى» اكسيونەرلىك قوعامىمەن كەلىسە وتىرىپ، تەمىرجول ارقىلى جولاۋشىلار تاسىمالىن قالپىنا كەلتىرىلۋ تۋرالى حابارلادى.

بۇل تۋرالى وسى اپتادا وزبەكستاننىڭ «ءو ز ا» مەملەكەتتىك اقپاراتتىق اگەنتتىگىندە جاريالاندى.

وزبەكستاندىق ب ا ق- تىڭ دەرەگىنشە، 15- مامىردان نوكىس- بەينەۋ- نوكىس باعىتىندا، 16-مامىردان الماتى-2-تاشكەنت- الماتى-2 باعىتى بويىنشا پويىزدار قاتىناۋى اشىلادى. رەيستەر اپتاسىنا ءۇش رەت ورىندالادى.

15- مامىردان باستاپ 647/648 ساندى نوكىس - بەينەۋ - نوكىس جولاۋشىلار پويىزى قاتىناي باستايدى. 16- مامىردان باستاپ الماتى-2 - تاشكەنت - الماتى-2 باعىتى بويىنشا 1/2 ساندى («تۇلپار- تالگو» ) پويىزى جولعا شىعادى.

ايتا كەتەيىك، بيلەتتەردى ەلەكتروندى تۇردە جانە كاسسادان ساتىپ الۋ مۇمكىن، ال قازاقستان شەكاراسىنان ءوتۋ ءۇشىن ەلەكتروندى بيلەتتى ا4 فورماتىنداعى قاعازعا باسىپ شىعارۋ قاجەت.

ەركىنبەك بودەن ۇلى ايماقتىق جۋرناليستەر وداعىنىڭ ءتوراعاسى بولىپ تاعايىندالدى - Kaznews


بايان- ولگەي ايماعىنىڭ جۋرناليستەر وداعى «دۇنيەجۇزىلىك باسپا ءسوز ەركىندىگى» كۇنىنە وراي 11- مامىردا كونفەرەنسيا ۇيىمداستىردى. بۇل كونفەرەنسياعا ايماقتاعى بارلىق ب ا ق وكىلدەرى، بەلسەندى تىلشىلەر قاتىستى.

وداق ءتوراعاسىنىڭ قىزمەتىن اتقارۋشى ەركىنبەك بودەن ۇلى وداقتىڭ تاريحىن تانىستىرىپ، بۇعان دەيىنگى اتقارعان جۇمىستارى جونىندە ەسەپ بەردى، دەپ حابارلايدى موڭعوليانىڭ Kaznews اقپاراتتىق پورتالى حابارلادى.

Kaznews-تىڭ دەرەگىنشە، وداقتىڭ بۇرىنعى ءتوراعالارى سابەت ناسىر ۇلى مەن ومىربەك بيقۇمار ۇلى ب ا ق سالاسىنداعى زاڭنامالار، جاڭا مەديالار تۋرالى، حوۆدا ۋنيۆەرسيتەتىنىڭ ايماقتاعى فيليالىنىڭ عىلىمي جەتەكشىسى حينالعان جىلقىايدار قىزى جۋرناليستيكا سالاسى جانە جۋرناليستەردىڭ قوسءتىلدى ءبىلىمى تۋرالى بايانداما جاساعان.

«ومىربەك بيقۇمار ۇلى وداق ءتوراعاسىن راسىمدەۋگە بايلانىستى ۇسىنىس ءبىلدىرىپ، ب ا ق وكىلدەرى ءبىراۋىزدان ەركىنبەك بودەن ۇلىن بايان- ولگەي ايماعىنىڭ جۋرناليستەر وداعى ءتوراعاسىنا تاعايىندادى»، دەپ جازدى Kaznews.

سونىمەن قاتار اتالعان ءىس- شارادا ايماقتىق بۇقارالىق راديوسىنىڭ ءتىلشىسى مارجان كاكەي قىزى مەن دەربەس تەلەارناسىنىڭ جۋرناليستى جۇلدىز جۇماعۇل قىزى سىندى ءبىرقاتار ب ا ق وكىلدەرى ماراپاتتالدى.

شي جينپيڭمەن بىرگە اباي الەمىمەن تانىسايىق - «حالىق گازەتى»

قىتايدىڭ «حالىق گازەتى» سايتىندا وسىنداي تاقىرىپتاعى اقپاراتتىق بەينەجازبا شىقتى. بۇل دۇنيەجۇزىلىك كىتاپ وقۋ كۇنىنە وراي جاريالاندى.


«ق ح ر ءتوراعاسى شي جينپيڭ 2013 -جىلدىڭ 7- قىركۇيەگىندە ورتالىق ازياعا ساپارى كەزىندە قازاقستانداعى نازاربايەۆ ۋنيۆەرسيتەتىنە بارىپ، «حالىقتار دوستاستىعىن ىلگەرلەتۋ جانە جارقىن بولاشاق قۇرۋ» دەگەن اتپەن ءدارىس وقىعان بولاتىن. سول جولعى سويلەگەن سوزىندە شي جينپيڭمەن قازاقتىڭ ويشىل اقىنى ابايدىڭ: «دۇنيە ۇلكەن كول، زامان سوققان جەل، الدىڭعى تولقىن اعالار، ارتقى تولقىن ىنىلەر، كەزەكپەنەن ولىنەر، باياعىداي كورىنەر» دەگەن تەرەڭ ماعىنالى ءسوزىن سىلتەمەگە الىپ، جاستاردىڭ اسار اسۋى بيىك، جاستار بولاشاقتىڭ ىرگە تاسىن قالاۋشىلار، جاستار ۇلتتىڭ بولاشاعى» دەگەن تىلەگى مەن سەنىمىن بىلدىرگەن بولاتىن»، دەپ باستايدى بەينەجازبا اۆتورى سويلەگەن ءسوزىن.

