رومان سكليار قازاقستاننىڭ ينۆەستيتسياعا تارتىمدىلىعىنىڭ ءۇش فاكتورىن اتادى

None
None
نۇر-سۇلتان. قازاقپارات - قازاقستاننىڭ ينۆەستيتسيالىق ساياساتىنىڭ جاڭا تۇجىرىمداماسى ازىرلەنەدى.

بۇل تۋرالى ق ر پرەمەر-ءمينيسترىنىڭ ءبىرىنشى ورىنباسارى رومان سكليار ايتتى، دەپ حابارلايدى قازاقپارات ءتىلشىسى.

«قازاقستان ساياسي جانە الەۋمەتتىك-ەكونوميكالىق وزگەرىستەر جولىندا ءوز تاريحىنىڭ جاڭا پاراعىن اشادى. قازاقستان پرەزيدەنتى قاسىم-جومارت توقايەۆ وسى جىلدىڭ ناۋرىزىندا «جاڭا قازاقستان» تۇجىرىمداماسىن جاريا ەتتى. اتالعان تۇجىرىمداما قوعامنىڭ بارلىق ءومىرىن قامتيدى جانە زاڭ شىعارۋشى بيلىك ينستيتۋتىن نىعايتۋعا، ءاربىر قازاقستان ازاماتىنىڭ ساياسي شەشىمدەر قابىلداۋ پروتسەسىنە قاتىسۋ مۇمكىندىگىن كەڭەيتۋگە باعىتتالعان. تاياۋدا جاڭا ۇكىمەت جاساقتالىپ، ونىڭ الدىنا الەۋمەتتىك-ەكونوميكالىق ماسەلەلەردى شەشۋ مىندەتى جۇكتەلدى. سونىمەن قاتار قازاقستاننىڭ ينۆەستيتسيالىق تارتىمدىلىعىن ارتتىرۋ ءۇشىن ينۆەستيتسيالىق ساياساتتىڭ جاڭا تۇجىرىمداماسى ازىرلەنەدى»، - دەدى رومان سكليار ەلوردادا ءوتىپ جاتقان قازاقستان-گەرمان بيزنەس فورۋمىندا.

ونىڭ اتاپ وتۋىنشە، الەمدىك ەكونوميكاداعى تۋربۋلەنتتىلىك جاعدايدا قازاقستان مەن گەرمانيا اراسىنداعى ءوزارا ءتيىمدى ىنتىماقتاستىقتى دامىتۋ ءبىرىنشى ورىنعا شىعادى.

«ەكى ەل ورتاق قۇندىلىقتاردى بولىسەدى جانە بەيبىتشىلىك پەن تۇراقتىلىقتى نىعايتۋدى جاقتايدى. قازاقستان تارتىمدىلىقتىڭ ءۇش فاكتورىنا يە: ەنەرگيانىڭ ءارتاراپتانعان كوزدەرى، لوگيستيكا جانە مول تابيعي رەسۋرستار. بىزدە جاسىل ەنەرگيا وندىرىسىنە جانە ونى ودان ارى ەكسپورتتاۋعا مول الەۋەت بار. قىتايدان ەۋروپاعا جۇك تاسىمالداۋدا دا ەلىمىزدىڭ ترانزيتتىك الەۋەتى ارتا تۇسەدى»، - دەدى ءبىرىنشى ۆيتسە-پرەمەر.


سوڭعى جاڭالىقتار