بوزىمبايەۆ: تەكەلىدە لاي كوشكىنىنەن زارداپ شەككەندەرگە باسپانا بەرىلەدى
«بۇگىن تەكەلىدە لاي كوشكىنى ءجۇردى. بىرنەشە جەكەمەنشىك تۇرعىن ءۇي ءبۇلىندى. وكىنىشكە وراي، 2016 -جىلى تۋعان قىز بالا قايتىس بولدى. جەدەل قىزمەتتەر ءوز جۇمىستارىن جۇرگىزۋدە. زارداپ شەككەندەرگە باسپانا بەرىلىپ، كومەك كورسەتىلەدى. مارقۇمنىڭ جاقىندارىنا قايعىرا كوڭىل ايتامىن»، - دەپ جازدى الماتى وبلىسىنىڭ اكىمى.
بۇگىن تۇسكى ساعات 13:00 شاماسىندا تەكەلىدەگى قونايەۆ كوشەسىندە لاي كوشكىنى ءجۇرىپ، بەس جاستاعى قىز بالا جوعالىپ كەتتى. كەشكى ساعات 18.15-تە بالانىڭ ءمايىتى لايلى ءۇيىندى استىنان تابىلدى. الماتى وبلىستىق توتەنشە جاعدايلار دەپارتامەنتىنىڭ الدىن الا اقپاراتىنا سايكەس، تەكەلى قالاسىنداعى لاي كوشكىنى 50 مەترگە دەيىن اقتى، ەنى 25 مەتر، بيىكتىگى 3,5 مەتر، كولەمى 4375 تەكشە مەتر. ءبىر جەكە تۇرعىن ءۇي قيرادى، ءبىر ءۇي بالشىقتىڭ استىندا قالدى، تۇرعىن ۇيلەردىڭ تاعى تورتەۋىنىڭ اۋلاسىنا بالشىق كىردى جانە قونايەۆ كوشەسىن باسىپ تاستادى. تۇرعىندار قاۋىپسىز جەردە.
اۆتور: سامال قابىشيەۆا