USD 416.91 EUR 446.47
RUB 7.34 CNY 62.53
جاڭالىقتار

قازاقستاندا عارىشقا ۇشۋدى ارماندايتىن تۋريستەر ءۇشىن سىناق كەشەن قۇراستىرىلادى

13 مامىر 12:52
:ءبولىسۋ
قازاقستاندا عارىشقا ۇشۋدى ارماندايتىن تۋريستەر ءۇشىن سىناق كەشەن قۇراستىرىلادى

نۇر-سۇلتان. قازاقپارات - قازاقستاندا عارىشقا ۇشۋ مودەلدەرىن زەرتتەۋ جانە عىلىمي سىناقتار جۇرگىزەتىن ەكسپەريمەنتتىك قۇرلىق كەشەنىن قۇرۋ جوسپارلانعان.

بۇل تۋرالى تاشكەنتتە وتكەن «Space Technology Сonference Central Eurasia « كونفەرەنسياسىندا «قازاقستان عارىش ساپارى» ۇ ك» ا ق باسقارما ءتوراعاسى ايدىن ايىمبەتوۆ ايتتى، دەپ حابارلايدى قازاقپارات ءتىلشىسى.

«عارىش سالاسى - ەلىمىز ءۇشىن عىلىم مەن تەحنيكانىڭ تىڭ باعىتى، عارىشتىق تەحنولوگيالار، گەوفيزيكا، مەديتسينا جانە بيولوگيا، بيوتەحنولوگيالار جانە ىرگەلى عىلىمدار سالاسىنداعى عىلىمي سىناقتار عارىش جەتىستىكتەرىن كەز كەلگەن قىزمەت سالاسىنا ەندىرۋگە مۇمكىندىك بەرەدى»، - دەدى ايدىن ايىمبەتوۆ.

«قازاقستان عارىش ساپارى» كومپانياسىنىڭ مالىمەتىنشە، ەكسپەريمەنتتىك قۇرلىق كەشەنى عارىش ستانساسىنىڭ ءبىر بولىگى تۇرىندە تۇرعىزىلىپ، وندا زەرتتەۋشىلەر ۇزاق مەرزىمدى سىناقتار جۇرگىزەدى. مودۋلدىڭ جۇمىسقا جارامدىلىعىنا جەرگىلىكتى تىرشىلىكتى قامتاماسىز ەتۋ جۇيەلەرى جاۋاپ بەرەدى. كەشەن عارىشتاعى جاعدايعا بارىنشا جاقىنداتىلادى. زەرتتەۋ قاتىسۋشىلارى سول ورتادا جۇمىس ىستەيتىن بولادى. كەشەننىڭ نەگىزگى مىندەتتەرىنە عارىش قىزمەتىنىڭ تىنىس- تىرشىلىگىن قامتاماسىز ەتۋ جۇيەلەرىن، مەديتسينالىق پروفيلاكتيكا قۇرالدارىن، ەكيپاجدىڭ جۇمىسقا قابىلەتتىلىگى مەن سەرگەكتىگىن، ەكيپاجدىڭ دەربەستىگىن، وقشاۋلانۋ سالدارىن جانە ونىمەن بايلانىستى فيزيولوگيالىق سترەسسورلاردى زەردەلەۋ كىرەدى.

«ورتالىق ازياداعى العاشقى عارىشتىق زەرتتەۋ مودۋلى كوپتەگەن ەنتۋزياست جانداردىڭ ارمانىن جۇزەگە اسىرۋعا مۇمكىندىك بەرەدى. عارىشقا ۇشۋ باقىتى بۇكىل الەمدە ونداعان ادامدارعا عانا بۇيىرۋى مۇمكىن. ال قازاقستاندىق ەكسپەريمەنتتىك كەشەن بولاشاقتا جۇزدەگەن عالىمدار مەن مىڭداعان ءتۋريستى قابىلدايتىن بولادى»، - دەدى جوبانىڭ سەرىكتەسى Eurasian Space Ventures جەكە عارىش كومپانياسىنىڭ نەگىزىن قالاۋشى شۋحرات يبراگيموۆ.

«قازاقستان عارىش ساپارى» كومپانياسىنىڭ اقپاراتىنا سۇيەنسەك، ەكسپەريمەنتتىك قۇرلىق كەشەنىنىڭ سىرتقى جانە ىشكى ءتۇرى قازىرگى ۋاقىتتا قارقىندى پىسىقتالىپ جاتىر جانە بيىل تانىستىرىلاتىن بولادى.

اۆتور: مارلان جيەمباي


:ءبولىسۋ
سونداي-اق... وقىڭىز
پئكئر قالدئرؤ
+7
جئبةرؤ

مۇراعات