سەگىزىنشى قاباتتان قۇلاي جازداعان قىزدىڭ اناسى كوپتىڭ كوكەيىندەگى سۇراققا جاۋاپ بەردى
16 مامىر 08:40

سەگىزىنشى قاباتتان قۇلاي جازداعان قىزدىڭ اناسى كوپتىڭ كوكەيىندەگى سۇراققا جاۋاپ بەردى

نۇر- سۇلتان. قازاقپارات- ەۋرازيا ءبىرىنشى ارناسى سەگىزىنشى قاباتتان قۇلاي جازداعان 3 جاسار قىزدىڭ اناسى العاش رەت كوپتىڭ كوكەيىندەگى سۇراقتارعا جاۋاپ بەردى.

ول 11- مامىر كۇنى قايدا بولعانىن ايتىپ، بالاسىن قۇتقارىپ قالعان جىگىتتەرگە العىس ءبىلدىردى، دەپ جازادى KAZ. NUR. KZ ءتىلشىسى.

ەۋرازيا ءبىرىنشى ارناسىنا بەرگەن سۇحباتىنان بەلگىلى بولعانداي، ايەل قىزىن جالعىز ءوزى تاربيەلەپ وتىر. كەلىنشەك قىزىنىڭ قاتاردان قالماۋى ءۇشىن ەكى جۇمىستا ىستەيتىنىن جەتكىزگەن. «11- مامىر - مەن ءۇشىن ومىرىمدە ەستەن كەتپەس كۇن بولدى. بالام بالاباقشاعا بارمايدى، وزىممەن بىرگە جۇمىسقا الىپ جۇرەم. بالاباقشاعا بەرەيىن دەسەم، قازىر ءبارى قىمبات. 70 مىڭنان تومەن ەمەس. دوتاتسيامەن بەرەيىن دەسەم، مەنىڭ بالامنىڭ كەزەگى كەلگەنشە مەكتەپكە باراتىن ۋاقىتى بولادى»، - دەيدى قىزدىڭ اناسى.

وسىلايشا ءبۇلدىرشىن تاڭنىڭ اتىسىنان كۇننىڭ باتىسىنا دەيىن اناسىنىڭ قاسىندا جۇرەدى ەكەن. سول كۇنى اناسى الىس جولدان كەلگەندىكتەن، قىزىنىڭ ۇيقىسىن قيماي ونى ىنىسىنە قالدىرىپ كەتكەنىن ايتادى. ءبىراق ونى دا جۇمىسقا شاقىرىپ بالا ۇيدە بىرنەشە مينۋت بويى جالعىز قالعان. «بالام 1-2 ساعات بولسا دا ۇيىقتاسىن دەپ، ۇيقىسىن قيماي، سول كۇنى ءبىرىنشى رەت ۇيگە تاستاپ كەتكەنمىن. جۇمىسىم جاقىن بولعان سوڭ، بارام دا كەلەم دەپ ويلادىم»، - دەيدى ول.

ول قىزىنىڭ سەگىزىنشى قاباتتا سالبىراپ تۇرعانىن دالادا شۋلاعان ادامداردان بىلگەن. «دالادا قانشا ادام، پوليتسيا شۋلاپ جاتتى. نە بولدى دەپ سۇراپ ەدىم، سەگىزىنشى قاباتتا ءبىر قىز تۇر دەدى. مەن ءوز قىزىمدى ءولىپ قالدى دەپ ويلادىم. ودان كەيىن نە بولعانى ەسىمدە جوق»، - دەپ ەسكە الادى ول.

ايەل قىزىن قولىنا العان سوڭ عانا ەسىن جيعان. بەلگىلى بولعانداي، 3 جاسار قىز ويانىپ كەتىپ، اناسىن ىزدەگەن. «مەنى ىزدەگەن عوي، ماما دەپ. كەتكەن كەزدە تەرەزەلەردى جاۋىپ كەتكەنمىن، ءتىپتى ويانىپ قالسا تەرەزەگە شىقپاسىن دەپ ساقتانىپ، ورىندىقتاردى دا بالكونعا كىرگىزىپ كەتكەنمىن»، - دەيدى ول.

اناسىنىڭ ايتۋىنشا، قىزى اياعىنىڭ استىنا جۇمساق ويىنشىقتارى مەن جاستىعىن قويىپ تەرەزەگە شىققان. وسى ورايدا كەلىنشەك قىزىن قۇتقارىپ قالعان جىگىتكە العىسىن ايتتى. «كەشەگى كىسىگە دە كوپ راحمەت! اللادان قايتسىن! ونداي نارسەگە ەكىنىڭ ءبىرى بارا بەرمەيدى»، - دەدى ول.

بولعان وقيعادان كەيىن كەلىنشەك قىزىنىڭ جانىنان ءبىر ءسات الىستاماعانىن، بۇل جاعداي وزىنە ءومىر بويىنا ساباق بولعانىن ايتادى. ەسكە سالا كەتەيىك، كىشكەنتاي قىزدى بيىكتەن قۇلاۋدان قۇتقارعان قوس جىگىت تە ەلەۋسىز قالعان جوق. ولارعا باس قالادان جاڭا پاتەر بەرىلدى.

اۆتور: ەلميرا اسقار قىزى

جاڭالىقتار