دايىن مەتال ونىمدەرى رەسەيدەن قىمبات باعامەن يمپورتتالۋدا - مينيسترلىك

None
None
نۇر-سۇلتان. قازاقپارات - رەسەيدەن دايىن مەتال ونىمدەرى قىمبات باعامەن يمپورتتالۋدا.

بۇل تۋرالى ق ر ي ي د م يندۋستريالىق دامۋ كوميتەتى ءتوراعاسىنىڭ ورىنباسارى تۇرار جولماعامبەتوۆ ءمالىم ەتتى، دەپ حابارلايدى قازاقپارات ءتىلشىسى.

«ت م د ەلدەرى اراسىندا تۇرعىن ءۇي قۇرىلىسى قارقىنى بويىنشا قازاقستان كوشباسشىلاردىڭ قاتارىندا. ول ءۇشىن قۇرىلىس ماتەريالدارى اۋقىمدى كولەمدە كەرەك بولاتىنى تۇسىنىكتى. ەلىمىزدەگى قۇرىلىس نىساندارىنا كەرەك ارماتۋرانىڭ جارتىسىن وتاندىق وندىرىستەر قامتاماسىز ەتەدى. قالعانىن بىرنەشە ەلدەن، ونىڭ ىشىندە ەلەۋلى كولەمىن رەسەيدەن يمپورتايمىز. وسى ورايدا ەكسپورتقا ۋاقىتشا تىيىم سالۋ قادامى ەسەبىنەن، وتاندىق وندىرىستەردى شيكىزاتپەن قامتاماسىز ەتۋ مۇمكىندىگى بار»، - ت. جولماعامبەتوۆ ورتالىق كوممۋنيكاتسيالار قىزمەتىندە.

ونىڭ ايتۋىنشا، مەتال قالدىقتارىنىڭ شىعارىلۋىن شەكتەي وتىرىپ، شيكىزاتتى وڭدەۋ، ىشكى نارىقتى قاجەتتى ونىممەن قامتاماسىز ەتۋ ماقساتى قويىلىپ وتىر.

2021-جىلى قازاقستاننان رەسەيگە 124 ميلليارد تەڭگەگە 754 مىڭ توننا قارا مەتال سىنىقتارى مەن قالدىقتارى شىعارىلدى.

ءبىر توننانىڭ ورتاشا باعاسى 165 مىڭ تەڭگە. بيىل رەسەيدەن قازاقستانعا 260 ميلليارد تەڭگەگە شامامەن 700 مىڭ توننا قۇرىلىس ارماتۋراسى يمپورتتالدى.

ءبىر توننانىڭ ورتاشا باعاسى 375 مىڭ تەڭگە. سونىمەن قاتار باعاسى تونناسىنا 1 ميلليون تەڭگەگە دەيىن جەتەتىن شۆەللەردى، قۇبىر مەن باسقا دا دايىن ءونىم يمپورتتالادى.

«ءوزىمىزدىڭ شيكىزاتتى بارىنشا كوبىرەك وڭدەپ، ودان دايىن ونىمدەردى شىعارۋىمىز كەرەك. وسى ورايدا ىشكى نارىقتى قامتاماسىز ەتۋ مەن دايىن زاتتاردى ەكسپورتاۋعا مۇمكىندىك بولادى»، - دەدى ۆەدومستۆو وكىلى.

بۇدان بۇرىن حابارلانعانداي، ەل اۋماعىنان قارا جانە ءتۇستى مەتالداردىڭ سىنىقتارى مەن قالدىقتارىن شىعارۋعا ۋاقىتشا تىيىم سالىندى.


سوڭعى جاڭالىقتار