گەرمانيا راديوسى ديماش قۇدايبەرگەنگە باعدارلاما ارنادى
راديو جۇرگىزۋشىسى قازاقستاندىق ورىنداۋشىنىڭ شىعارماشىلىعىمەن قالاي تانىسقانىن جانە وعان باعدارلاما ارناۋدى شەشكەنى تۋرالى ايتتى، دەپ حابارلايدى Dimashnews.com.
نەمىس راديو جۇرگىزۋشىسى فلوريان گروگولل - ءوزىنىڭ Moviedance راديوستانتسياسىن ەكى جىلعا جۋىق باسقارعان كاسىبي ديدجەي. باستاپقىدا ونىڭ راديوسىندا فيلمدەردەن جانە بي مۋزىكاسىنان تانىمال ساۋندترەكتەر ايتىلاتىن. الايدا اۋديتوريادان جاقسى جاۋاپ الىپ، فلوريان ءوزىنىڭ راديوباعدارلاماسىن ارنايى تاقىرىپتىق ساعاتتارمەن تۇرلەندىردى، ولاردىڭ ءبىرى ديماش پەن ونىڭ تۋعان ەلى - قازاقستان مەن مۋزىكاسىنا ارنالدى.
فلوريان گروگولل Dimashnews رەداكسياسىنا ءوزىنىڭ دوسىنىڭ ۇسىنىستارىنىڭ ارقاسىندا قازاقستاندىق ورىنداۋشىنىڭ شىعارماشىلىعىمەن العاش رەت تانىسقانىمەن ءبولىستى.
«مەن ديماشتىڭ ورىنداۋىن سلاۆيان بازارىنداعى S. O. S انىمەن كوردىم، الدىمەن ونىڭ ءاندى جاندى داۋىستا ورىندايتىنىنا سەنە المادىم. سول كۇنى مەن بۇل قويىلىمدى 4 رەت قايتا قارادىم، سودان كەيىن ورىنداۋشىنىڭ ءار بەينەكليپىن كورە باستادىم، كەيبىر اندەردە ءتىپتى كوزىمە جاس كەلدى»، - دەپ ءبولىستى راديو جۇرگىزۋشىسى.
وسىلايشا، Dimash Fanclub Deutschland فان- كلۋبىمەن بىرلەسىپ ساۋالناما جۇرگىزە وتىرىپ، فلوريان قازاقستاندىق ارتىسكە ارنالعان ءوزىنىڭ العاشقى باعدارلاماسى ءۇشىن بىرنەشە ءاندى تاڭدادى. ەفير «Dimash Igor Special» اتاۋىمەن ءوتتى، وعان يگور كرۋتويمەن بىرگە جازىلعان ديماشتىڭ اندەرى، سونداي- اق قازاق تىلىندەگى «Samaltau»، «Daididau» ، «Umytylmas kun» جانە «Mahabbat ber magan» بىرنەشە كومپوزيتسياسى كىردى.
16-مامىردا فلورياننىڭ تاعى ءبىر «2decks Radio» راديوستانتسياسىندا قازاقستاندىق ارتىسكە ارنالعان «ديماشتىڭ ۇزدىگى» اتتى كەزەكتى باعدارلاما وتەدى.
www.24.kz