اۆتور «دۇنيەجۇزىلىك كىتاپ وقۋ كۇنى» بايلانىسىمەن شي جينپيڭمەن بىرگە كىتاپ الەمىن ارالاۋدى ءجون سانايدى. سونىمەن قاتار ول ۇلى اقىندى كورەرمەندەرگە تانىستىرا كەلىپ، اباي قازاق دالاسىنىڭ تەمىر قازىعى ىسپەتتى ەكەنىن تىلگە تيەك ەتەدى. ونىڭ ايتۋىنشا، ابايدىڭ «قارا سوزدەرى» ۇلى تۇلعا شىعارماشىلىعىنىڭ شوقتىعى بيىك بولىگى. ول اباي قارا سوزدەرىنەن ۇزىندىلەر كەلتىرە كەلىپ، ءوز ويىن «اباي قارا سوزدەرى - قازاق حالقىنىڭ الەم مادەنيەتىنە سىيلاعان تەڭدەسسىز رۋحاني بايلىعى»، دەگەن سوزىمەن تۇيىندەيدى.

بايان- ولگەي قازاق تەاترى مونعولياداعى باسقا ونەر ۇيىمىمەن تىعىز ىنتىماقتاستىقتا بولادى - Kaznews


بايان- ولگەي ايماعىنىڭ م. قۇرمانحان اتىنداعى مۋزىكالى دراما تەاترى مەن بايانحونگور ايماعىنىڭ مۋزىكالى دراما تەاترىنىڭ بىرلەسكەن شىعارماشىلىق كەشى 17- مامىردا ولگەي قالاسىندا، 19- مامىردا بايانحونگور قالاسىندا العاش رەت وتەدى، دەپ حابارلايدى Kaznews.

موڭعوليالىق ب ا ق- تىڭ دەرەگىنشە، م. قۇرمانحان اتىنداعى مۋزىكالى دراما تەاترىنىڭ قازاق ۇلت اسپاپتار وركەستەرى موڭعول شىعارمالارىن، ال بايانحونگور ايماعىنىڭ تەاترىنىڭ وركەستەرى قازاق شىعارمالارىن كورەرمەن نازارىنا ۇسىنباق.

«بايان- ولگەي ايماعىنىڭ م. قۇرمانحان اتىنداعى مۋزىكالى دراما تەاترىنىڭ ديرەكتورى سايگۇلىك ءجانىمحان قىزىنىڭ ايتۋىنشا، بۇل جولعى ءىس- شارا ەكى ايماقتىڭ مادەني قارىم- قاتىناسىن ناسيحاتتاۋعا، دارىپتەۋگە ۇلەس قوسادى»، دەپ جازادى Kaznews.

قازاقستان - گۇلىستاننىڭ ستراتەگيالىق ساۋدا سەرىكتەسى - Parstoday

يراننىڭ سولتۇستىك وبلىستارى قازاقستانمەن ارىپتەستىكتە ماڭىزعا يە، دەپ حابارلايدى Parstoday اقپارات اگەنتتىگى.

اتالعان ب ا ق- تىڭ كەلتىرگەن دەرەكتەرىنە سۇيەنسەك، گۇلىستان وبلىسى تەڭىز جولىمەن قوسا، تاس جانە تەمىر جول دالىزدەرى ارقىلى تۇركىمەنستان تەرريتورياسىنان ءوتىپ، قازاقستانمەن بايلانىسىپ جاتىر.


بۇل وبلىستا قازاقتاردىڭ باسقا ورتاازيالىق ۇلتتارىمەن تاتۋ تىرشىلىك ەتۋى گۇلىستان مەن قازاقستان اراسىندا مادەني بايلانىستاردى ارتتىرا ءتۇستى. مۇنىمەن قوسا، اتالعان وبلىستىڭ ورتا ازيامەن، اسىرەسە قازاقستانمەن ورتاق تاريحى، ادەت- عۇرپى، سالت- ءداستۇرى مەن ورتاق مادەنيەتى قازاق ەلىمەن كوبىرەك جانە جاقسىراق تۇسىنىستىك ورناۋىنا جاعداي جاسادى. وسى ەرەكشەلىكتەرگە بايلانىستى قازاقستان گۇلىستاننىڭ ستراتەگيالىق ماقساتتارىندا ايرىقشا ورىنعا يە.

«قازاقستان تۇراقتى، باي دا مىقتى ەل رەتىندە گۇلىستان وبلىسى ءۇشىن ماڭىزدى ساۋدا سەرىكتەس سانالادى. بۇل گۇلىستاننىڭ ەرەكشە گەوگرافيالىق جاعدايىنا بايلانىستى ايتىلعان. باسقا جاعىنان وسى وبلىستا تۇراتىن قازاقتاردىڭ تالپىنىستارى ناتيجەسىندە قازاقستانمەن ساۋدا- ەكونوميكالىق قاتىناس كۇن وتكەن سايىن نىعايىپ كەلەدى. گورگان مەن اقتاۋ اراسىندا تىكەلەي رەيس تە سوڭعى جىلدارى وسى قاجەتتىلىكتەردى وتەۋ ءۇشىن اشىلدى. باسقا جاعىنان گۇلىستان وبلىسىنىڭ تۇركىمەنستاننىڭ بالكاناباد وبلىسى ارقىلى قازاقستاننىڭ ماڭعىستاۋ وبلىسىنا تەمىر جولمەن جالعانۋى دا سوڭعى جىلداردا مول مۇمكىندىك تۋدىردى...»، دەپ جازادى يراندىق ب ا ق.

اۆتور: بەيسەن سۇلتان


سوڭعى جاڭالىقتار