پەتروپاۆل ماڭىندا قامىس ورتەنىپ، مۇناي قويمالارىنا قاۋىپ ءتوندى
ءورت سوندىرۋشىلەر ءجىتى قيمىلداپ، ۇلكەن اپاتتىڭ الدىن الدى، دەپ حابارلايدى قازاقپارات ءتىلشىسى.
سولتۇستىك قازاقستان وبلىسى توتەنشە جاعدايلار دەپارتامەنتى باسپا ءسوز قىزمەتىنىڭ مالىمەتىنشە، پەتروپاۆلدىڭ سىرتىنداعى ونەركاسىپتىك ايماقتا، اۋەزوۆ كوشەسى، 266 مەكەنجايىندا ءورت شىققاندىعى تۋرالى حابارلاما «101» قىزمەتىنە ساعات 9.12 مينۋت كەتكەندە تۇسكەن. وقيعا ورنىنا پەتروپاۆلدىڭ ءورت ءسوندىرۋ قىزمەتتەرى جۇمىلدىرىلدى. ءورتتىڭ باتپاقتى اۋماقتا شىعۋى، جەل جانە جاقىن ماڭدا وندىرىستىك نىسانداردىڭ، سونىڭ ىشىندە 300 مەتر جەردە مۇناي قويمالارىنىڭ بولۋى مامانداردىڭ جۇمىسىن قيىنداتا ءتۇستى. قىزىل جالىنمەن كۇرەستە ءورت سوندىرۋشىلەرمەن بىرگە وڭتۇستىك- ورال تەمىرجولىنىڭ پەتروپاۆل بولىمشەسىنىڭ اسكەريلەندىرىلگەن ءورت ءسوندىرۋ كومانداسى، جەرگىلىكتى اتقارۋشى ورگانداردىڭ، «قىزىلجار سۋ» ج ش س كۇش- قۇرىلىمدارى، مەملەكەتتىك ەمەس ءورت ءسوندىرۋ قىزمەتىنىڭ ماماندارى - بارلىعى 73 ادام جانە 21 تەحنيكا جۇمىس ىستەدى.
جالىن شامامەن 10 گا اۋماقتى شارپىدى. ءورت ساعات 11.19 دا تولىق ءسوندىرىلدى. زارداپ شەككەندەر جوق. قازىرگى ۋاقىتتا ءورتتىڭ نەدەن شىققانى جانە كەلگەن شىعىن مولشەرى ەسەپتەلىپ جاتىر. پەتروپاۆلدا بيىل قامىستىڭ ورتەنۋ جاعدايلارى جيىلەپ كەتتى. سوڭعى ءىرى ءورت پەتروپاۆلداعى كوپاي ىقشام اۋدانىندا بولدى، قامىستان تاراعان جالىننان ەكى جەكە تۇرعىن ءۇي جانىپ كەتتى. ال وتكەن دەمالىس كۇندەرى س ق و- دا 20 شاقتى ءورت تىركەلدى.
اۆتور: التىناي ساعىندىقوۆا