قاريا ما، شال ما؟
ءبىر وتباسىنىڭ بايتەرەگى بولىپ، ۇرپاعىنا ونەگەسىن ايتىپ وتىراتىن اقساقالداردىڭ ورنى قاشان دا ەرەك. ءتىپتى، قارياسىز ءۇيدى ەلەستەتۋدىڭ ءوزى قيىن. اتا تاربيەسىن كورىپ، وسيەت ءسوزىن ەستىپ، قاسيەتىن بويىنا سىڭىرگەن بالا تۇبىندە جامان بولماسى انىق. وسى قارت، قاريا، شال سوزدەرى جالپى ءبىر ماعىنانى بىلدىرگەنىمەن، ءارقايسىسىنىڭ جۇمسالۋ ورنى بار ەكەن. ءتىپتى، اقساقال دەپ باستاعان سويلەمىمنىڭ وزىندە بىرەسە اتا دەپ، بىرەسە اقساقال دەپ، ونىڭ بىرنەشە فورماسىن ايتىپ ءوتتىم. ءبىز مۇنىڭ اراجىگىن اجىراتىپ ءجۇرمىز بە؟
باۋىرجان اتامىزدان اۋليە ەشكىم جوق شىعار. راسىندا، ءبىز وسى كۇندەرى قاريا مەن اقساقالدىڭ ايىرماشىلىعىن بىلمەي جۇرگەن جايىمىز بار. باۋىرجان مومىش ۇلى اتامىز جاسى ۇلكەن قارتتاردى: - شال، - قاريا، - اقساقال - جانە ابىز دەپ تورتكە بولگەن. وتباسى، وشاق قاسىنان ۇزاپ شىعا الماي، ءتۇتىن اڭدىپ، ءۇي ارالاپ، ساياسي وسەك ايتاتىن قارت - شال. ءوز اۋلەتىن شاشاۋ شىعارماي ۋىسىندا ۇستاپ، بيلىك جۇرگىزگەن قارتتى - قاريا دەپ، تۇتاس ءبىر اۋىلدىڭ جىرتىعىن بۇتىندەپ، ايدىنىن اسىرىپ وتىرعان قارتتى - اقساقال دەپ، ەلدىڭ داۋ- دامايىن شەشىپ، ارعى- بەرگى تاريحتان اڭگىمە قوزعاپ، تۇلا بويىنا ۇلتتىق رۋح، ىزگى قاسيەتتەردى مولىنان سىڭىرگەن قارتتى - ابىز دەپ اتاعان ەكەن.
Massaget.kz