قىتايلىقتار ءسابيتتىڭ ەرلىگىنە دە، تەرەزەنىڭ ساپاسىنا دا ءتانتى بولدى
سولاردىڭ ىشىندە قىتايلىقتار دا قازاق جىگىتىنىڭ ەرلىككە پاراپار ىسىنە ماقتاۋىن جاۋدىرۋدا.
ايتا كەتسەك، كۇنى كەشە عانا 8-قاباتتاعى تەرەزەدەن سالبىراپ تۇرعان 3 جاسار قىزدى قۇتقارعان ءسابيت شونتاقبايەۆتىڭ وقيعاسىن شەتەلدىك اقپارات قۇرالدارى دا جازدى.
قازاقپارات اگەنتتىگىنىڭ وسى وقيعا تۋرالى جاڭالىعى بۇكىل الەمگە، سونىڭ ىشىندە قىتايعا دا كەڭىنەن تاراپ كەتكەن ەدى.
قىتاي ءتىلدى قولدانۋشىلاردىڭ كوبى Twitter- دە بۇل وقيعاعا پىكىر ءبىلدىرىپ، ءسابيتتىڭ ارەكەتىن قولداپ، ەموتسيالارىن دا قالدىرىپتى.
ولاردىڭ ءبىرى بىلاي دەپ جازدى: «تىرەك نۇكتەسى جوق جەردە ءوزى ارەڭ ءىلىنىپ تۇرىپ ول بالانى ءوز دەنەسىمەن ۇستاپ الدى. بۇل شىنىندا تاڭقالارلىق جاعداي. سونىمەن قاتار، وعان تەرەزەدەن ۇيگە ورالۋ وڭاي بولعان جوق. بۇل قۇتقارۋ وقيعاسى شىنىمەن دە قاتتى اسەر ەتتى. مىقتى، ساپالى تەرەزەلەر دە كومەكتەسەدى ەكەن».
تاعى ءبىرى باتىردى ماقتاپ، ۇزاق عۇمىر تىلەپ: «بۇل كەرەمەت قۇتقارۋ وقيعاسى. جاقسى ادامدار ۇزاق ءومىر سۇرەدى» دەگەن پىكىر قالدىردى.
«وتە عاجايىپ ءسات ەكەن، ەگەر مەن سول جەردە بولسام، قىزدى قۇتقارماق تۇگىلى وسىعان قاراپ تۇرۋعا دا باتىلىم جەتپەس ەدى...» دەپ تە جازىپتى.
ەڭ قىزىعى، كوپتەگەن قىتايلىق جەلى قولدانۋشىلارى ءسابيتتىڭ ەرلىك ىستەرىن ماقتاي وتىرىپ، قازاقستانداعى عيماراتتاردىڭ تەرەزەلەرىنىڭ ساپاسىن دا اڭگىمە ەتىپ جاتىر. كەيبىرەۋلەرى تەرەزەنى شىعارعان زاۋىتتى دا ماقتاۋ كەرەكتىگىن ايتىپتى.
وسى ۋاقىتتاردا قازاقپارات اگەنتتىگىنىڭ قىتاي تىلىندەگى Twitter جەلىسىندە ءسابيتتىڭ بالانى قۇتقارىپ جاتقانى تۇسىرىلگەن ۆيدەو 67 مىڭ رەت قارالىپ، 500 دەن استام ادام ونى بولىسكەن. 2 مىڭنان استام لايك باسىلىپ، 90 عا جۋىق ادام پىكىر قالدىرعان.