بۇل - قازاقستاننىڭ شىنايى دوسى بولعان شەيح حاليفاعا دەگەن مەملەكەت باسشىسىنىڭ قۇرمەتى
بۇل تۋرالى ق ر پرەزيدەنتىنىڭ باسپا ءسوز حاتشىسى رۋسلان جەلدىباي الەۋمەتتىك جەلىدە جازدى، دەپ حابارلايدى قازاقپارات.
«بۇگىن مەملەكەت باسشىسى قاسىم- جومارت توقايەۆ ابۋ- دابيگە ارنايى ۇشىپ بارىپ، بىرىككەن اراب امىرلىكتەرىنىڭ پرەزيدەنتى شەيح حاليفا بين زايد ءال ناحاياننىڭ قايتىس بولۋىنا بايلانىستى كوڭىل ايتتى. بۇل - قازاقستاننىڭ شىنايى دوسى بولعان شەيح حاليفاعا دەگەن مەملەكەت باسشىسىنىڭ قۇرمەتى. ويتكەنى، ول ايماقتىق جانە حالىقارالىق قوعامداستىقتاعى ەلىمىزدىڭ باستامالارى مەن ءىرى جوبالارىنا ءاردايىم جان- جاقتى قولداۋ كورسەتتى. ماسەلەن، شەيح حاليفا زايد ءال ناحايان نۇر- سۇلتان قالاسىنداعى مەكتەپ قۇرىلىسىنا 13 ميلليون دوللار، شىمكەنتتەگى پەريناتالدى ورتالىققا 25,5 ميلليون دوللار، سونداي- اق «قاراعاندى- نۇر- سۇلتان» اۆتوجولىن قايتا جوندەۋگە 22 ميلليون دوللار گرانت ءبولدى. كوروناۆيرۋس پاندەمياسىنىڭ قيىن- قىستاۋ كەزىندە امىرلىكتەر قازاقستانعا ءبىرىنشى بولىپ كومەك قولىن سوزدى. اتاپ ايتقاندا، 100 توننا مەديتسينالىق بۇيىم مەن قورعانىش زاتتارى، ارناۋلى كيىمدەر جانە باسقا دا قۇرال- جابدىقتار جىبەردى. شەيح حاليفانىڭ قولداۋىمەن قازاقستان مەن امىرلىكتەر اراسىندا ساۋدا- ەكونوميكالىق ىنتىماقتاستىق قارقىندى دامىدى»، - دەپ جازدى ر. جەلدىباي.
سونىمەن قاتار ول 2005-2021 -جىلدار ىشىندە امىرلىكتەردەن قازاقستانعا تارتىلعان جالپى تىكەلەي ينۆەستيتسيا 2,6 ميلليارد دوللاردى قۇرادى دەدى.
«بۇگىندە قازاقستاندا امىرلىكتەر كاپيتالىنىڭ قاتىسۋىمەن 276 بىرلەسكەن كاسىپورىن جۇمىس ىستەيدى. سونداي- اق، ەلوردادا قۇنى 1,6 ميلليارد دوللاردى قۇرايتىن كوپ فۋنكسيونالدى «ابۋ دابي پلازا» كەشەنىنىڭ قۇرىلىسى ءجۇرىپ جاتىر. بۇل - اسا ءىرى ەكىجاقتى ينۆەستيتسيالىق جوبا. قاسىم- جومارت كەمەل ۇلى ايتقانداي، قازاقستاندىقتار شەيح حاليفانى پاراساتتى باسشى، حالىقارالىق دەڭگەيدەگى بەدەلدى ساياساتكەر، كورنەكتى مەملەكەت قايراتكەرى، ەكىجاقتى ىنتىماقتاستىقتى نىعايتۋعا زور ەڭبەك سىڭىرگەن تاريحي تۇلعا رەتىندە ءاردايىم ەسىندە ساقتايدى. سونداي- اق مەملەكەت باسشىسى «قاسرۋ- ل مۋشريف» پرەزيدەنت سارايىندا جاڭادان سايلانعان ب ا ءا پرەزيدەنتى مۇحامماد يبن زايد ءال ناحاياندى قۇتتىقتاپ، ونىڭ جۇمىسىنا ساتتىلىك، حالقىنا وركەندەۋ تىلەدى. ايتا كەتەرلىك جايت، بۇگىن بىرىككەن اراب امىرلىكتەرىنە باسقا دا الەم ليدەرلەرى كەلىپ كوڭىل ايتىپ جاتىر. ماسەلەن، ۇلى بريتانيا پرەمەر- ءمينيسترى بوريس دجونسون، فرانسيا پرەزيدەنتى ەممانۋەل ماكرون، ا ق ش ۆيتسە- پرەزيدەنتى كامالا حارريس جانە ت. ب. لاۋازىمدى تۇلعالار»، - دەدى رۋسلان جەلدىباي.
ەسكە سالساق، مەملەكەت باسشىسى قاسىم- جومارت توقايەۆ ب ا ءا پرەزيدەنتى شەيح حاليفا بەن زايد ءال ناحاياننىڭ قايتىس بولۋىنا بايلانىستى وسى ەلدىڭ جاڭادان سايلانعان پرەزيدەنتى، ابۋ ءدابيدىڭ بيلەۋشىسى شەيح مۇحاممەد بەن زايد ءال ناحايانعا جانە بيلەۋشى اۋلەتتىڭ مۇشەلەرى مەن امىرلىكتەر حالقىنا كوڭىل ايتۋ ءۇشىن بىرىككەن اراب امىرلىكتەرىنە كەلدى.